Salba Serlimar ta un cos…Maneho integral ta otro…

E asunto di Serlimar actual ta hiba nos di regreso na e debate cu tabatin algun aña pasa, unda no tabata trata solamente di futuro di e compania estatal, sino di e maneho general cu gobierno lo mester a hiba encuanto henter e asunto di recoge, procesa y finalmente deshaci di desperdicio. E tempo ey, e debate tabata tocante e preferencia di e ministro encarga cu e asunto, cu tabatin su decision tuma caba: Aruba ta bay haya un incinerator grandi, financia pa inversionista di su eleccion, y cu lo a significa un peso grandi cu tabata por bay den direccion di 500 miyon florin. Esey aparte di e cantidad di pregunta cu tabatin pa e manera con ta atende desperdicio special, por ehemplo te unda lo por a inclui reciclahe di cierto material den e proceso general di recoge y procesa desperdicio.

Manera por a spera, a surgi e discusion pakico ta opta sin mas pa kima practicamente tur desperdicio, mientras cu tin otro alternativa, por ehemplo exportacion di gran parti di e desperdicio, como combustible pa paisnan den region cu ta usa esaki pa forno industrial na escala grandi. Un ehemplo di esaki ta industria di cement. E debate a bira un bataya, y un parlamentario cu a nenga di sigui ‘orden’ di su partido pa vota pa e incinerator di e ministro cu tabatin henter e partido di coalicion grandi como su rehen, a opta pa sali di e partido y declara su mes independiente. Perdida di su voto a percura en todo caso pa paraliza e plannan pa e incinerator y tur cos rond di esaki. Banda di e asunto di e incinerator chikito, cu ta operando of no, a bira keto riba e tema aki. Esey no ta asina straño, pasobra mientras tanto e gobierno di coalicion ey a manda su mes cas, mientras e ministro diligente den e asunto aki ta bao investigacion penal y su partido a bay cementerio di partido politico di e isla aki.

En todo caso, nos a scapa di e aventura di un incinerator, di cual nos por a sa con e lo a cuminza pero no con e lo caba. No a haci nada mas riba e tereno aki. Esey tin como consecuencia cu ainda nos ta sinta cu un sector di cual nos no sa kico ta bay haci, pa e simple motibo cu ta desconoci kico gobierno tin pensa di haci riba e tema general, y mas cu tur cos riba e puntonan clave, cualnan ta: kico haci cu Serlimar, kico lo ta e maneho principal di desperdicio (kima, exporta, recicla), y kico ta haci cu Parkietenbos? Mirando con cos a bay te awor nos tin e temor cu den e proximo añanan tampoco no ta sucede nada, ni den sentido di formula un strategia sensato y tampoco den percura pa financiamento necesario. Loke probablemente lo bay sucede awor ta un tactica di continua ‘kicking the can down the road’, sin tuma ningun decision den ningun di e temanan clave menciona.

E continuacion di e maneho indeciso aki tin su motibonan tambe den maneho general di gobernacion, cu ta orienta, segun nos opinion, riba atrasa mas tanto posible e programa di restauracion acorda cu Hulanda, y mientras tanto purba deal lo mihor posible cu e decisionnan grandi, segun cu nan yega na mesa, pa por maneha y canalisa malcontento y protesta for di comunidad cu lo bin sin duda. Es mas, tin di nan t’ey caba, manera malcontento di empleadonan publico (corte di 12,6%) y den enseñanza pa via di e austerisacion di 11 miyon anuncia. Tambe ta birando realidad e austerisacion den AZV cu un aportacion propio y posible cambio den e paquete di servicio di salud. Pero tin hopi mas na caminda, y den e ambiente di trabao aki ta bira dificil pa crea mas punto di conflicto cu no ta ni parti di e lista largo di asunto cu mester atende pa cumpli cu implementacion di COHO.

Contemplando tur esaki e pregunta ta bolbe: pero kico haci cu Serlimar? Ta mas cu logico cu e pregunta no ta, manera nos a hay’e presenta den e dianan aki, di un simple escogencia di laga e compania bay bancarota o continua e ‘surseance van betaling’. Laga nos ta bon cla den esaki: si e compania bay bancarota mes, gobierno lo mester lanta un nobo? O nos mester supone cu ta laga henter Aruba cu e lema ‘sálvese quien pueda’ y cada ken busca su solucion? Nos no por kere cu nos gobernantenan ta yega na tal grado di iresponsabilidad cu nan ta busca un salida den e direccion ey. Si ta asina, anto opta abiertamente pa loke ciudad di Santiago de Chile a haci varios aña pasa caba, y esey ta privatiza henter e asunto. Nos no ta bisa cu necesariamente esey mester ta e solucion cerca nos, pero ta bira tempo si pa nos mandatarionan cuminza sali cu un plan completo kico tin pensa di haci. Y den esey ta recomendable pa nan corda cu e problema mas grandi di Serlimar ta: con pa cobra… Esey ta full den man di gobierno(nan), cu tin mas di 10 aña ta coriendo pa e solucion logico: cobra via factura di WEB of Elmar. Ta kier mes nan no kier…?