Prome Minister di Aruba: No tin otro pais cu tin e mesun similaridad asina cerca di otro manera e tres pais nan aki

Durante e rueda di prensa di dialuna 8 di october ultimo Prome Minister di Aruba, Sra. Evelyn Wever-Croes, Prome Minister di Sint Maarten, Sra. Silveira Jacobs y Prome Minister di Corsow, Sr. GilmarPisas a elabora ariba cooperacion, y tambe ariba e diferencia- y similitudnan entre e tres paisnan.

Bulando inmediatamente ariba e diferencianan entre e paisnan, Prome Minister Wever-Croes ta splica cu un di e diferencianan mas grandi ta cu pa e di cuater kwartaal di e aña aki Aruba ta e unico pais cu no a ricibi apoyo di likides ainda, Corsou y Sint Maarten ambos a ricibi e apoyo aki pa e ultimo lunanan di e aña.

E ta enfatisa si cu apart di e diferencianan tin similitudnan importante tambe entre nan. El indica cu pa nan ta importante pa sa na unda cada pais ta para ora cu ta trata di e siguimento di aplicacion corespondiente na e paisnan. Y manera ta conoci publicamnete tin condicionnan cu ta wordo poni pa e sosten di likides, condicionnan cu ta diferente pa cada isla, pero cu mester wordo realisa conhuntamente pa cada pais.

Un di e puntonan cu e Prome Minister ta elabora ariba dje ta e normering top inkomers locual e la indica nan a discuti ampliamente durante na reunion, specialmente tocante e diferencianan, entre e paisnan y con cada pais ta aborda e situacion. Esaki tambe ta un di e condicionnan cu ta wordo aplica diferente na e paisnan.

Un otro diferencia importante cu el a toca ta cu pa Corsou y Sint Maarten e ta un rekisito cu un ‘balance budget’mester bin na 2023 y pa Aruba esaki no ta e caso, pa Aruba ya caba pa 2022 mester tin e balance budget y basa ariba e diferente puntonan di salida e diferencia di trayectorio ta sigui ta incorecto, e la indica. “Aruba no lo alcansa e balance budget 2022, pero esaki ta solamente un posicion inicia”, el a bisa.

Prome Minister Wever-Croes tambe a splica cu e tres ministernan a papia tambe di e cortamento den e gastonan den e sector di cuido medico, cual e ta señala cu tambe ta diferente pa cada pais y cu ta importante pa compronde kico si a traha na un pais pasobra esey tabata algo hopi importante pa su persona awe.

Lo mas importante cu mi a tuma di e reunion di e dia di awe tabata pa compronde kico a traha bon pa Corsou, kico a traha bon pa Sint Maarten, con esey a wordo logra pa eventualmente nos tambe por tumele over y esey ta conta pa casi tur e temanan”, e la agrega.

Un ehempel cu el a duna ta cu Sint Maarten, cu e uso di medicamentonan generico lo resulta den un ahoro di alrededor di 12 miyon pa e pais ruman y ainda Aruba no tin un calculacion asina leu. Otro ehempel cu Prome Minister di Aruba a menciona ta cu Prome Minister di Corsou a indica, y segun el a bisa“ey nan tambe mester haci algo”, ta cu no manera na Aruba cu 60 miyon florin pa aña mester wordo corta. “Nos mester traha ariba diferente sectornan cu pa nos tambe ta relevante. Por ehempel e medicina, loke ta trata e adkisicion central di medicinanan y e relacion cu e hospital y tur e temananey”, el a bisa.

Pa locual ta trata palabracion nan concreto cu e tres paisnan a el a splica cu e tres ministernan a palabra concretamente cu nan lo tene e tipo di e reunion aki di manera virtual mensualmente pa sigui traha ariba e diferente puntonan y un biaha pa kwartaal e reunion lo tuma luga den persona.

El a splica tambe cu e ministernan di finansas a yega na cierto palabracionnan tambe concreto di con pa bay traha propocicionnan ariba e pago di e debe, e detayesnan di esaki e no a elabora ariba dje, pero entodoel a indica cu tin palabracion concreto haci ariba e tema ey.

Prome Minister Wever-Croes a indica tambe cu palabracionnan concreto a wordo haci tambe ariba cierto posibilidadnan di inversion cu nan mester bay discuti ainda cu e respectivo ministernan di economia. “Nos tin algun bon ideanan pero poco poco nos lo trece nan den publicidad. Inversion den crecemento economico den cada pais y con nos por stimula inversionnan den e diferente paisnan pa hunto nos por logra nos metanan”, e la agrega.

