Miguel Mansur ta desapunta den e imagen di integridad di Minister Arends: Rapport PAHO, falta di disponibilidad pa baha debe di Serlimar na belasting ta ilustrativo

Lider di Accion21 Miguel Mansur ta sorprendi pa e hecho cu e Minister nobo di Integridad y Naturalesa, Sr. Ursell Arends a declara di no tabata sa di e rapport di PAHO pa loke ta e peliger pa salud cu dump di Parkietenbos ta representa. Esaki a bin dilanti durante e ultimo reunion di Parlamento unda e Minister a bin pa ilustra e situacion di Serlimar.

Miguel Mansur a bisa cu e no por kere cu e Minister no tabata conoce e rapport di PAHO. “Mi ta sigur cu e Minister a ricibi e rapport aki, pasobra ami tambe a hay’e,” Mansur a ilustra.

Pa colmo, e Minister a bolbe den e segunda tanda di e reunion pa bisa cu e rapport di PAHO mes a recomenda un incinerador. “Y esey no ta berdad. PAHO a recomenda pa cera dump inmediatamente,” Mansur a ilustra. “E dump ta mucho cerca di aeropuerto segun normanan internacional, ademas.” E Parlamentario tambe a señala cu e plamamento di e slib (of sludge) ta atrae parha cu ta forma un peliger grandi pa aviacion. “Pues e no ta un peliger unicamente pa e habitantenan, cu a keda señala den e rapport di PAHO. Riba dje a instala e incinerador na e sitio y PAHO tambe a ilustra e peliger di e esey,” Mansur a mustra. Lider di Accion21 ta conclui cu den e contestanan, Minister Arends a mustra di no a prepara su mes. “Durante e reunion, e no a tuma ningun anotacion di e preguntanan. Y e no tabata honesto ora el a bisa cu no tin ningun rapport cu a indica cu mester cera dump di Parkietenbos,” tabata e comentario di Miguel Mansur na Bon Dia Aruba.

Trucknan por yuda baha debe

Mansur tambe a reacciona riba e relato den prensa cu a bin di e despacho di Minister Arends riba e decision pa Gobierno no despensa Serlimar e debenan cu belasting. Segun Minister Arends, si haci esaki ta corona corupcion y mal maneho na Serlimar. Mas ainda, Gobierno no ta e peliger mas grandi pa Serlimar, segun Sr. Arends. Pasobra belasting ta e prome cu mester paga den un eventual bancarota, ta netamente e debe aki ta protehando e compania, ta e argumento.

E Minister a bisa cu ta pa e motibo aki a rechasa e mocion di AVP sosteni pa Accion21 pa pordona e debe di belasting. “E peliger mas grandi ta cu e compania debe 7 miyon florin na debe comercial y comercio lo no ta dispuesto pa papia pasobra nan kier nan 7 miyon bek,” e comunicado di Minister a bisa.

“Serlimar tin truck para cu nan no ta usando,” Miguel Mansur a bisa Bon Dia Aruba, referiendo na e trucknan para na Setar. “Nan por bende nan pa 8 a 12 miyon florin pagando tur nan creditornan priva. Despues di esey, ta e debe cu belasting so ta keda. E realidad ta cu esnan cu a vota contra e mocion, kier pa Serlimar bati bancarota,” Mansur a bisa. “Tur Parlamentario a bisa cu nan kier wak e compania sobrevivi, pero sin pordonamento di e debe di belasting of sikiera parti di dje, esey ta imposibel.”

Integridad

Tur e discusion riba Serlimar y dump ta pone Mansur duda den e capacidad di Ursell Arends pa realmente atende cu asuntonan di integridad. Banda di rapport di PAHO, e Minister “a nenga di contesta mi preguntanan si e ta de acuerdo cu e nombracion di Director di Lotto y Utilities. Mi a cord’e cu el a campaña cu ‘fixmento’ lo caba. Mi a puntr’e si e ta na altura cu tur dos e nombracionnan ta trata di ex miembronan di MEP. El a admiti cu no a consulta cune, pero a purba sconde tras di un asina yama ‘profielschets’ pa defende su integridad, cu ta un desapunto grandi,” ta opinion di Miguel Mansur di Accion21.