Ministernan a firma Programa di Gobernacion 2021-2025

Ayera tardi den un rueda di prensa extraordinario a tuma luga e presentacion di e Programa di Gobernacion 2021-2025: Aruba mester di Nos Tur, di Gabinete Wever-Croes II. Durante e presentacion di e programa aki, tur e ministernan di e gabinete tabata presente y a firma oficialmente e programa di gobernacion.

Durante e rueda prensa, cada minister a presenta nan vision pa nan ministerionan pa e proximo cuater añanan. Minister President, Sr. Evelyn Wever-Croes, cu tambe ta encarga cu e Miniserionan di Asuntonan General, Innovacion, Organisacion Gubernamental, Infrastructura y Planificacion Teritorial, a splica cu na e momentonan aki, ya caba den comienso di recuperacion saliendo for di pandemia e exito di Aruba ta bay wordo determina pa e esfuerso y empeño cu cada persona haci y duna pa hiba Aruba pa dilanti, “p’esey nos a yam’e Aruba mester di Nos Tur”.

Minister President a elabora ariba e vision cu e tin pa su ministerionan pa e siguiente cuater añanan enfatisando cu nan lo enfoca ariba e sosten cu su ministerionan mester duna pa e recuperacion di e pais. “Nos tur kier mira Aruba recupera, nos tur kier mira Aruba yega back na e nivelnan di prome cu pandemia”, el a bisa.

El a menciona cu e master plan cu e tin pa reposiciona e rumbo di Aruba lo ta e guia pa recuperacion y e master plan aki a wordo traha teniendo na cuenta plannan anterior, manera por ehempel Aruba 2025 y e Nacional Strategic Plan. El a indica cu e acuerdo firma cu Hulanda, e landspakket, ta alinea cu e master plan aki y pues asina nan lo bay traha ariba reforma pa restructura Aruba pa Aruba por bira un pais resiliente y fuerte den futuro.

Ministerio di Innovacion, segun Prome Minister a indica, no ta un producto riba su mes, e ta un herment pa logra metanan di gobernacion y mehoracion di calidad di bida di e ciudadanonan. El a splica cu den aspecto di innovacion nan lo enfoca ariba e-government y e plan nacional “e-government road map 2020-2025: a better citizen experience” ta diseña pa mehora, a traves di digitalisacion, e servicionan di gobierno.

“Caminda cu mester y por, nos lo duna sosten na demas ministerionan den proyectonan pa desaroyo di talento, por ehempel enfoca ariba e 21^st century skills, desaroyo di programanan di educacion profesional riba tereno di IT management y sin lubida seguridad cibernetico cu ta hopi importante”, el agrega.

Bon Dia Aruba a puntra Prome Minister con e ta bay duna e departamento nobo di innovacion autoridad ariba e otro departamentonan den ehecucion di proceso administrativo nobo. Segun su contesta, e departamento di innovacion ta un departamento cu tin ta bay fomenta e pensamento innovativo den tur e departamentonan di gobierno. El a splica cu innovacion no ta bao di un departamento of bao di un ministerio, tur ministerio ta bay traha cu innovacion.

“Bo ta bay haya innovacion den por ehempel agricultura, nos ta wak hopi innovacion den enseñansa sin papia mes cuanto tin den salubridad, den husticia nos kier traha hopi mas innovacion, kiermen tur e ministerionan ta bay haya innovacion pero bo lo kier si pa bo tin un punto central cu por yuda cu conseho of por yuda cu sosten caminda cu tin mester y eynan e direccion pa innovacion ta bay ta encarga”, el a indica.

El a agrega tambe cu e Departamento di Innovacion ta bay ta encarga tambe cu coordinacion di e landspakket, “cu ta innovativo, cambionan pasobra innovacion no ta solamente digitalisacion, e ta tur solucion nobo pa problemanan existente pensamento na un forma nobo, busca solucion na un forma nobo.” El a señala cu e departamento no ta bay tin poder ariba otro departamentonan pasobra e ta bay ta un directie y un directie ta duna conseho y ta traha maneho, e no ta esun encarga cu uitvoering (ehecucion), esey ta un dienst (departamento) ta haci.

