(NTN24/ElTiempo) – Yobida intenso na Medellin y alrededor a causa cu varios rio y rooi a desborda y a inunda varios sector. E sectornan mas afecta tabata comuna di Santo Domingo unda vehiculo y motocicletanan a ser lastra pa un rooi cu a desborda.
E yobidanan fuerte di diasabra atardi na Medellin a provoca inundacion grandi cu a afecta vivienda y e principal careteranan di e ciudad. Den e zonanan afecta por a observa con decenas di comerciante a perde nan negoshinan informal cu tambe a ser lastra pa e coriente fuerte di awa y lodo. Den e localidad di Copacabana un pickup a cay den e Quebrada La Chuscala, sin embargo e chofer a logra sali ileso di e accidente. E servicio di Metrocable a keda obliga pa suspende nan operacion pa mas di un ora mientras e intensidad di e yobida a cuminza baha.
Departamento Administrativo di Gestion di Riesgo di Desastre (Dagrd), a informa cu den e bario La Avanzada, unidadnan di cuerpo di bombero a atende un caso di movimento di masa, cu piedra y baranca cu a los, cualnan a pasa kibra un muraya di un segundo piso, di acuerdo cu e reportahe di El Tiempo. Segun alcalde di Medellin, Daniel Quintero, por lo menos 30 famia a keda afecta pa e yobida na Medellin, mientras cu siete a perde nan vivienda completamente. E personanan afecta mester a recuri na e alberguenan. E awacero a afecta tambe famianan na Bello, Antioquia, unda tabatin inundacion na varios sector.
