(Reuters) – Gobierno di Mexico ayera diaranson a anuncia e despliegue di 1,500 efectivo di Guardia Nacional na Cancun y su areanan rond pa enfrenta e crimen organisa, despues di varios incidente violento cu recientemente a causa impacto den e imagen di e destino turistico popular aki na peninsula di Yucatan.
Na luna di october un turista Canades a muri den un tiramento entre gruponan criminal di Tulum, famoso pa su beachnan y su sitio arkeologico Maya, na comienso di november un incidente arma den cual dos narco a muri a sembra e miedo den e zona hotelero di Cancun.
“Den par di dianan mas, un siman, lo mobilisa cerca di 1,500 efectivo di Guardia Nacional pa Quintana Roo”, e presidente Andres Manuel Lopez Obrador a bisa den un conferencia di prensa, cu a ser celebra den municipio aki na sur di Mexico, cu tin dos teritorio turistico.
Hunto na e gobernante, e secretario di Defensa, Luis Sandoval, a detaya cu e presencia di e patruya nobo lo ta permanente y lo ta basa den un trabao intenso di inteligencia, pa evita chokenan cu tiramento entre uniformado y criminalnan na espacionan cu bishitantenan local y stranhero.
“Nos tin mester cu den un area asina importante di turismo no lo ta e forsa esun cu por wordo mira na prome luga, sino cu inteligencia cu lo genera lo hiba na realisa accionnan di manera coordina, limpi, sin genera un efecto violento riba e area”, el a splica.
Autoridadnan Mexicano ta hiba mas di un decada cu ta luchando contra crimen organisa, cu ta sigui causa cifranan halto di homicidio na e pais. Te september pa e causa aki a fayece 21.495 persona, un promedio di casi 2.400 pa luna.
