Minister di Husticia y Asuntonan Social Sr. Rocco Tjon a sinta cu e trahadonan di FADA, caminda a tene un reunion positivo y a intercambia informacion y ideanan pa loke ta trata proyectonan cu lo wordo ehecuta a corto plaso y ideanan pa e futuro cercano.
Durante e reunion aki a remarca varios topico cu merece nan debido atencion, logicamente e temanan di droga y alcohol, pero tambe e aspecto di salud mental. Mester bisa, cu a logra inverti den varios curso y training pa e trahadonan di FADA, pa asina logra amplia e parti di conscientisacion riba salud mental, cu sigur lo añadi na e metanan di FADA.
A base di e temanan cu a wordo delinea, FADA a logra concretisa varios plannan, cu sigur lo por conta cu e apoyo y sosten di Ministerio di Husticia y Asuntonan Social. Director di FADA, Sr. Juendel Sprok a enfatisa e importancia di e continuacion di varios proyectonan cu ta andando caba, pa asina berdaderamente por logra mira e resultado di e proyectonan aki. Tjon a comparti su opinion caminda a enfatisa e importancia di continua cu plannan cu ya ta den pleno ehecucion, pa asina duna e profesionalnan e espacio pa por traha y mira e resultado di e ideanan cu nan mes a bin ta trece padilanti y pa asina logra proyectonan concreto.
Un plan cu sigur lo haya su debido atencion di ambos banda, ta e enlace entre FADA y e con pa trece conscientisacion den nos barionan, por medio di charlanan. Ministerio di Husticia y Asuntonan Social lo percura pa brinda sosten unda cu ta necesario, pa asina e proyectonan aki por sigui cana nan caminda. ‘No mester “reinvent the wheel”, laga nos expertonan traha y laga nan sigui desplega e bon trabao cu nan tin ta haci’, segun Tjon. FADA a mira e reunion aki cu Minister Tjon como un bon oportunidad pa por splica ampliamente tocante e historia di FADA como tambe e cambionan cu tawata tin durante e ultimo añanan.
Por ultimo por bisa cu e reunion aki sigur tabata uno fructifero, caminda a logra intercambia hopi informacion y a logra papia tocante algun preocupacionnan cu por tin. Tjon a subraya e importancia di comparti tur e informacion aki, cu sigur lo crea un mihor cooperacion a base di e bon intercambio di informacion y comunicacion. Por bisa cu Fundacion FADA conhuntamente cu e sosten di Ministerio di Husticia y Asuntonan Social, lo percura pa ehecuta varios proyecto y plannan concreto cu tin riba mesa, ademas lo sigui inverti den varios punto clave, manera e parti di prevencion di alcohol den trafico y salud mental. E colaboracion sigur lo percura pa un mehoracion den tur aspecto pa FADA.
