(Infobae) – Presidente di Brasil Jair Bolsonaro ta atacando su ex-ministro di Husticia Sergio Moro, bisando cu “semper e tabatin intencion politico”, refiriendo na e afiliacion di e ex-huez cu e partido Podemos cu lo ta tuma lugar proximamente. Sergio Moro lo por ta candidato presidencial pa e partido den eleccion di 2022, unda Bolsonaro ta spera di logra su reeleccion.
Den e sentido ey, e mandatario Brasileño a bisa cu Moro “semper tabatin intencion politico, nada en contra, pero e tabata hacie di forma camufla”, pa despues agrega cu tempo cu Moro a acepta e puesto di ministro di Husticia, e tabata pretende di haya un puesto den Tribunal Supremo Federal.
“Desafortunadamente, Moro tabatin un interes politico. Con un persona por renuncia na 23 aña di trabao hudicial pa bira ministro, sabiendo cu e dia siguiente nan por a retir’e y perde tur cos? Poco poco a revela cu e tabatin un proyecto”, Bolsonaro a agrega den un entrevista cu e emisora Jovem Pan.
Afiliacion di Moro na Podemos por tuma lugar awe, 10 di november, despues di a pasa algun luna trahando pa un agencia consultor na Merca, y cu e proyeccion di por sacudi e perspectivanan politico na Brasil. Segun un encuesta di PoderDAta di dia 27 di october recien pasa, Moro lo ta na tercer lugar pa loke ta intencion di voto, cu 8%, tras di Luiz Inacio Lula da Silva, cu 35%, y Bolsonaro, cu 28%.
Bolsonaro y Moro a keda den confrontacion desde cu Moro a renuncia como ministro na 2020. Na luna di april 2021 Tribunal Supremo a habri un investigacion encuanto e supuesto metemento di presidente Bolsonaro den trata di pone hende di su confianza na cabez di Polis Federal na Rio de Janeiro, despues cu Moro a hustifica su retiro pa via di e presionnan ey.
