Awe maestronan tin reunion extraordinario na SIMAR

Manera ta conoci for di algun dia atras, Sindicato di Maestro (SIMAR) a tene un reunion extraordinario y nan a forma un comision pa delibera ribadiferente tactica cu nan ta bay usa den proximo dianan. Awe dialuna den oranan di mainta, maestronan ta bay tin un otro reunion tocante recorte di salario di 12.6% y recorte den area di Enseñansa.

Asina a señala Josephine Albertus presidente di SIMAR na Bon Dia Aruba na unda cu el a informa cu diahuebs di siman pasa nan a tene un otro reunion cu minister di Enseñansa Endy Croes na unda nan a haya e mandato riba cortamento den area di Enseñansa, preocupacionnan, retonan cu tin, pero tambe nan a haya un mandato di loke ta trata recorte di salario di 12.6%.

Den reunion aki, Albertus a indica cu nan no a trece dilanti e topico aki cu minister Croes pa motibo cu nan a keda fiha riba dia 11 di november utlimo cu nan lo bay back cerca nan pa wak kico a sali afo cu minister y pa asina ey nan por delibera riba e siguiente pasonan.

Awe dialuna mainta maestronan ta wordo convoca pa un reunion extraordinario entre 8r te cu 10or di mainta na Sede di SIMAR na Sero Blanco pa di e forma ey nan por sigui fiha nan siguiente pasonan “pasobra nos ta haciendo di un manera responsabel, ora SIMAR sali, no ta sali pa su mes e ta sali pa e veld, pa su miembronan y pa nos e ta importante pa haya sa kico e veld a sinti y pa esey nos ta yama e reunion aki pa e veld completo, miembro y no miembro di sindicato”, el a señala.

Diasabra ultimo a ser publica un articulo na unda cu tabata indica cu sindicato SIMAR a reuni cu minister di Enseñansa y “nan a keda contento cu e reunion aki y cu maneho di minister Croes”, pero tocante esaki Albertus a declara cu “nos por bisa cu ni un momento nos a bisa cu nos ta contento, nos a subraya cu pa nos como sindicato e ta importante pa sigui inverti den enseñansa, pasobra minister a bisa nos cu 11 miyon a baha, pero e no kier bisa ki suma e ta y nos a bis’e cu nos no kier tende di cortamento, nos como sindicato nos trabou ta pa keda critico y asina ey wak con e desaroyo ta bay den e veld.”

Loke e si a afirma ta cu nan si ta contento cu nan por a sinta na mesa cu minister Croes “pero esey no kiermen cu nos ta contento y nos a laga tur cos bay…no, nos tin cu sigui haci nos trabou y nos trabou ta pa ora nos mira algo, sali y vocifer’e y vooral mirando cu dia 11 di november nos a scucha e diferente retonan cu tin y nos a vocifera nan tambe cu minister y bo ta tende cerca minister cu e ta trahando riba dje, cierto di nan tabata nobo p’e, cierto di nan tabata cosnan cu el a tende pasobra e tambe a sinta cu e directivanan di scol, e tambe ta haya su informacion y pa nos esey tabata bunita pa wak”, Albertus a declara.

Di mesun manera, el a expresa cu nan tin cu keda realistico pa motibo cu “no ta pasobra nos a bay na reunion cu minister y e ta bisando cu e ta trahando riba dje, nos ta contento pasobra cu e reto cu nos tin awo no ta di awo, ta di prome di Covid-19, ta di añanan caba y anto cada biaha bo ta tende cu nan ta riba dje y ainda nan t’ey y nan ta birando pio, den temporada di Covid e retonan a bin extra cune”, el a bisa.

Asina mes, el a trece dilanti cu otro paisnan a haya bono extra como por ehemplo Corsou, na unda cu Albertus a declara cu “ora cu nan a firma e landspakket nan si a ricibi un suma grandi pa enseñansa, nos na Aruba no a ricibi nada”, manera el a indica caba nan ta keda abierto pa dialogo y awor minister Croes a informa nan cu e tin dos luna so, “pa su persona e ta mustra un corto tempo pero un hende laborando den veld di enseñansa cu tin añanan caba den e retonan aki, un dia mas cu e tin cu warda ta di mas”.

Ademas Albertus a puntra minister si e tin un manera pa trece trankilidad awor pa motibo cu nan no por keda cada biaha bisa cu nan lo sigui warda.

Pa e mesun motibo tocante cortamento di salario di 12.6% pa empleadonan publico y semi-publico otro sindicatonan tambe a lanta nan voz siman pasa na unda cu Sindicato di Trahadonan di Telecomunicacion (STT) di Setar tambe a tene un accion diahuebs ultimo di dos ora unda cu por a mira otro representantenan di sindicato a uni na e actividad aki, pa cu esaki Albertus a menciona cu nan como sindicato “ta para pa tur humilde trahado y e ora ey nos tin algo en comun y nos tin cu sostene otro, pasobra den union tin forsa y esey ta pensamento cu nos ta usa unda cu nos a sali conhunto, na cuminsamento 15 sindicato a firma un carta pa nos por haya un reunion cu gobierno y nos a sigui asina, nos a sali siman pasa hunto pa duna nos puntonan pasobra ora nos a tuma nota di e rueda di prensa di dialuna di siman pasa di prome minister, nos no tabata di acuerdo cu loke minister tabata vocifera, no a sali diamars tambe pa nos contraresta y duna e relato con nos ta bisa cu esey ta documenta cu hechos y nos ta sigui”, el a afirma.

Ta p’esey cu diaranson awor dia 24 di november nan como sindicatonan hunto ta bay yama e veld completo di esunnan cu ta laborando pa asina ey nan por uni cu otro y trece e preocupacionnan cu tin pa dilanti y di eynan sigui fiha posicion pa nan por sigui bay dilanti, pa motibo cu Albertus a expresa cu den union tin forsa y nan tur ta para pa e trahado y alabes nan ta representa tambe esunnan cu no kier bin dilanti.

Albertus a comenta cu nan a tuma contacto cu tur sindicato pa e momento cu nan haci e yamada nan sa sigur si nan por pone nan nomber di nan sindicato riba e flyernan di convocatorio pero algun a bisa cu nan no kier, SIMAR a respeta esey tambe, segun Albertus a manifesta.