Durante un conferencia di prensa di ayera dialuna, prome minister Evelyn Wever-Croes a splica con e maneho di Gabinete Wever-Croes II ta organisa na e momentonan aki na unda cu el a sigura cu e ta un continuacion di Gabinete Wever-Croes I.

Esaki a bin dilanti pa motibo cu Bon Dia Aruba algun dianan pasa a puntra tur minister di Gabinete Wever-Croes II con nan bureau ta conforma na e momentonan aki, si tin asesornan profesional of personal auxiliar, por ehemplo, y si tin mas cu 25 persona cu ta e cantidad maximo pa cada minister por tin den nan bureau.

Prome minister a bisa cu ora nan a drenta den gobierno na aña 2017 no tabatin ningun structura pa loke tabata trata e personal cu tabata traha cu un minister, cada minister tabata dicidi ken tabata traha cune, cuanto hende y cuanto mester a paga pa nan.

“Asina hendenan cu tabata haci e mesun trabao tabata haya diferente pago, depende di cierto circunstancianan, pero nada tabata documenta y nada tabata oficial”, el a indica.

Ta p’esey cu el a sigura cu ora nan a drenta na gobernacion nan a dicidi di organisa e bureau di ministernan pa motibo cu no por tabata asina cu henter gobierno tabata organisa y unda ministernan tabata traha mes no tabata organisa.

Den e conferencia el a indica cu un organograma con un ministerio ta hinca den otro den general, tin minister cu su conseheronan Inhoudelijk & Juridisch cu ta depende por ehemplo, den caso di prome minister cu ta representa Infrastructura, e mester di un consehero riba e tereno aki ademas di conseheronan huridico, asina mes tambe ta conforma di un begroting coordinator pa trata temanan di presupuesto, chef di bureau unda el a sigura cu su persona mes no tin mester di dje den su bureau pero otro ministernan por tine si nan ta hay’e necesario.

El continua splica cu tambe tin mas funcionnan como bode, persoonlijk beveiliger/chauffeur, secretariele en administratieve ondersteuning, communicatie-medewerker, consulent dienstverlening $ informatievoorziening.

Igualmente den un otro organograma a trece dilanti e scalanan usual den gobierno, aparte di esey tin algun funcionnan cu lo por haya un toelage pa auto of pa telefon y e ter beschikkings-toelage di 25% pa motibo cu un persona cu ta traha den bureau cu un minister mester ta disponibel 24/7.

Tocante cuanto persona ta traha den oficina di minister, prome minister a comenta cu nan a palabra cu den maneho di 2017 nan ta limita na 25 persona pa cada ministerio, te dia 11 di november Ministerio di Asuntonan General, Innovacion, Organisacion di Gobierno, Infrastructura y Desaroyo Teritorial ta conforma pa 16 persona, Ministerio di Finanzas y Cultura 15 persona, Ministerio di Husticia y Asuntonan Social 20 persona, Ministerio di Salubridad Publico 22, Ministerio di Transporte, Integridad, Naturalesa y Asuntonan di Adulto Mayor 16, Ministerio di Enseñansa y Deporte 10, Ministerio di Asuntonan Economico, Comunicacion y Desaroyo Sostenibel 9 y Ministerio di Labor, Energia y Integracion 25 persona.

“Cu esaki mi kier duna e transparencia cu a wordo pidi na nos pa duna den con organisacion di ministerionan ta hinca den otro” prome minister a expresa.

Ademas, el a trece dilanti cu ora nan a drenta den gobernacion no tabatin nada na ordo y el a pone como ehemplo, cu el a tuma over un payroll di ex-prome minister Mike Eman cu den su salida tabatin 147 hende riba su payroll y prome cu esey el a yega te un cifra di 300 persona, segun el a sigura.

E informacion aki tambe a wordo comparti cu sindicato y parlamento manera prome minister a declara, “nos no ta traha cu un cantidad grandi di persona, nos ta wordo tilda hopi biaha di nepotismo, nepotismo ta ora bo ta tuma hopi biaha hende den servicio sin importa nan preparacion of sin cu bo sa cu nan ta haci e trabao, bo ta tuma nan simplemente pasobra bo conoce nan y nan ta amigo of sostenedo”, el a bisa.

Tambe, el a menciona cu ekipo di ministernan ta bon prepara y cualifica, cada minister por busca pa yudel’e den areanan cu tin mester di ayudo y esaki “ta bayendo bon”, el a finalisa.

Di mesun manera, Bon Dia Aruba a haya como contesta via e-mail cu Gabinete Wever-Croes I a bin cu un maneho pa structura y limita e cantidad di personal cu ta traha na oficina di e ministernan, esaki pa eleva e calidad di trabao di e oficina y pa baha gasto.

“Cu esaki a pone un fin na malgastamento di placa y nepotismo (duna empleo na un persona solamente pasobra ta un famia, amigo of sostenedo). Door di limita e cantidad di personal, e minister por emplea solamente esunnan cu tin e preparacion pa ehecuta e trabaonan, y cu ta dispuesto pa eherce e trabaonan 24/7”.

Mes momento e restructuracion di cada oficina ta delinea cual funcionnan tin disponibel y ki salario ta coresponde cada funcion.

E nota di maneho aki tabata e prome decision di Gabinete Wever-Croes I y a fungi como guia durante e ultimo 4 añanan.

Pa loke ta e cantidad di personal na cada oficina, Joally Croes PR di prome minister a bisa cu na e momento aki e total pa cada oficina di minister ta asina (por varia durante aña, cu hendenan cu ta bin of bay pero no por ta nunca mas di 25).

“Tur ta personanan cu ta encarga cu un trabao, y a wordo encarga cu e trabao debi na nan preparacion y experiencia. Algun ta toca e minister na famia, den caso di nan experticio y confiansa cu e minister tin den nan, e gran mayoria no ta toca e minister na famia”.

Algun ta “hand picked” otronan a pasa un procedura di selectie en werving.