Sindicatonan den conferencia di prensa: Gobierno ta mal informa pueblo…‘Pasobra ya prome cu a sinta cu nos, nan a dicidi caba’

Despues di un conferencia di prensa di Gobierno di Aruba na unda prome minister Evelyn Wever-Croes a trece dilanti e topico di sindicatonan y e recorte di 12.6% pa sector publico y semi-publico, ayera atardi un grupo di sindicatonan a reacciona riba esaki.

Josephine Albertus presidente di Sindicato di Maestro di Aruba (Simar) den representacion di e grupo cu a firma e carta pidiendo cerca gobierno un reunion a splica cu ora nan a tuma nota di e conferencia di prensa di gobierno unda a duna informacion riba e recorte di 12.6% “nos a keda babuca y nos ta lamenta con gobierno ta bin y mal informa pueblo riba tur cos”.

Manera el a menciona, 13 di maart di aña 2020 Aruba a registra e prome caso di Covid-19 y despues di esey a bin cu diferente reto, 17 di april algun sindicato a haya un yamada di gobierno pa asina nan por reuni riba e retonan cu tin y na unda gobierno a bin dilanti cu e recorte di 12.6%.

E siguiente reunion tabata dia 22 di april segun Albertus a indica y den un carta gobierno a bisa nan cu ta hopi contento cu nan a sinta pa por bin cu un solucion “cu nos por bisa cu e no a bay asina, pero esey ta loke nan a duna nos”, el a comenta.

Segun Albertus gobierno a expresa cu Hulanda a bin cu e recorte di 12.6% y cu no ta Aruba pero “si bo a tuma nota di diferente rueda di prensa na Hulanda y comunicadonan den hopi di nan a tende cu ta Aruba ta esun cu a pone e 12.6%” .

Actualmente na Sint Maarten den Corte dia 1 di november ultimo a bin cu uitspraak y den dje ta wordo bisa cu ta e Gobierno di Aruba a bin cu e recorte di 12.6% y 12.5% ora Hulanda a acepta y a implementa esaki pa tur tres isla cu ta Aruba, Corsou y Sint Maarten.

Asina mes, el a bisa cu gobierno kier culpa sindicato pa e palabra ‘tot nader order’ na unda cu dia 20 di mei di aña 2020, prome minister Evelyn Wever-Croes mes a saca un carta cu ta wordo bisa cu den ministeraad di 17 di april di 2020 a wordo dicidi cu lo bin cu un recorte di 12.6% na unda cu tambe den mesun carta a dicidi cu ta ‘tot nader order’.

“¿Con por ta cu ta bisa cu ta sindicato a duna tot nader order si akinan den e carta caba gobierno ta bisa cu desde 17 di april a bin cu e decisionnan? ” Albertus a señala.

Ta p’esey cu Albertus a trece dilanti cu ora gobierno ta bisa pueblo cu tur cos a bay conhuntamente cu sindicato, “gobierno ta mal informa pueblo pasobra ya caba prome cu a sinta cu nos nan a dicidi caba”, el a sigura.

El a comenta cu den un comunicado di 17 di april nan a declara cu nan no ta di acuerdo cu e manera con gobierno ta bin y impone unilateral, riba corto plaso, riba sindicatonan, den e comunicado no ta bisa cu nan no ta dispuesto pa yuda mirando e situacion di crisis cu tin y despues di esey dia 18 di april nan a manda un carta na VNO indicando esey, pero subrayando e manera con gobierno ta bin impone riba nan.

Nan como sindicato mediante varios carta a pidi gobierno transparencia na unda cu den un Afkondigingsblad van Aruba number 108 su articulo 8 ta bisa cu gobierno lo saca despues di seis luna (januari 2021) un resumen di loke a wordo aporta door di sector publico y semi-publico riba e parti di recorte pa motibo cu a pasa un ley di recorte pa e sector publico y a pidi e companianan semi-publico pa ta solidario.

Albertus a comenta cu dos siman pasa ora nan a reuni cu gobierno nan a haya como contesta cu nan mester busca riba Google pa motibo cu nan a publica tur cos, aunke tambe nan a manda varios links unda cu sindicatonan a haya Uitvoerings Rapportage di kwartaal 1,2 y 3.

“Pero den e kwartaalnan aki bo no ta haya ningun informacion riba e suma di placa cu nos a genera door di corta e 12.6, ta papia si di cuanto companianan estatal a genera, di belasting cu a wordo genera, di e boetnan cu a wordo paga, di cierto generacion di placa pero e parti cu nos kier sa cu ta e 12.6% cu sector publico a entrega, esey no ta para den Uitvoerings Rapportage”, Albertus a bisa.

El a indica cu nan tin 20 luna cu ta entrega y ainda nan no por a haya un resumen , cu nan como sindicato cu ta representa e humilde trahadonan cu ya caba pa 20 luna ta entregando parti di nan salario ta pidi claridad.

Bon Dia Aruba a puntra si nan lo duna un ultimatum na gobierno pa stop e retencion di 12.6% of si nan lo sigui na mesa, pa cu esaki Albertus a contesta cu nan meta di ayera “tabata pa informa pueblo na manera cu mester ta sin troce e berdad, sin bira palabra pa mustra nan y nos por bisa cu e mesun meta ey cu nos tin pa na momento cu nos ta haci e yamada di pueblo pa nan por ta cla, pasobra nos no ta para akinan pa bisa ki dia nos ta bin cu ultimatum, loke nos ta bin awe ta pa trece claridad y transparencia y despues di esaki nos lo sigui cana nos caminda pasobra nos no ta bay sinta y acepta pa sigui entrega pa lunanan mas sin haya transparencia y sin haya claridad”, el a bisa.

Prome minister Evelyn Wever-Croes den conferencia di prensa di dialuna ultimo a expresa cu “net esunnan cu ta traha den sector semi-publico ta gana mas cu sector publico, si net eynan nos ta haya dolor di cabes, nos ta cambia e ley y asina ta conta pa tur hende”, referiendo na e declaracion aki Bon Dia Aruba a puntra Erick Henriquez di Sindicato Independiente di WEB Aruba (SIWA) kico ta e reaccion di nan tocante esaki pa loke el a enfatisa cu “tin un cos akinan cu no ta cuadra, unda cu a mi ta traha no ta tur hende ta gana e placa manera cu e ta pensa, a mi ta representa e vloer, e vloer no ta yega ni na e pia chikito di e grandinan, mi ponencia ta masha simpel, e ley nos pidi’e pa bin cune caba pasobra si el a bin cu e ley no tabatin e shete of diesun so compania cu a contribui sino tur, esey ta gewoon un menasa y riba un menasa nos no tin cu bay asina y si ta asina nos ta deal cu otro nos ta fout bezig” Henriquez a señala.

Asina mes el a sigura cu nan ta contribui cu pueblo pero e inhusto ta cu no ta tur ta contribui, manera el a menciona den e Uitvoerings Rapportage cu gobierno mes a trah’e algun companianan so a aporta, “ban pone e cos manera e mester ta, of ta tur of ni un” Henriquez a finalisa.