Diamars atardi durante un conferencia di prensa Minister di Labor, Energia y Integracion, Sr. Glenbert Croes, conhuntamente cu Minister di Husticia y Asuntonan Social, Sr. Rocco Tjon, a anuncia cu e ayudo di fase lo termina na final di luna di november y e programa nobo “Aruba Kier Traha” lo cuminsa.
Minister Croes a informa cu abase di decisionnan cu gobierno ta tumando mirando e realidad, cu gobierno di Aruba no lo ricibi sosten financiero di Hulanda, e ayudo di Fase cu e personan cu a perde nan trabou desde cu e pandemia a cuminsa lo termina fin di e luna aki y el a anuncia e programa nobo Aruba Kier Traha cu ta specialmente pa e personanan aki, desemplea.
“Como gobierno nos mester tuma decision pa nos por sigui avansa bao di e circumstancianan dificil. Den bista cu Fase ta yega na su fin, pa fin di e luna aki, nos mester pone nos hendenan back na trabou, y pesey mes e programa Aruba Kier Traha ta cuminsa”, el a bisa.
Segun e minister a splica, mirando e situacion cu Hulanda, y tambe e conseho di CAft pa termina cu e ayudo di Fase, gobierno y e Ministerio di Labor ta trahando ariba e programa aki ya pa un tempo caba. El a señala cu e programa Aruba Kier Traha no ta diseña pa yuda esnan cu ta den Fase solamente, e ta un plataforma cu ta diseña pa yuda tur persona cu ta buscando un manera pa drenta den e mercado laboral.
Minister Croes a enfatisa cu mester realisa cu circumstancianan ta cambia ariba e mercado laboral a consecuencia di e pandemia, y ainda tin alrededor di 2.700 persona cu ta ricibi Fase. “Pesey nos mester stress cu e accion mas grandi di gobierno di Aruba mester ta e recuperacion financiero, economico, social y laboral y esaki ta hopi importante den cuadro di pone tur hende back na trabou”, el a señala.
Segun el a splica pa Aruba Kier Traha, cu tambe ta fundamental pa e recuperacion di Aruba, ta pa yuda e trahadonan, cu a perde trabou, cu nan capacidad pa haya trabou, cu nan capacidad pa mehora nan posibilidadnan riba mercado laboral.
Un posibel dificultad cu e minister a indica cu lo por presenta ta cu kisas funcionnan a cambia, trabounan por ta no ta existi mas of kisas door di e pandemia e mentalidad di e trahado a cambia. Cu e programa Aruba Kier Traha gobierno y Ministerio di Labor kier promove un cambio di mentalidad entre e personan desemplea cu lo yuda nan bula den e mercado laboral.
“Aruba Kier Traha ta bo oportunidad pa bo por cuminsa traha ariba bo propio crecemento, bo propio motivacion, bo propio mentalidad pa bo por subi back mercado laboral. Nos mester realisa cu e exito di nos cada un ta den nos propio man”, el a agrega.
Minister Croes a splica tambe cu via e programa Aruba Kier Traha lo ofrece cursonan pa e personan cu ta busca trabou. Cursonan di “Change of Mindset” lo wordo duna na 500 persona y e cursonan aki lo wordo brinda pa instancianan di gobierno y otro instancianan den sector priva tambe. El a indica cu e perosnanan cu tin mas tempo hayando sosten di Fase lo ta e prome personana cu lo ricibi invitacion pa tuma e curso. “Realisa cu cambio di mentalidad ta importante pa bo por logra un cambio positivo pa bo mes”, el a agrega.
“Pa logra recuperacion, Her-, Om-, Bijscholing ta fundamental”, Minister Croes a señala. Departamento di Progreso Laboral (DPL) lo ta yudando e desempleadonan via job centers cu job matching pa asina facilita empleo y yuda den colocacion laboral. El a informa tambe cu oportunidad pa otro cursonan lo ta via Enseñansa pa Empleo, FEPA, DOC, y otro institutonan di educacion cu e plataforma Aruba Kier Traha lo ta trahando cune.
El a menciona cu e programa Aruba Kier Traha lo ta un plataforma di cooperacion cu lo tin un structura coordinaicon entre gremionan commercial y sindical pa coordina e trabounan aki.
“Pa nos por duna hende trabou, pone hende back na trabou, economicamente nos metser ta den recuperacion y nos mester para back ariba pia economicamente. Realisa cu e unico manera pa nos pone Aruba back ariba pia ta pa nos como personanan para back riba pia”, el a agrega
