Den e Agenda di Ehecucion (Uitvoeringsagenda) acorda entre Hulanda y Aruba flexibilisacion di leynan laboral tambe ta aparece, mencionando varios topico relaciona cu esaki. Den edicion awe atencion pa e papel cu gobierno mes ta hunga den esaki, mirando nan maneho y uso di labor temporal y ‘flexible’ den mas di dos decada.
Den añanan nobenta di siglo pasa Aruba a cera conoci cu e fenomeno di ‘uitzendbureau’ cu tabata un reaccion riba e demanda grandi di personal den nos economia. E tipo di convenio cu un persona cu kier traha ta cera cu un uitzendbureau, no ta un contrato laboral segun Codigo Civil, y por lo tanto no ta mara na e condicionnan cu tin den e Codigo. Na mitar di añanan 90 ya tabatin un promer concepto di ley encuanto uitzendbureau, den linea general hopi similar na loke tabatin caba na Hulanda y Antiyas, pero regulacion di e parti di mercado aki mester a warda te 2013 pa mira un ley aproba.
Mientras tanto, gobierno mes, sin ley ni supervision, den tur e añanan ey tabata haci ampliamente uso di trahador di uitzendbureau. Hopi di nan, no tur, tabata haci por ehemplo trabao di ‘datatypist’ na diferente departamento, tempo cu digiltalisacion a cuminza bira importante. E situacion di un bashi den ley a hiba na varios caso di abuso unda personan tabata traha varios aña den mesun funcion na gobierno como ‘uitzendkracht’, mientras cu tabata obvio cu tabata trabao permanente. Den e analisis reciente cu IMF a haci di e payroll di gobierno tabata aparece un cantidad di posiblemente varios cien trahador di uitzendbureau. Como cu nan tabata categorisa hunto cu esnan cu a opta pa VUT, no ta dispone di cifra exacto, di igual manera tampoco nos tin di e situacion actual.
Banda di e trahadornan ‘fia’ aki, gobierno tabatin personal cu ta sea ambtenaar o ‘contractant’. E ultimonan aki, tin un convenio di trabao pa un cierto periodo, y ta goza di beneficio normal den un relacion di trabao, manera derecho di vacacion segun e normanan vigente. Tambe gobierno tabata conoce desde semper esnan cu ta suministra cierto servicio, cu ta categorisa como empresario y cu no tin ningun convenio laboral cu gobierno, hasta si e servicio cu nan ta duna ta na pia di trabao na gobierno. Nan logicamente no ta aparece riba payroll di gobierno, pero ta administra entre e acreedornan cu ta entrega mercancia o servicio.
Modelo nobo ‘hybrid’ di contratante
Loke no ta conoci te awor ta cu gobierno, den un aparente afan pa contrata persona sin cu nan ta aparece riba payroll, pero ta cobra na Finanzas como proveedor di servicio, a bira mas creativo ainda den uso di trabao flexible. Den e discusion cu CAft y gobierno Hulandes, si e gastonan di personal di e Plan di Crisis Social mester ser suma na gastonan di personal gubernamental, a dicidi finalmente cu e gastonan aki mester ta inclui den gasto di personal di gobierno. Mientras tanto na gobierno a bin riba e idea pa pone e personal aki riba un asina yama ‘dienstverleningsovereenkomst’ (DVO), unda nan no ta categorisa como ‘empleado’ temporal, sino como empresario cu ta brinda servicio. Un modelo mas elabora di esaki a bin dilanti recientemente, unda e convenio yama ‘Overeenkomst van Opdracht SCP’. Bon Dia Aruba ta dispone di un copia di e modelo aki, di cual un parti ta aparece den e imagen acompañante.
E modelo aki ta bay un stap mas leu den sigura e derechonan di gobierno como empleador, mientras cu como empresario suministrador di servicio, e persona, cu basicamente ta un contratante den servicio temporal di gobierno, ta keda sin e derechonan cu un empleado, tambe temporal, normalmente tin. Manera derecho riba vacacion, derecho riba pago den caso di enfermedad, etc. E convenio ta stipula bon cla cu gobierno no debe nada pa oranan no traha, mencionando e frase “No work, no pay”. Aki ta aplica eroneamente e regla aki, cu ta conta pa empleado cu no traha. Pa un empresario cu no cumpli cu duna servicio, e regla lo mester ta “no performance, no pay” o algo similar. Loke si a regla bon den e convenio ta cu ta considera e ‘empresario’ aki un ‘empleado’ pa cu ley di belasting, y ta kita di biaha tur loonbelasting y primanan di e pago mensual. Esaki obviamente pa evita e problemanan cu tin cu otro proveedor di servicio cu ta haya full nan pago y eventualmente no ta declara esaki na Impuesto. Ta remarcable cu den e convenio ta usa banda di otro e terminonan ‘vergoeding’ y ‘salaris’ loke ta contribui mas na e caracter confusivo di esaki, si ta trata di un trahador o un empresario.
Pakico no simplemente un contrato temporal?
E pregunta cu ta surgi ta si no tabata mas simple pa ofrece e persona den servicio temporal aki e contrato temporal cu gobierno tin decadas ta aplica. Bao di esaki e persona ta mara na mesun normanan di supervision, mientras cu pago di belasting y prima tambe ta garantiza. E unico diferencia real ta cu, como contratante regular, e persona lo aparece riba payroll di gobierno, y no den administracion di acreedor, como empresario cu ta brinda servicio. Sin embargo, manera bisa anteriormente, e hecho cu di tur manera e tipo di contrato aki mester aparece den gasto di personal di gobierno, segun e supervision financiero na cual nos pais ta someti, realmente e no ta un alternativa pa un convenio como ‘arbeidscontractant’ normal, manera semper gobierno tabata aplica.
Si den e tempo nos dilanti gobierno sinta na mesa cu sector priva pa yega na acuerdo encuanto flexiblisa ley laboral, ta bon pa sa con gobierno mes ta(bata) haci uso di e posibilidadnan di trabao temporal y ‘flexible’, sin contrato laboral regular.