Prome Minister di Sint Maarten, Sra. Jacobs a menciona cu nan ta wak e oportunidad pa sigui traha hunto ariba legislacionnan cu por ta un di e otro paisnan por ta mas avansa den dje y e ta enfatisa cu esey ta rekeri hopi mas colaboracion, no solamente ariba nivel ministerial pero tambe ariba nivel tecnico. “Nos ta haci esey hopi den preparacion pa discuissionnan cu lo beneficia e progreso di nos economia separa. Tin algun legislacionnan eyfo cu si nos colabora e lo bay mas lihe”, el a bisa.

Tambe algo cu mi a haya hopi interesante ta algun di e metodonan strategico pa por ricibi asistencia interrnacional tecnico,aunke e no ta monetario pa motibo di nos situacion cu Hulanda, pero cu tin oportunidad ainda pa ricibi fondo como islanan chikito den desaroyo di parti di areanan internacional cu tambe por supuesto lo yuda nos progresa mas lihe tambe”, el a señala.

Prome Minister Jacobs a indica cu na diferente ocacion,durante e ultimo dos añanan, semper un di e islanan no tabata rcibi e ayudo di likides manera debe ser. El a splica cu Sint Maarten den algun ocacion a yega dos luna sin aydo di likides, mientras cu e otro dos islanan si a ricibi di nan. “E ta un wega di pushi cu raton, ban pone asina, cu nos mes a permiti basa ariba nos deliberacionnan individual cu Hulanda”, e la expresa.

E ta enfatisa cu e union aki ta haci nan mas fuerte tambe pa por mantene un solo meta den nan discusionnan cu hulanda ariba diferente topico. Segun el a splica nan ta haciendo esey caba den prepracion pa tur e diferente paketenan di e paisnan caminda cu nan mester colabora, incluyendo aworaki e discusionnan tecnico y e deliberacionnan ariba e nota van wijzeging cu a wordo manda pa raad van staten y cu tin hopi comentario.

Esaki a trece un claridad grandi mirando cu bo tin un impresion cu no tabata e realidad y awor aki hunto mi ta kere cu nos por negosha fuertemente cu nos partner di Reino den e interes di asistencia cu den un manera ta husto, y esaki no ta bay ta igual pasobra cada pais tin diferente necesidadnan pero sikiera e lo ta ekitativo den termino cu cada pais ta ricibi loke nan mester y merece”, Prome Minister Jacobs a agrega.

Pa locual ta trata e colaboracion, Prome Minister di Aruba ta splica cu e ta desea pa e colaboracion ta “regional”, di tres pais Aruba, Corsou y Sint Maarten den e zona di Caribe, indicando cu nan ta islanan chikito den desaroyo cu desafionan similar, buscando kico nan por haci pa nan por yega na nan metanan. “No tin otro paisnan cu tin e mesun similaridadnan asina cerca di otro manera e tres paisnan aki, dus e ta mas local, kico nos por logra cu nos colaboracion, kico ta importante y trece avanse pa nos pueblonan”, el a bisa.

Pa cual ta trata cierto temanan, por ehempel COHO, Prome Minister Wever-Croes a splica cu e tres ministernan a palabra y acorda cu niun di e islanan lo tuma ningun decision sin discutie tema entre nan mes prome. Pero tin cierto temanan, manera por ehempel sosten di likides cu Aruba no a ricibi y Corsou y Sint Maarten si a ricibi, cu no por spera pa Corsou y Sint Maarten hala atras y para ariba e mesun liña cu Aruba. Dependiendo di e tema, y den mayoria di e casonan, e tres paisnan ta di acuerdo cu e colaboracion y apoyo entre nan pa locual ta trata e negociacionnan cu Hulanda ta fuerte.

Ariba e aspecto di COHO, Prome Minister di Corsow, Sr. Jacobs a indica cu nan a yega na hopi combersaion tambe pa loke ta trata e aspecto financiero y kico e ta den su totalidad. El a menciona cu durante nan conferencia di prensa CAft a menciona cu ta trata di 1.4 biyon, pero e la bisa cu nan a realisa cu te ainda nan no sa concretamente kico e fondonan aki ta.

Nos punto di bista ariba esaki ta cu nos kier un claridad sigura riba kico e fondonan cu ta bay wordo poni disponibel pa e tres paisnan ta sigur y min por keda sin menciona tambe, con e ta bay wordo hinca den otro como pais. Ora cu nos conta e cantidad aki y bo bay reparties aki den parti nan igual y bo bay conta esaki kico e ta bay bira pa luna of pa aña, pa cada pais compara cu locual nos mester pa e inyeccion economico,pasobra nos tur tres ta den un fase di recuperacion economico despues di pandemia, ta hopi importante pa nos tin claridad ariba esaki”, el a splica.