“Sin mester usa palabra nos por expresa nos mes y haci nos mes liber di tur loke ta stroba nos pa bay dilanti”.

Rafael Garcia ta un hoben di apenas 19 aña di edad tin un carera exitoso den e mundo di arte. Actualmente Rafael ta lider di e proyecto “Step it Up” cu ta un di e proyectonan participando den e competencia di proyecto Pitch Time. Den un entrevista cu Bon Dia Aruba Rafael ta conta di tur su triunfonan den e mundo di arte y tambe ariba su proyecto actual “Step It Up”.

Rafael ta caracterisa su mes como un persona social, outgoing y cu gusta presenta dilanti publico. E ta conta cu e mundo di arte ta algo natural pe. Desde chikito, aunke nunca el a bay les di canto, baile of actuacion, semper eseynan tabata e actividadnan cu e tabata gusta. Di chikito semper e tabata canta, pa hopi aña el a forma parti di Gaita Fortalesa Infantil cu despues a bira Gaita Fortalesa Hubenil, pero aworaki e no ta existi mas lastimamente.

Rafael ta bisa cu baile basicamente ta den su sanger, ya cu e ta tin sanger Latino, baile ta algo cu ta full natural pe. Nunca el a bay les di baile te cu na aña 2019 el a cuminsa forma parti di e grupo di baile New Lollipop Generation, mihor conoci manera NTG y NLG dancers.

Su interes den actuacion a resalta na aña 2012 of 2013, e ta conta, na momento cu su ruman muhe a participa den Gang di Arte. “E competencia tabata hopi interesante pa mi, pero e tempo ey mi tabata den basis y mi no por a participa, asina cu mi a drenta mavo cu mi a haya e oportunidad, mi a representa mi scol y esey ta e prome aña cu mi a sali ganador absoluto di e competencia, cual tabata algo shocking”, el a bisa.

Di 2015 pa 2021 Rafael a sali ganador absoluto di Arte di Palabra Aruba. Na 2015 el a gana na Corsou den su categoria di Arte di Palabra ABC, na 2018 el a sali na tercer luga den su categoria y e aña aki Rafael a sali ganador absoluto di Arte di Palabra ABC, el a gana full e competencia.

E ta conta tambe cu den pasado e tabata PR di Kiwanis Builders Club pa varios aña, e tabata un nominado di Poder di Hubentud 2018 y den 2019 el a participa den e categoria VIP.

Arte di Palabra ta un competencia di poesia y storianan chikito. Tur e añanan cu Rafael a participa den e competencia, e la skirbi su mesun poesia of storianan, participando semper den e categoria original. E ta conta cu semper ora e ta skirbi, e ta hacie cu e meta di trece un mensahe dilanti. “Pa tur mi shete añanan cu mi a participa esey tabata mi meta principal, no tabata importa mi si mi ta gana of perde, pero mi meta tabata pa trece un mensahe positivo pa e publico of un eye opening message”, el a bisa,

“Mi inspiracion pa mi poesia y storianan cortico mi ta saca basicamente di situacionnan cu ta andando. E aña aki mi a skirbi di un experiencia personal, cual tabata depresion y kico tabata mi experiencia cu esey, kico tabata e pasonan cu mi a tuma y con leu el a yega. Añanan anterior mi a skirbi di situacionnan cu tabata andando e tempo ey”, el a agrega.

El a sigui conta cu na 2019 el a skirbi tocante humanidad, unda cu el a papia di loke tabata pasando cu nos naturalesa, e actitud di un ser humano y tambe e abuso sexual contra di muchanan y con ni un paso tabata wordo tuma pa loke ta importante pero pa loke ta irelevante si hende ta hinca nan tempo aden. “Mirando cu arte di palabra ta brinda un plataforma pa trece un mensahe, semper mi a tum’e cu man habri pa trece un eye opening message pa e publico”.

Aworaki Rafael ta completamente dedica na e proyecto Step It Up cu el a participa cune den Pitch Time cu a cuminsa na luna di maart cu e parti di youth leaders y youth coaches. El a splica cu nan a haya diferente tayer cu a prepara nan pa yega na e fase pa crea nan propio ekipo pa traha cu e proyecto. Cada lider a haya e tarea pa crea un grupo pa asina hunto cu nan realisa e proyecto.

Rafael su proyecto Step It Up ta consisti di un ekipo di 7 hoben y e ekipo tambe mester a sigui diferente tayernan cu Pitch Time tabata brinda pa asina prepara pa e oficial pitch cu tabata un dia di competencia pa tur e proyectonan cu a participa den Pitch Time y e dia ey nos tur a haya un sponsor pa asina yuda nos ehecuta nos proyecto.

E ta splica cu Step It Up ta un proyecto cu ta basa ariba arte y e aña aki e enfoke di e proyecto ta baile y tin cuater scol secundario cu ta participando den e proyecto. E hobennan participando ta ricibi les di latin dance, comercial dance y tambe folklore. Den cada categoria nan ta haya tres diferente estilo di baile, den folklore nan ta haya wals, mazurka y tumba, den e parti di latin dance nan ta haya salsa, bachata y merengue, y den e parti di comercial dance nan ta haya hip hop, afro dance y dance hall. Pa e anochi final tambe, e gruponan cu ta participa ta trek lot di cada categoria, folklore, latin dance of comercial dance y di cada categoria nan mester kies entre e tres estilonan di baile

Por ultimo, Rafael su mensahe ta: “Pordona y lubida, nos tin un bida so y nos tin cu disfruta di dje a lo maximo pero sanamente pasobra nos no sa si nos t’ey mañan. Si bo tin e oportunidad di expresa bo mes a traves di arte, haci uso di dje pasobra arte ta un plataforma super grandi cu nos por haci uso di dje, cu nos por expresa nos mes den diferente forma. Sin mester usa palabra nos por expresa nos mes y haci nos mes liber di tur loke ta stroba nos pa bay dilanti”.