Ayera mainta Bureau City Inspector a tene un rueda di prensa na entrada di dump, durante cual Sr. Robby Rosel, vocero di Bureau City Inspector, a elabora ariba e problema di sushedad na Aruba y a recorda tur ciudadano cu e acto di susha camindanan publico di Aruba ta castigabel pa ley.

Temporada di fin di aña ta den porta y ya caba luna di november, Sr. Rosel a indica, a habri cu Bureau City Inspector yen di trabao pa motibo di tanto sushedad cu ta wordo tira na diferente parti rond di Aruba. “Awe nos a dicidi cu nos tin cu yama un rueda di prensa ariba esaki, pa trece na conocemento di cada un di nos conciudadanonan cu Aruba ta wordo asota pa hopi sushedad den mondi y tambe ariba e careteranan”, el a bisa.

Sr. Rosel a splica cu hopi di e sushi cu ta ariba e careteranan di Aruba ta bin door di personanan cu ta transporta sushi pa dump y no ta haci uso di un lona pa tapa e sushi aki. Esaki ta causa cu e sushi aki ta bula y ta cay ariba e camindanan di Aruba – entre otro tayonan di carton, di plastic, cupsnan, boternan di cerbes y diferente articulo cu ta cay ariba caminda.

“Esey ta bin door cu no ta usa un lona ariba e pick up, of ariba e trailer, of ariba e vehiculo di transport cu ta hiba e sushinan aki dump. Mester usa un lona pa tapa esaki pero hopi no ta haci uso di esey. Ya na momentonan cu nos ta akinan, ni pa 10 minuut, ya caba tin mas di ocho auto cu ta drenta sin un lona cu ta tapa e vehiculo cu ta transporta e sushi. Na caminda nos por a mira autonan di diferente companianan cu ta transporta sushi pa dump tampoco no ta usa un lona”, el a señala.

Sr. Rosel a haci suplica, specialmente na e personanan cu ta transporta sushi pa dump cu pick-up of trailer, pa por fabor cuminsa haci uso di lona pa tapa e sushi pasobra lo bay tin control sumamente severo ariba esaki caminda cuerpo policial lo ta repartiendo boet, hunto cu Bureau City Inspector, si no tin lona pa cubri e sushedad.

El a menciona tambe un caso cu Bureau City Inspector mester a atende cune na cuminsamento di siman unda cu e bureau a ricibi un melding cu tin un cantidad di sushi tira den e mondi di Jamanota, cual ta un caminda cu turistanan cu ta bishita Aruba ta frecuenta constantemente.

El a sigui splica cu mesora City Inspector a sali rumbo Jamanota unda cu nan a haya varios saco di sushi y den e sushi nan a haya tres documento cu tabata contene nomber, fam y adres di e personanan cu lo por a tira e sushinan aki. Bureau City Inspector a tuma contacto cu e personanan aki y segun el a informa, e personanan aki a bisa cu nan ta usando companianan chikito pa recoge nan sushi y tira nan na dump, pero esaki no ta e caso.

“E caso ta cu nan ta tira nan den diferente sitionan na Aruba, den mondi y nan ta cobra e placa pa transporta e sushinan. Nos a saca afo for di dos di e personanan cu nos combersa cune cu nan nomber ta ariba e papel y nan tur dos a trese e mesun version. Ora nos a yama e doño di e truck cu ta transporta e sushi aki, e ta desmenti cu e no a haci esey, pero nos ta sigui cu e investigacion y sigur esaki lo sigui den man di polis pa asina por yega na e conclusion”, el a splica.

Sr. Rosel a enfatisa cu e ciudadanonan mester tene cuenta cu e situacion di transporte di sushi di trucknan chikito, hendenan cu ta transporta sushi. City Inspector ta hayando hopi di e casonan aki y el a haci peticion na personanan cu ta haci uso di compania pa transporta sushi, pa pidi prueba di e servicio cu ta wordo duna di parti di compania pa asina evita cu boet lo por yega pa e personanan aki.

“Nos ta pidi pa esnan cu ta haci uso di companianan chikito pa transporta sushi pa pidi nan recibo pasobra si nos haya documentonan di personanan den mondi, ya nos decision a wordo tuma cu ora nos haya e documentonan aki den mondi, nos no ta yama, pero lo reparti un boet de inmediato di City Inspector hunto cu cuerpo policial”, el a agrega.

Siguiendo ariba e topico di sushedad, Sr. Rosel a ricibi e pregunta ariba e situacion di Serlimar cu e bakinan di sushi pa e sushedad den e barionan. El a splica cu e tabatin un combersacion cu directora di Serlimar ariba e topico di sushedad den bario y cu a toca e topico di bari di sushinan y tambe e sushedad di casnan cu riba diadomingo e personanan kier tira nan sushinan afo. “Nos a compronde cu pronto lo bay tin un solucion pa esaki. Ki dia, mi no por bisa sigur pero lo bay tin un solucion y e resto lo keda den man di Serlimar pa papia di dje”, el a bisa.

E acto di sushamento di areanan publico di Aruba ta castigabel pa ley y Sr. Rosel a elabora tambe ariba tres articulo den ley cu ta enfoca specificamente ariba sushamento di camindanan publico. Articulo 15 ta bisa cu na momento cu awanan suhsi, entre otro awanan di pos, esey tambe ta castigabel pa ley. Articulo 16 ta bay ariba e punto di tiramento di sushi ariba caya, cu mas cu claro ta castigabel, y articulo 17 ta enfoca specificamente ariba transportacion di sushi. E sushi di cas mester ta tapa cu lona pa esaki no bula y susha e careteranan di Aruba.

“Esey ta e tres articulonan di ley cu ta duna bo automaticamente un boet si no cumpli cune. Esaki no ta solamente pa temporada di fin di aña pero e lo keda constantemente”, el a agrega.

Sr. Rosel tambe a splica cu hopi biaha Bureau City Inspector ta haya casonan cu no ta directamente pa City Inspector pero cu nan ta bay wak, manera por ehempel casonan den e parti di Sanidad cu ta cay bao di DVG. El a indica cu City Inspector ta pasa e caso directamente pa e departamento concerni, nan ta traha un rapport di e caso y di eynan e departamento concerni mester termina e trabao.

“E cooperacion ta bon entre e departamentonan. Nos ta haci trabao den termino di cinco dia pero si e mester cana su caminda e ora automaticamente nos tin cu pasele pa e departamento concerni”, el a bisa.