Lionfish, un pisca bunita pero peligroso pa ecosistema marino

Lionfish tin su origen na ocean Indico y Pacifico cu a extende su presencia entre e costanan di Florida y nort di Brasil, tambe ta un especie di pisca bunita pero cu ta pone den peliger e ecosistema di e costanan di Caribe y rond di dje.

Na Aruba tin varios fundacion cu ta encarga di busca piscanan di especie aki cu ta uno depredador y ta invadi lama comiendo e webonan di otro piscanan na unda e ta e responsabel di disminucion di otro especienan den e area, hunto cu contaminacion y calentamiento global.

E pisca aki a wordo mira pa prome biaha na e costanan di Florida na aña 1985 y ya caba na 2001 a establece na lo largo di e costa west di Merca, tabatin personanan cu tabatin e piscanan aki den aquarium pero a laga nan los pa motibo cu Lionfish tabata come tur piscanan y no tabata logra cubri tur e cuminda cu Lionfish tabatin mester.

Eynan e preocupacion a cuminsa pa via di loke tabata sosodiendo den aquarium na unda cu esey tambe ta tuma luga den un scala grandi den area di Caribe y Aruba mes cu ta menasa pa yega te ocean Mediteraneo.

Tambe ta existi un otro teoria tocante Lionfish cu ta indica cu algun personanan a libera nan cu tur intencion cu un fin comercial y hasta horcan Andrew cu a lastra te lama un cantidad grandi di piscanan cu tabata den aquariumnan door di inundacionnan.

Esaki ta nifica cu tin miyones di Lionfish cu ta circula den e corientenan di lama, loke pe ta supone un potencial halto di propagacion.

E reproduccion di Lionfish ta increibel, actualmente e ta surpasa e cantidad di piscanan na hopi luga y nan ta cuatro biaha mas abundante den nan areanan di origen.

Pa trapa nan ta resulta un poco dificil pa motibo cu e ta biba den awanan profundo den lama pa loke basicamente personanan cu tin experiencia como buceadonan por yega na e pisca aki.

Na Aruba fundacionnan como Aruba Lion Fish Initiative Foundation, Caribbean Lionfish Alliance, Aruba Reef Care Foundation y diferente buceadonan profesional como Patrick van Brakel di Hunting Lion Fish riba Youtube ta caza Lionfish pa asina contribui na e problematica di minimalisa e cantidad di Lionfish cu e diferente area di Aruba por tin.

E pisca aki ta caracterisa pa motibo di su apariencia pero loke e hende no sa ta cu e ta hopi saludabel,  tin Omega 3 y su aletanan cu no tin spina, ta yen di carni y manera a wordo mira riba rednan social, algun usuarionan ta menciona cu “e ta hopi dushi pa come”.

Pero tambe su beyesa straño ta hala atencion cu su aletanan cu por causa dolornan fuerte y incluso hasta paralisis y si cazadonan ta wordo mordi pa un Lionfish nan por haya hopi dolor, sacamento y hasta problemanan respiratorio, su 18 aleta ta un herment di defensa.

Lionfish ta un pisca cu ora e ta wordo caza e por caba riba un tayo di cushina como parti di un cuminda special di un restaurant como hamburger, ceviche of kibilin cu ta keda como nuggets, manera ta wordo bendi na e negoshi di van Brakel.

Caribbean Lionfish Alliance den un ultimo update cu nan a publica riba nan rednan social a señala cu den ultimo 7 siman nan a logra haya mas di 376 Lionfish y cu den total nan a logra trapa e cantidad di 2106.

Lionfish su stoma por wordo expande 30 biaha su tamaño y ta p’esey e motibo cu ta come hopi, loke ta representa un menasa pa otro especienan depredador cu no por caza nan mesun cuminda, e ta consumi 50 especie di piscanan incluyendo esunnan di mas importancia economico y ecologico, tambe ta supone un desekilibrio importante di e ecosistema, rifnan y coralnan.

Su unico menasa na e momentonan aki ta e mesun humano y e necesidad di busca nan y mata nan ta birando un prioridad urgente, gruponan di conservacion y hasta industrianan dedica na piscamento ta considera cu e caza di especie invasor aki ta e unico manera efectivo pa reduci nan expansion.

Potretnan cortesia di Patrick van Brakel.