Desde su 22 aña, Mayra tabatin un pasion pa estetica, haciendo cu desde 20 aña pasa el a cuminsa su biahe y desaroyo den e mundo di estetica; te cu dia di awe, e ta un profesional den e area, cu ta eherce su profesion cu amor y hopi pasion.

Su mama tabata un di e personanan cu tabata bende cremanan di catalogo, y e tabata cumpra pa Mayra y su rumannan tambe. “Semper e tabata bisa nos ‘bo tin cu cuida bo cara, usa crema pa den dia, crema pa anochi, bo tin cu limpia bo cara tur dia prome cu drumi’. Semper e tabata un persona cu a cuida su mes hopi, hasta den cuminda,” Mayra ta conta.

Den e tempo aki, tambe nan tabatin profesionalnan cu ta traha den estetica mira como hendenan cu ta haci cosnan cu no tin hopi dificultad su tras. Y te ainda, tin hopi hende cu ta pensa cu e hecho di studia estetica no tin hopi peso, y cu ta algo unda cu bo ta “sinta den un luga, y bo ta pone crema, bo ta duna masashi y ya. Esey ta tur,” Mayra a comenta.

E idea aki ta uno hopi eroneo: “Mi tin mas di 3 aña caba ta studia e carera aki, y mi ta kere mi lo sigui studia e carera aki pa resto di mi bida,” el a agrega. Estetica no ta un carera artesanal, pa motibo cu bo tin cu studia hopi tocante anatomia, biologia y compronde con e curpa ta traha. Yy e “hecho di studia e curpa no ta algo facil” pa motibo cu den estetica bo ta trahando cu e organo mas grandi di e curpa. “Ora cu nos mishi cu un organo, nos mester sa dicon nos ta bay mishi e organo aki, y cu ki meta. Nos mester sa den kico nos ta bay yuda.”

Su proceso pa bira profesional te ainda ta sigui 20 aña despues, y ta uno cu no tabata facil. Prome cu e pandemia Mayra tabata den e di dos parcial pa por sigui na cosmetologia, pero a causa di e pandemia, e no por a biaha bay Ecuador pa por ricibi su titulo. “Tur cos a cambia. El a costa mi persona hopi trabao y esfuerso siña con pa haci varios proceso cu nunca mi a imagina mi lo mester haci, durante e tempo aki e tabata algo traumantisante y frustrante pa mi persona,” el a expresa.

Sinembargo, esaki no ta kita Mayra su gana y pasion pa sigui studia e carera aki. “Y mi por bisa cu cada biaha ta sali un acne nobo, mi parti faborito ta trata acne, y ta parti di loke mi ta siña cu mi juffrouw Sandra Maseo James, ken semper ta papia tocante e trabao cu nos ta haci y e seriedad cu nos mester tin den e profesion aki.”

Aruba tin hopi persona cu un cara hopi maltrata, pa motibo cu nos ta biba na un Isla unda cu e solo ta hopi fuerte, y pa medio di expone nos mes pa varios ora na e solo, nos ta mata e celulanan di nos cuero. Y te hasta den cas nos ta den presencia di luznan “silencioso pero peligroso” pa motibo cu nan ta causante tambe di cancer den cuero.

Tin hopi diferente metodo casero cu por usa pa proteha y cuida nos cara for di cas;

E papaina nos ta saca for di e papaya, bo por tuma un pida di e carni di e papaya hunto cu algun simia, y bo ta mula esaki hunto, laga e mescla aki algun 15 minuut, y aplica riba e cara. Esaki ta habri e poro unda cu bo por saca e impuresa den e cara sin causa herida ni mancha.

E bromilina, cual ta sali for di e curason di e anasa cu e casca di e anasa, pa medio di herbe esaki den awa pa un ora, y laga esaki reposa henter anochi y cola e awa pa por aplica riba e cara, cual tambe lo habri e poro di e cara y por saca tur e impuresa sin causa daño na e cara. Tambe por baña cu esaki, cual ta yuda e cuero di e curpa y ta laga un aroma agradabel riba e curpa.”

Pa hendenan cu tin un tipo di cuero normal of madura un mascara di koffie. Pa medio di gara koffie cu awa y gara e parti blanco di e webo bati, sin cu e bira scuma, despues gara papel di baño limpi, partinan pida pa pida, y pasa cu un cuashi pa cara, e webo bati cu un papel, y despues ta pasa e koffie riba esaki, y ta pone esaki den henter e cara conforme e manera cu e musculo ta bay ta duna un efecto di ‘lifting’ casero.

Algo hopi importante di tene na cuenta ta ora di usa aloe riba nos cara, no por corta esaki y pone directamente riba e cara. Mester corta e aloe, pone den un beker y laga esaki sinta henter anochi, pa e por saca tur e parti amargo cu e planta tin aden, y despues por haci uso di esaki.

Ta importante, pa nos pone nos mes den man di un persona profesional: “un persona profesional sa cu ‘pro’ ta pa nos bay dilanti, y sigui desaroya nos mes den e carera, ‘fe’ ta e confiansa den loke mi sa y lo ke mi ta bay sigui siña, y ‘sion’ ta tur e conocemento cu mi tin caba y mi lo usa den mi carera.”

“Nos mester tene na cuenta como persona cu ta traha den estetica, cu ora nos ta mishi cu e cara di un persona, nos ta mishi cu nan curason tambe.” Mayra a clausura.