“Dia cu como politico mi kier anuncia mi desishon tocante mi carera politico, mi mes lo anuncia esaki na tur prensa y Pueblo di Aruba.” Esakinan tabata palabra di Parlamentario Independiente sra. Marisol Lopez – Tromp riba su pagina personal di Facebook, dialuna mainta trempan.
E reaccion di sra. Lopez – Tromp ta bin despues cu den medio di communicacion a keda publica un noticia di su persona y e posibel vinculacion cu e lo por tin cu e partido nobo POR. Sra. Lopez – Tromp ta specificamente papia di e website 240ra.com, enfatisando cu na niun momento e lo a wordo entrevista door di e medio menciona pa puntra su banda di medaya. E parlamentario ta categorisa e publicacion manera algo inconfiabel y cu informacion incorecto. Den fin di siman tambe por a skucha parlamentario Melvin Tromp den un entrevista na radio ta menciona, den su palabranan, e ‘show’ di entre sra. Lopez – Tromp y parlamentario Chris Dammers lo tabata orquestra pa asina e parlamentario independiente join e partido nobo di Oduber y Bikker.
Durante siman cu a pasa, Bon Dia Aruba a tuma contacto cu sra. Lopez – Tromp pa puntra tocante su carera politico pa cual nos a keda notifica cu e no a tuma desicion ainda y cu e lo anuncia esaki despues di atende cu asuntonan di IPKO. Bon Dia Aruba lo purba di tuma contacto un biaha mas cu su persona riba e tema aki.
