(Infobae) – Gobiernonan di paisnan Suramericano no ta haci tanto ainda pa detene pesca masivo di parti di e flota Chines, cu no ta tene cuenta cu Zona Economico Exclusivo di cada pais. Asina nan no ta parce consciente di e peligro grandi cu e presencia Chines ta representa pa nan recursonan natural bao proteccion di tratadonan internacional.
Na juli 2020, marina Ecuatoriano a detecta un flota di aproximadamente 250 barco di bandera Chines net na limite di e Zona Economico Exclusivo di Islanan Galápagos. Segun e revista Mericano The National Interest, e flota a permanece varios siman y e barconan a paga nan sistema di ubicacion geografico, legalmente obligatorio, pa varios ora.
E presencia di e barconan Chines no a significa e promer biaha cu e paisnan Suramericano ta keda confronta cu pesca ilegal, no declara y no reglamenta (INDNR na Ingles) na nan costa.. En todo caso, e incidente di aña pasa a genera bastante rechazo pasobra Galápagos ta un teritorio unico considera Patrimonio di Humanidad pa UNESCO. Segun The National Interest, ta posible cu e tension entre Merca y China ta hunga un papel fundamental den e creciente consideracion di e pesca INDNR como un menaza pa seguridad nacional di e region. Despues di e incidente na e islanan, Comando Sur di Merca (USSOUTHCOM) a expresa su firme apoyo na e esfuerzonan Ecuatoriano contra pesca ilegal. Poco tempo despues, e canciyer Mericano di e tempo ey, Mike Pompeo, a critica e regimen Chines y a exigi cu China mester aplica un politica transparente di cero tolerancia pa cu pesca ilegal.
Despues varios gobierno a haci esfuerzo pa lucha contra pesca, pero e paisnan Suramericano mes por ta mas activo, en vista cu ta considera pesca ilegal un menaza di nan seguridad nacional.
