Diahuebs 4 di november 2021, minister di Transporte, Integridad, Naturalesa y Asuntonan pa Adulto Mayor, Ursell Arends tabata di bishita na Directie Natuur en Milieu (“DNM”). Den un reunion cu director, Sr. Gisberth Boekhoudt a discuti varios punto di atencion y situacion actual pa loke ta trata nos naturalesa y medio ambiente.
Alabes Arends a cera conoci cu henter e personal y a ricibi un bon bista di con e departamento ta funciona.
Puntonan di importancia pa Arends tabata entre otro Maritiem Beleid (Marine Park), Derecho di Naturalesa (Rights of Nature), y tambe areanan protegi cu a wordo acorda hunto cu DNM pa asina por sigura un maneho efectivo. Segun un comunicado di gobierno, DNM a bin ta desplegando un tremendo trabao pero ainda tin hopi reto como tambe leynan y regulacion pa atende, pa por realisa e metanan stipula. Den esaki Arends a indica di lo traha hunto cu DNM pa asina logra introduci maneho efectivo den cuadro di naturalesa y medio ambiente.
Segun e comunicado, Arends durante campaña a enfoca riba e importancia cu derecho di naturalesa tin riba e calidad di bida pa tur esnan riba Aruba, referiendo na e importancia di balansa “welvaart y welzijn”, esta progreso economico y bienestar general.
Cu bishita di colega Minister Wever tambe na reunion di United Nations COP26, gobierno di Aruba ta señala su compromiso cu e meta di desaroyo sostenibel. E tratado di Paris 2015 no ta ratifica ainda pa Aruba, pero Aruba su politica di energia – cual pronto lo wordo publica – lo ta conforme e obhetivonan di e tratado di Paris, y e intencion ta pa e tratado di Paris wordo ratifica pa Aruba tambe, algo cu DNM tambe ta propone y Arends ta sostene.
“A yega ora pa duna nos naturalesa y medio ambiente e balor y respet cu e merece”, Arends ta opina, señalando un cambio den mentalidad y e ideologia anticua di desaroyo a costo di naturalesa. “Sin naturalesa no tin bida y cu bon guia desaroyo facilmente por bay man den man cu naturalesa. Esey ta nos responsabilidad pa futuro generacionnan”.
