Recientemente Minister di Husticia y Asuntonan Social, Sr. Rocco Tjon, a tene un bishita na Departamento di Asunto Social (DAS). Durante e bishita aki Minister Tjon a mira e trabaonan di e departamento aki, e importancia di esakinan y tambe a tuma nota di e retonan cu e personal di e departamento ta encontra.
Durante e bishita minister a ricibi splicacion extenso di e diferente seccionnan cu DAS tin y e diferente servicionan cu nan ta ofrece. El a remarca na momento cu el a papia cu tur e trahadonan di e departamento, e tabata hopi impresiona cu tur e trabaonan cu nan ta realisa a pesar di tin tiki recurso pa nan por eherce esaki.
Segun Minister Tjon a indica, e bishita tabata importante pe pasobra hopi biaha DAS ta conoci como e departamento cu ta brinda e ayudo di bijstand na esunnan cu tin mester di dje, pero en realidad e ta un organisacion hopi mas dinamico y cu ta brinda hopi mas servicio. “Bo tin hopi profesionalnan tambe ta traha akinan, trahadonan social, psicologonan, ortopedagogonan, screeners, intakers y e tabata pa mi hopi informativo di por a combersa cu nan awe y scucha di nan mes kico ta e retonan cu nan ta wordo confronta cune”, el a bisa.
Dentro di poco e plan di maneho di e Ministerio di Asuntonan Social di 2022 pa 2025 lo mester wordo presenta y segun Minister Tjon a bisa, e ta haya hopi importante pa e trahadonan mes tambe por brinda nan ideanan pa asina wak con por incorpora esakinan den e plan di maneho cu su ministerio mester presenta.
Departamento di Asuntonan Social como organisacion tin hopi reto cu e enfrenta y un di esakinan ta e scarsedad di personal. Minister Tjon no a elabora ariba posibel solucionnan pa e problema aki, pero si el a menciona cu mirando cu Sociaal Crisis Plan tabata consisti di diferente proyectonan cu ta fortifica e ayudo social cu ta wordo brinda na e comunidad, Gabinete Wever-Croes II a opta pa den presupuesto 2022 percura pa e prolongacion di e diferente contractnan aki pa asina tambe por tin continuacion di diferente programanan cu a forma parti di e Sociaal Crisis Plan.
Minister Tjon a señala tambe e proyecto cu a wordo presenta door di full e team di maneho di DAS ta e parti di Collaborative Partnership. “Manera e profesionalnan mes ta indica, e proyecto aki ta un proyecto cu sigur a mustra di ta di balor agrega pa e yudansa cu Directie Sociale Zaken den e caso aki ta brinda na 58 famia aworaki, y si bo wak con esaki ta practicamente ta mehora e bida di e famianan e ta sigur algo cu nos lo kier continua cune”.
Minister Tjon a enfatisa cu DAS, manera tur organisacion ta wordo confronta cu diferente retonan, lo ricibi e apoyo di e Ministerio di Asuntonan Social y tambe e asistencia necesario, no solamente e parti financiero, pero den e parti tecnico pa e diferente programanan cu DAS ta ofrece na su clientenan. “Dentro di poco tin diferente proyectonan lo bay wordo anuncia tambe, manera introduccion di un digital loket pa loke ta e parti d bijstand”, el a agrega.
Por ultimo Minister Tjon a remarca cu el a ricibi un update ariba e renobacion cu ta andando pa loke ta trata e edificio di Departamento di Asuntonan Social na Lagoon, un proyecto cu a wordo inicia door di Minister Glenbert Croes y cu a traha hopi duro pa esaki ta un realidad. El a splica cu fase uno di e renobacion ta kedando cla, fase dos dentro di poco lo cuminsa y fase tres ta den full preparacion pa cuminsa na momento cu fase dos keda cla. El a indica cu si tur cos bay bon pa fin di otro aña Departamento di Asuntonan Social lo tin un infrastructura completamente nobo y el a subraya cu pa loke ta e organisacion mes lo sigui haci inversionnan necesario den futuro.
“Mi kier a manda un palabra di pabien na tur e trahadonan, mi a keda echt impresiona di wak tur e casonan cu nan ta atendiendo cune, for di e departamento di guia social, di bida y famia, di bijstand, tambe den e parti cu nos conoce como abogado liber, hopi caso nan ta atende cune y mirando e scarsedad di personal cu nan tin mi ta kere ta di aplaudi pa wak e trabao grandi cu nan ta haci”, el a agrega.
Directora di Departamento di Asunto Social, Sra. Glenda Hernandez tambe a dirigi algun palabra pa loke ta trata e bishita di Minister Tjon na e departamento y a splica tambe kico e departamento ta spera di parti di e Ministerio di Asuntonan Social. “Mi ta hopi agradecido cu minister a tuma e tempo pa wak tur e diferente edificionan, e trabaonan cu ta wordo haci door di e diferente seccionnan”, el a bisa. “Mi ta wak e tambe como un oportunidad pa nos bay traha hunto mas di cerca, hunto cu husticia, y mi ta wak esey como un oportunidad cu nos por bay den e caminda ey”.
Sra. Hernadez a indica cu DAS ta wardando ariba e plan di maneho pa cu esaki pa asina e departamento por dal e siguiente stap y subi nos na e siguiente nivel cu e organisacion. “Kisas wak aworaki kico nos por drecha pa loke ta trata cosnan interno y externo, paden cu personal y pafo tambe cu cliente, ki sorto di servicio nos cliente kier pa nos brinda, pero tambe wak paden ki sorto di acogida mas nos por duna nos personal pa nan por acapara y haci e trabao cu nan ti cu haci cu ta hopi pisa”, el a indica.
El a enfatisa tambe cu no ta solamente DAS ta enfrentando retonan cu e trabao pisa pisa, pero henter e veld social ta sinti cu tin un necesidad pa sosten. El a indica tambe cu nan ta hopi contento di tende cu cierto proyectonan di e Social Crisis Plan no ta proyecto mas pero servicionan grandi cu lo bira parti di maneho na un cierto momento.
“Esey ta hopi bon paso nos ta bisa tur e esfuerso cu a bay aden, e no ta bay perdi. Semper mi a bisa, pa bo drecha locual bo tin cu drecha, bo tin cu bo tin cu inverti mas cu cuater aña ariba tereno social y esey nos ta haciendo aworaki. Ami ta wak den e servicio cu nos tin cu brinda hendenan cu tin mester di ayudo y cu no ta wordo yuda door cu tin discrepancia den vision of e manera di traha. Nos ta purba toch di yega na e integracion di vision ey pa nos por brinda un miho servicio pa nos clientenan”, el a agrega.
