Dr. Ryçond do Nascimento: ‘E problema di sushedad di Aruba y e derecho di mucha riba medio ambiente limpi’

“Minister Arends a studia materia, pero no tabata sa di rapport di PAHO”

Dia den dia afo, muchanan cu ta biba den cercania di dump di Parkietenbos ta keda afecta den nan derecho pa biba den un medio ambiente limpi. Asina Parlamentario, mr. Dr. Ryçond do Nascimento ta opina.

E Parlamentario a bisa cu riba e portal kinderrechten.nl por lesa di un caso sin precedencia y cu tin efecto pa tur decision huridico a lo largo, unda un Huez na London, Inglatera, a oficialmente considera cu un mucha muhe di ocho (8) aña a muri a causa di aire contamina. E sentencia di e Huez tabata na December 2020 y ta cuadra den e aceptacion cu sushamento di medio ambiente ta afecta derecho di mucha, do Nascimento a bisa.

“Riba e mesun portal por lesa cu anualmente un di cada cuater mucha bao edad di cinco aña ta muri a consecuencia di daño na medio ambiente. Esaki ta nifica cu tin pregunta tambe pa Aruba. Pasobra ya ta pa hopi aña cu e maneho di sushedad di Aruba ta hopi bao nivel,” Ryçond do Nascimento a bisa. “Y particularmente den e area habita rond di Parkietenbos ta reina un situacion cu ta bay contra e derecho di mucha aki y tambe contra locual por spera di un Gobierno drechi. Ta papia di contaminacion di aire, contaminacion di e tera y awa di lama contamina cu ta algo diario. Na Parkietenbos ta crece un sero di sushi dia pa dia direccion pa lama, y cu cada cambio di direccion di biento, habitantenan a keda asota cu holo y molester di huma cu ta pone nan stoma draai. Riba dje, slib, cu ta existi entre otro di fecalia, ta keda plama riba dump pa por seca. Si e mester yobe djis un tiki, e combinacion stinki aki ta bira un atraccion pa musca y otro pest. Mientrastanto ta sigui basha awa di pos y riool cu no ta purifica den lama.”

Den cuadro di esaki, e Parlamentario ta puntra su mes si no por investiga aki si Parkietenbos ta mina derechonan di mucha, particularmente mirando cu Aruba ta mara na e Tratado Internacional riba Derecho di Mucha. “Den articulo tres di e Tratado ta expresa cu e interes di mucha mester ta semper prome ora di tuma decisionnan cu por afecta mucha. Articulonan cuater y seis ta crea e obligacion pa Gobierno percura cu ta Brinda un ambiente sigur pa muchanan por biba.”

Esaki ta e scenario, particularmente e trabaonan cu ta tuma den e aspecto di aire liber den cuadro di maneho di desperdicio cu ta un corta den e derechonan di mucha. Asina mes, na momento cu a efectua e actividadnan aki, ningun hende ta bisa riba e peliger di e materianan peligroso y venenoso pa muchanan cu ta biba den e bario. No ta midi calidad di aire, di awa y lama y di e tera. Tampoco ta tene investigacion di salud den e area residencial aki pa asina por pone riba mapa e risiconan di salud di e habitantenan.

“E ora a yega pa Gobierno tuma e caso largo aki di sushedad y desperdicio na serio y atende cu e problematica aki den forma efectivo. Pero, si mester scucha e comentarionan di e Minister nobo di Integridad y Naturalesa den e reunion recien di Parlamento riba Serlimar, ta perde tur speranza,” do Nascimento a sigui comenta. “Si lesa e portal di Gobierno, Serlimar ta e compania di Aruba cu ta garantisa comunidad un ambiente di biba limpi y saludabel pa medio di ehecuta actividadnan dirigi na prevencion di desperdicio, coleccion, procesamento y maneho di areanan berde, na un forma responsabel, dirigi riba servicio y di forma eficiente.

Pero, e Minister a bisa durante e reunion publico cu e ley di molester, e hinderverordening no ta conta pa e trabaonan na Parkietenbos. “E ley no ta crea ningun excepcion pa esaki,” do Nascimento a bisa. “E Minister tambe a bisa di no a tende nunca di e rapport di PAHO (Organisacion Pan Americano pa Salud) ni tampoco riba e problematica pa e ubicacion di e incinerador. Pero den entrevistanan, nos Minister nobo a bisa diferente biaha cu el a studia e materia profundamente y cu a pensa riba solucionnan,” do Nascimento a continua. “Nos lo mester ker’e.” (red. e rapport di PAHO ta urgi Gobierno pa cera dump mirando su peliger eminente pa salud di e habitantenan di e bario en particular, pero tambe pa henter e isla mirando e cantidad di sushedad cu ta bay den lama y e polucion di aire.”

Mientrastanto, segun e Parlamentario, e enfoke ta parce di kier keda duna mas balor na autonomia di Aruba, comosifuera cu e ta un derecho di Gobierno di Aruba. “Kizas ta momento pa stop di usa e autonomia aki como grito di guera contra Hulanda, pero na prome luga usa autonomia como un responsabilidad. Cu esey lo por conclui cu autonomia mester keda interpreta como un obligacion cu ta pusha pa realisacion di derecho di mucha.”