Diasabra merdia na Aeropuerto Internacional Reina Beatrix, Minister di Turismo y Salubridad Publico, Sr. Dangui Oduber, hunto cu Sra. Ronella Croes, CEO Aruba Tourism Authority y Sr. Alfredo Gonzales, Vice-Presidente di Global Sales and Development di Frontier Airlines, a celebra e inauguracion di e prome vuelo di Frontier Airlines for di Miami, Florida pa Aruba.

Como un di e pasaheronan ariba e vuelo inaugural, Oduber a expresa cu el a sinti hopi afortunado di por tabata den e vuelo inaugural for di Miami caminda cu for di check-in te cu el sinta den su asiento el a experiencia “un servicio tremendo, un servicio excelente cu mi por bisa cu alegria ta na altura di e hospitalidad Arubiano cu lo warda cada un di e pasaheronan cu lo bula cu Frontier Airlines pa Aruba di awo pa dilanti”.

Turismo ta e pilar di economia di Aruba y e inauguracion di vuelonan cu e aerolinea Frontier ta habri mas posibilidadnan pa e turistanan Mericano por bishita Aruba. Oduber a splica tambe cu manera ta conoci turismo un gran fuente di empleo global pa su efecto significativo multiplica den diferente sector, y mientras cu e pandemia di COVID-19 a pusha e industria pa modifica y busca oportunidadnan nobo, Aruba ta afortunado cu Frontier Airlines a pone su confiansa den Aruba como un destinacion.

“Como e aerolinea number 26 nos ta yama Frontier Airlines bon bini na nos isla, Aruba ta expande su horizontenan constantemente y aworaki cu e comienso di e partnership importante aki nos por pusha pa fronteranan nobo mientras nos ta impulsa nos economia mas leu ainda”, Oduber a agrega.

Segun el a señala, e industria di transporte di costo abao ta conoci como e motor di recuperacion den e industria di biahe y como Minister di Turismo e ta esforsa su mes pa genera un crecemento economico positivo pa medio di esfuersonan di turismo sostenibel. El a sigui menciona cu Frontier Airline ta comparti e vision aki pasobra nan ta 40% mas berde cu otro aerolineanan di Merca y esaki lo yuda Aruba yega su meta di turismo sostenibel.

Frontier Airlines ta identifica como un transport di costo abao cu ta bula pa mas di 100 ciudad na Merca, y Oduber a expresa su gratitud cu Frontier Airlines, cu segun el a indica a demostra cu den temponan dificil, den temporada di pandemia tin e confiansa pa lansa un vuelo inaugural pa Aruba. “Esaki sigur ta yena nos cu satisfaccion cu nos ta bay trece mas turista pa Aruba”, el a bisa. “Ya caba nos tin e proyeccionnan pa aña 2022 cu ta surpasa e cantidad di asientonan cu tabatin disponibel na aña 2019, kiermen aña 2022 ta priminti di bira un aña sumamente positivo pa Aruba”.

Minister a splica cu e proceso di negociacion entre Ministerio di Turismo, Aruba Airport Authority y e Frontier Airlines tabata largo, pero el a indica cu e ta hopi contento cu e partidonan por a yega na un acuerdo pa lansa e vuelo inaugural aki for di Miami pa Aruba.

Frontier Airlines su oficina principal ta situa na Denver, Colorado y segun e Minister a splica, e vuelo for di Miami cu Frontier Airline ta habri oportunidadnan nobo pa turistanan di diferente parti di Merca cu no por a yega Aruba, por haci esaki cu Frontier “Esaki ta cuadra cu e vision cu nos tin di diversifica nos mercado. Merca tin hopi destinacion hopi ciudad ainda cu no tin vuelonan pa Aruba y un di e mercadonan cu desde cu nos a drenta gobierno nos tabata enfoca ariba dje ta e mercado di Denver, Colorado cu ta un mercado cu tin turistanan hopi afluente, cu tin turistanan di calidad cu nos ta desea pa tin na Aruba”.

Oduber a enfatisa cu e partnership cu Frontier Airlines no lo beneficia e turistanan solamente, pero tambe e Arubianonan cu tin deseo di biaha pa Merca, ya cu segun el a splica Frontier ta ofrece prijsnan competitivo cu lo duna e biaheronan local mas oportunidad pa por bishita e pais Mericano.

Sr. Alfredo Gonzales, Vice-President of Global Sales and Development di Frontier Airlines tambe tabata presente durante e evento y e tambe a expresa su gratitud cu e partnership cu a wordo crea entre Aruba y Frontier Airline. “Awe nos ta celebra mas cu un vuelo, nos ta celebra e conexion di dos comunidad”, el a bisa. “Frontier Airlines lo conecta miles di Arubianonan cu ta biba na Merca, cu un cantidad innumerabel di Mericano cu kier bin disfruta di e Paraiso aki.

El a menciona cu, manera ta conoci mundialmente,e ultimo añanan tabata dificil. E pandemia tabata tin efecto negativo y a lastima e industria, a lastima e economia. Segun el a splica Frontier Airlines ta trata cu un structura di prijsnan abou cu e ta lo cambia e dinamica di biahamento. “No solamente nos ta e aerolinea mas berde di e mercado, pero nos tin tarifanan diseña specialmente pa satisface e necesidadnan di e mercado y esey ta hopi importante, Frontier ta compronde cu e hendenan kier biaha, nan mester biaha pero nan mester por paga pa biaha.”, el a agrega.

Tanto Oduber como Sr. Gonzales a enfatisa tambe cu Frontier Airlines tin mas di 100 avion cu ta bula cu ta proteha y cuida naturalesa y cu ta usa menos carbon cu e otro aerolineanan Mericano. “E ta mas green y ta den cuadro cu e vision cu nos tin tambe di un turismo sostenibel cu nos tin pa Aruba”, Oduber a agrega.

“Nos compromiso ta bay mas leu di djis prijsnan abou, nos ta compromete pa proteha e medio ambiente. E manera cu nos ta haci esaki ta cu e relacion cu nos tin cu AirBus. AirBus ta provee nos avionnan cu ta mas light y mas light e avion ta menos combustibel nos ta kima y menos daño nos ta causa na e medio ambiente”, Sr. Gonzales a reafirma.

El a splica cu ariba e cola di cada avion di e aerolinea tin un bestia cu ta en peliger di extincion, esaki, el a indica, ta pa crea conscientisacion den e comunidadnan di e importancia di cuido di medio ambiente.