Den aspecto di Organisacion Gubernamnetal el a indica cu e meta lo ta pa desaroya un sector publico cu ta agil, confiabel y ta duna servicio di balor agrega na comunidad. Nan lo traha riba hisa efectividad di servicio di sector publico door di brinda servicio mas rapido y cu menos burocracia y sigura integridad y transparencia den tur e procesonan gubernamental.

Pa loke ta trata Asuntonan General, Minister President a bisa cu tur e esfuerso lo ta dirigi den e aspiracion nacional di Aruba pa logra un transicion exitoso pa un modelo economico nobo cu ta sostenibel, inclusivo y resiliente. Asuntonan General ta atende tambe cu e estado di derecho, y el a indica cu akinan nan ta enfoca ariba e colegionan halto di estado caminda nan lo traha mas ainda pa fortifica cada un di e colegionan aki pa nan por cumpli cu nan tarea y caminda cu tin mester lo wordo independisa ainda mas pa asina garantisa mas ‘checks and balances’ na Aruba. “E trabounan legislativo pa institui un colegio di estado halto nobo lo wordo finalisa”.

“Tambe nos lo atende cu nos relacionnan exterior y relacionnan di reino y tur esfuerso lo ta dirigi pa crea oportunidadnan nobo den exterior y den reino dirigi riba recuperacion di nos pais y specialmente recuperacion economico”, el a agrega.

Pa loke ta e parti di Ministerio di Infrastructura y Desaroyo Teritorial, el a splica cu e punto di salida ta un maneho transparente y husto pa desaroya infrastructura pa maneha terenonan y pa un desaroyo teritorial sostenibel. Den esaki un di e puntonan principal cu el a señala ta pa elimina e atrasonan cu tin aworaki den procesamento di peticionnan pa otorgamento di tereno y diferente permisonan.

Tambe den cuadro di e ROP y e ROPV nan lo implementa e maneho di infrastructura y di medio ambiente cu ta integral. “Hunto cu e Ministerio di Naturalesa nos lo brinda sosten caminda cu tin mester pa un solucion structural pa e problema di RWZI”, el a indica.

“Pa stimula construccion cu ta hisa eficiencia di energia, adaptacion di clima y adherencia na regulacionnan ambiental nos lo traha cu build with nature. Nos lo sa di optialisa e uso di tereno y espacio limita cu nos tin ariba nos pais. Finalmente caminda cu mester nos lo aporta na maneho nacional pa cambio di clima y resiliencia”, el a agrega.

Bon Dia Aruba tambe a puntra a puntra Minister President, Sra. Wever-Croes, ariba e cartera di Integracion, specialmente DIMAS, unda cu nos a puntra pakico a separa DIMAS di e resto di husticia unda cu e ta na su luga logico mirando e tareanan di LTU, y si gobierno ta consciente di e riesgonan di pone esaki den un solo man hunto cu labor.

Minister President a contesta cu e decision pa haci esaki tabata “un escogencia delibera y consciente”. El a splica tur e esfuerso di su gabinete ta dirigi pa e recuperacion di e pais y un di e obstruccionnan, den e parti burocracia red tape, ta e parti di permisonan. “Nan tabata separa den dos ministerio y nos a dicidi di pone nan hunto pa por alinea e procesonan mas miho pa tin un miho bista pa si tin cosnan cu no ta bay bon na un of e otro nan por wordo gara na tempo”.

El a sigui splcia cu ora cu tin cosnan separa den ministerio, algun cos ta cay entre “wal en schip manera nan ta bisa”, aworaki tur cu e decision cu a wordo tuma pa pone DIMAS hunto cu Ministerio di Labor, esakinan ta cay bou di un solo maneho y segun el a indica e intencion ta hustamente esey, pa alinea e maneho pa por yega na otorga e permisonan mas agilisa. El a enfatisa esaki no kiermen cu tur hende ta bay haya permiso, pero tur hende tin cu haya un contesta ariba nan peticion, y el a indica cu e proceso di alineacion no ta conta pa e ministerio ey so, “e ta conta pa por ehempel permisonan den e aspecto di horeca, den e aspecto di economia, den aspecto di tereno, tur eseynan mester wordo alinea”