E realidad politica di Aruba ta cu Gabinete Wever-Croes ta goberna a base di mentira, engaño y manipulacion di informacion y ta señora Evelyn Wever-Croes mes cu ta lead by example. Señora Evelyn Wever-Croes ta bende Pueblo pa añanan largo integridad, mientras cu e mentiranan ta bira dia tras dia mas fantastico.
Señora Evelyn Wever-Croes ta haci como sifuera cu no tabata tin ningun fantasma den e aparato gubernamental, mientras cu Hues a confirma cu tin fantasma cu nomber y fam, manera nos por lesa den e sentencia y e articulo di Booshi Wever. Señora Evelyn Wever-Croes ta mantene cu Presidentenan di Parlamento Ady Thijsen y Edgard Vrolijk a bin ta hisa e nivel di parlamento, mientras cu Ady Thijsen a atacha e integridad di nos Parlamento den forma asina grave cu Gobernador mester a manda un carta oficial pa e Presidente di Parlamento recapacita pa despues purba di dera e carta aki den un avalancha di documentonan cu a bay pa archief. Gabinete Wever-Croes kier pa nos kere cu ta Hulanda a inventa e recorte di 12.5% den salario, mientras cu nos sa caba cu señora Evelyn Wever-Croes a bay negocia na Hulanda à la ‘braafste jongetje van de klas’. Ora Hulanda a bisa ‘jump’, Wever-Croes a bisa ‘how high’. Ora Hulanda a puntra unda nos tin vet pa corta, señora Evelyn Wever-Croes a bisa: por corta 12.5% den salario di ambtenaarnan y di trahado di e entidadnan di sector (semi) publico. Ora Hulanda a puntra unda mas nos tin vet pa corta, gobierno a bisa ‘den salubridad publico’. Nos por mira esey claramente den e carta di CAft dirigi na prome minister Rutte di dia 24 juni 2020 (kenmerk Cft 202000079, bijlage I). E carta aki ta mustra con Aruba a convence Hulanda y CAft cu tin espacio pa bezuinig riba salubridad publico: ‘De ministerraad van Aruba heeft besloten een door het UOAZV opgesteld bezuinigingsplan uit te gaan voeren.’
E problema ta cu e Tone at the Top cu señora Evelyn Wever-Croes ta set ta infecta henter e Gabinete y hasta parlamento. Señora Evelyn Wever-Croes kier pa henter Pueblo kere cu Hof y Hoge Raad a exonera Minister Endy Croes di tur violacion di principionan di integridad den Fundacion Lotto pa Deporte, mientras cu e sentencianan no ta haci esey at all. Ora ta puntra señora Evelyn Wever-Croes si Fundacion Lotto pa Deporte ta envolvi den e caso di Minister Endy Croes e ta bisa no, mientras tin un vrijwaringsprocedure andando. Ora ta puntra señora Evelyn Wever-Croes pa e maneho pa cu integridad di e aparato gubernamental e ta bisa cu esaki ta secreto, mientras e sa cu e no a laga traha ningun Gedragscode Integriteit, manera Hulanda si tin. Den e reunion di Serlimar minister Ursell Arends a sali ta bisa cu Serlimar no mester di hindervergunning pa e operacion na dump di Parkietenbos, mientras cu ley ta mas cu cla y hasta nos tin un sentencia di hues cu ta confirma esaki. Mester bisa si cu ta tristo cu Gobierno no kier cumpli cu e exigencianan di hues y cu e ciudadano mester laga deurwaarder bay dump cada rato cu sentencia den man pa Gobierno respeta nos leynan. Den un otro reunion publico señora Evelyn Wever-Croes ta bende un otro mentira cu partido AVP den e Dialogo Social di 2014 a firma un protocol pa implementa eigen bijdrage. Cu orguyo parlamentario Marcos Berlis ta core tuma e mentira over y a publica e protocol sin lese na drechi su mes. Nos ta urgi tur hende pa lesa punto 17 y 19 di e protocol bon bon. Enfin, e "Tone at the top" di Gabinete Wever-Croes ta pa grita integridad y na mes momento manipula informacion di e manera cu mas miho ta cumbini politicamente. E tono aki tin e peliger di infecta henter e clima etico di e aparato gubernamental y di e sector semi publico, creando un
ola di mal gobernacion y corupcion.
