(EFE) – Corte Constitucional a suspende e terminonan di vencemento di debate di aborto, cu tabata obliga e magistradonan tuma un decision riba si nan tabata saca e delito aki afo di Codigo Penal.
E problema a surgi despues di e peticion di un di e magistrado di Constitucional, Alejandro Linares, cu a declara su mes como imposibilita pa vota despues cu a duna declaracionnan na un medio di comunicacion.
Linares, cu tabata supone cu lo bay vota na fabor di despenalisacion, siman pasa a sigura di forma publico cu Corte tabatin “un chicharon hopi grandi” cu debate di aborto y cu e tabata scucha “multiple opinion” cu tabata pidi pe pa vota na fabor of den contra.
E Sala Pleno mester a vota diahuebs ultimo riba e situacion di Linares prome di tuma un decision pa aborto, pero “na termino di Sala Pleno di awe, tabatin un empate na ora di dicidi e impedimento di dokter Linares”, Corte Constitucional a bisa.
E impedimento lo bay dicidi den un otro reunion di sala pleno y te awor “ta suspende e terminonan tanten e impedimento no ta resolvi”, Corte a agrega.
Un di e dos peticion cu Constitucional tabatin riba mesa tabatin como plaso di vencemento dia 19 di november, pa loke magistradonan mester a pone di acuerdo den e fecha ey, y tabata supone cu hunto cu Linares tabatin otro cuatro magistrado na fabor, pa loke e decision por tabata faborabel.
No ta conoci, cu e suspension di e plaso, ki dia aborto lo drenta back na agenda di Constitucional of ki dia lo tuma un decision, aunke e otro file cu tambe ta pidi despenalisacion di aborto tin como plaso di vencemento dia 20 di januari.
Te awor aborto na Colombia ta permiti solamente cu tres causa, ora ta den riesgo e salud of bida di e mama, ora ta consecuencia di un violacion of incesto, of si tin malformacion di e feto, mientras cu e otro casonan penalmente ta wordo castiga hasta cu cuatro aña y mey di prison.
