Come saludabel y movecion, pero combina cu un miho ambiente rond ta trece resultado positivo pa un pais

Hopi informacion a bini dilanti durante un charla cu a tuma luga na John F. Kennedy Center for Education. E orador tabata Evelien van Dort, kende a splica cu pa yega na un miho salud pa ciudadanonan, tanto jong como grandi, ta pa traha hunto.

E tema di e charla tabata riba salud positivo den practica. Esaki tabata dirigi riba trahadonan den Salubridad, Cuido y Enseñansa.

Van Dort ta fisioterapista di mucha di profesion pero banda di esaki e tambe ta autor di varios buki riba e desaroyo di mucha y promove lesamento bou di chikito nan.

Come saludabel y movecion ta importante den bida di tur hende. Pero esaki den combinacion cu bo ambiente, cu ta bo red social of famia, unda e mucha ta lanta, su scol, klas ta masha hopi importante. Principalmente pa mucha e combinacion di e aspectonan ta forma y duna sentido na nan bida. Cu e temanan aki ta bay den sectornan di salud, cuido y enseñansa

Specialisacion den salud y cuido a aumenta pa por atende cu tur e problemanan cu a surgi ultimo decadanan. E desaroyo den Salubridad tabata grandi. E pregunta di e otro banda ta awo con pa haci cu e persona mes ta percura pa un miho salud pa su mes.

E ta algo cu ta cuminsa for di momento cu e baby ta den bariga di su mama, y ta sigui ora e ta crece y na momento cu e drenta scol. Na chikito mester cuminsa siña e mucha pa biba di e miho forma pa na adulto nan ta un persona hopi vital. Si cana e caminda for di inicio di bida, lo por mira un cambio.

Aworaki e pandemia a causa hopi daño. E personanan a bira mas vulnerabel, pero na mesun momento a realisa cu nan kier biba di un forma mas saludabel.

Personanan hopi mas saludabel sigur lo baha e presion cu tin aworaki mundialmente riba gastonan di salud. Inclusivo hopi hende ta cuminsa cu nan mesun cultivo creando un sistema hopi mas sostenibel. Importante ta pa bini cu proyectonan entre jong y grandi nan. Esaki lo percura pa un cambio grandi den e sistema di crea un sociedad hopi mas saludabel.

Den e charla aki e experto a splica con por logra yega na e miho resultado cu lo tin su efectonan positivo den henter e comunidad.

E charla tabata un iniciativa di Scol Saludabel den cooperacion cu GGD Haaglanden. E ultimo instancia aki a duna training na e grupo local pa implementacion di Scol Saludabel, caminda tin “Gezonde School Adviseurs” y “Gezonde School Coordinator” cu a haya nan training for di e instituto aki.