Prome Minister Evelyn Wever-Croes dialuna mainta, durante Conferencia di Prensa di Gobierno di Aruba a elabora riba e contenido di e Landspakket y specialmente riba e tema di Reforma Fiscal.
Cada kwartaal ta traha cu un agenda di ehecucion y den agenda di e di 4 kwartaal cu a wordo publica di e Landspakket, ta para cu awe, dialuna 15 di november ta un fecha importante pa loke ta trata reforma di impuesto. Wever-Croes a duna di conoce cu Gobierno no ta introduci BTW awe manera algun persona a pensa. Pero si Wever-Croes a anuncia cu Gobierno a tuma e decision pa bin cu reformanan den nos impuesto. E cambionan aki ta inclui BTW cu lo bin cune y rebahonan di otro impuestonan. E cambionan aki ta bay wordo introduci na 1 di Januari 2023. “Esaki ta duna nos 14 luna pa prepara pa e cambio no solamente den ley pero pa papia y dialoga cu stakeholders pa tur hende ta prepara pa 1 di Januari 2023 cu e cambionan aki por drenta na vigor”.
Cu e cambionan aki ta bay move di impuesto directo pa impuesto indirecto haciendo e sistema di impuesto mas husto y mas senciyo. Den esaki a tene cuenta tambe pa haci cambio den e ley riba winstbelasting pa asina haci Aruba mas competitivo pa por atrae mas inversionista y pa nos inversionistanan local, e impuesto por baha poco. Tambe ta tene cuenta pa baha e peso di impuesto riba nos ciudadanonan specialmente nos pensionadonan.
Aworaki cu e prome decision di Gobierno a wordo tuma, ta bay sigui e consultanan cu stakeholders pa nan por duna nan opinion riba e diferente propuestanan. “Unabes nos scucha di nan nos por bisa den ki direccion nos por bay cu cada un di e cambionan aki.
“Cu tur esaki nos a cumpli cu e landspakket, hopi calculacion a wordo haci y mi kier gradici nos comision di reforma fiscal pa tur e trabaonan haci te awor”, Wever-Croes a termina bisando.
