Ayera diabierna, na oficina di CEDE Aruba a tuma luga e acto di firmamento di un protocol di cooperacion entre Gobierno di Aruba, CEDE Aruba y Samenwerkende Fondsen Cariben. E protocol aki ta conta pa un periodo di 5 aña cuminsando for di 1 di januari 2022 te december 2026 y e ta un prolongacion di e mesun protocol di e periodo 2017-2021.

E relacion y cooperacion entre Gobierno, CEDE Aruba y Samenwerkende Fondsen Cariben tin un historia largo, nan a conta cu desde 2004 CEDE Aruba a fungi como partner den co-financiamento. Durante casi 20 aña, e cooperacion a sostene un cantidad grandi di proyecto aki na Aruba y a yuda crea un infrastructura valioso di NGO’s.

E punto di salida ta cu Gobierno ta sostene CEDE Aruba cada aña cu un suma pa duna sosten na proyectonan y desaroyo di NGO’s. CEDE Aruba na su turno ta maneha e fondo aki ariba un distancia profesional di gobierno. E sosten di CEDE Aruba na NGO’s ta wordo duna cada bes a base di un plan di maneho pa 5 aña, cada plan di maneho ta wordo traha den consulta cu diferente NGO’s, departamentonan di gobierno y diferente stakeholders.

Samenwerkende Fondsen Cariben na e otro banda di ocean ta consisti di 5 fondo grandi Hulandes cu ta: Oranje Fonds, Kansfonds, Stichting Kinderpostzegels, Fonds Sluyterman van Loo y Roomsch Catholijk Armenkantoor (RCOAK).

Cada fondo tin un otro enfoke. Por ehemplo desaroyo di bario, pobreza, actividad pa adulto mayor, hende cu limitacion, gruponan vulnerabel, etc. Cada aña, e fondonan aki ta pone un presupuesto disponibel pa e islanan den Reino Caribense, di e forma aki nan hunto ta yega na un suma mas grandi pa haci un impacto positivo ariba e islanan.

Durante e 5 aña di e ultimo protocol, CEDE Aruba hunto cu Samenwerkende Fondsen a sostene varios proyecto importante. Entre otro, a sostene y a aumenta e cantidad di programa pa Centronan di Bario, a pone enfasis riba actividadnan pa hoben despues di scol y a sostene hopi actividad pa hende adulto/mayor rond di Aruba.

Tambe a inverti den algun proyecto grandi, manera e centro pa hende cu limitacion multiple na San Nicolas, maneha pa Ambiente Feliz, y e ampliacion di e facilidad di Fundacion Contra Violencia Relacional na Aruba. Otro proyecto grandi ta e introduccion di Signs of Safety, cu a fortifica mas cu 350 profesional cu un forma di traha nobo cu casonan di negligencia y abuso di menor. Banda di esaki, hunto a duna un ayudo grandi durante pandemia, specificamente pa asistencia di alimentacion hunto cu Fundacion Pa Nos Comunidad y YMCA.

Den practica, fundacionnan ta entrega nan proyecto na Samenwerkende Fondsen Cariben por medio di CEDE Aruba, nan ta revisa e proyecto segun criterio y despues ta recomenda y solicita Samenwerkende Fondsen pa sostene e proyectonan aki.

Den e caso cu fundacionnan mester di sosten pa desaroya proyecto, CEDE Aruba tambe ta duna e servicio aki. Na final, hopi proyecto ta wordo financia conhuntamente entre CEDE Aruba y Samenwerkende Fondsen Cariben.

Banda di esaki, Samenwerkende Fondsen Cariben a duna CEDE Aruba un ‘microbudget’, for di cual CEDE Aruba por sostene proyectonan mas chikito, manera iniciativa y actividadnan nobo den diferente bario.

E acuerdo di colaboracion aki lo continua durante añanan binidero, unda lo trata di haci e forma di traha aki mas eficiente. Un meta adicional pa CEDE Aruba ta pa acerca otro fondonan internacional y recauda su mesun fondonan, entre otro riba propio iniciativa.

Durante e ultimo aña esaki a duna su fruto adicional. Asina e colaboracion entre Gobierno di Aruba, CEDE Aruba y Samenwerkende Fondsen Cariben ta algo unico compara cu e otro islanan den Reino. Ambos partner ta hopi motiva pa sigui brinda sosten na NGO’s y iniciativa di comunidad.

Den un conferencia di prensa den representacion di Gobierno di Aruba tabata presente minister presidente Evelyn Wever–Croes y minister di Asuntonan Social Rocco Tjon cu a firma e acuerdo hunto cu representante di Samenwerkende Fondsen Cariben, Henriette Hulsebosch di Kansfonds y Kristal Ashra Oranjefonds,  presidente di CEDE Aruba Sheila v Veen y tesorero Dito Reyes.

Pa mas informacion por consulta e website nan www.cedearuba.org y www.samenwerkendefondsen.org of por tuma contacto cu oficina di CEDE Aruba na 582-7666. Semper por traha un cita pa explora posibilidadnan, a base di e criteria di ambos organisacion.