(Infobae) – Diabierna di siman pasa, cinco persona a muri den un tiroteo durante un fiesta Halloween na Panama, un crimen cu polis a asocia cu guera entre gangnan.
Den oranan di marduga di diabierna, cinco persona a ser asesina cu tiro y por lo menos shete a resulta herido durante un concierto di Halloween den un discoteca ubica na bario popular di Santa Ana, na ciudad di Panama, cerca di e parti antiguo di e capital.
“E hecho a tuma luga pa un guera entre gangnan”, e comisionado di Polis Nacional Ricaurte De La Espada a señala. E fiesta tabatin promocion cu e serie popular di Netflix Squid Games.
E fiscal, Rafael Baloyes a indica cu e incidente a produci ora un individuo a tira pa mata otro miembronan di gangnan rival “Los Galacticos”, cu tambe a tira contra e agresor.
E atacado a muri na e sitio, mientras cu otro cuatro a fayece na hospital.
“E gruponan criminal aki no ta bay stop cu conducta delincuente cu tin vinculo cu narcotrafico, gangnan, esaki ta bay trece consecuencianan”, a bisa den un conferencia di prensa.
Pa e caso aki, tin dos persona deteni, entre nan e ruman di un di e fayecidonan den atake, na unda cu a hayel’e un arma di candela. “Nos ta asumi cu a el utilisa e arma di candela pa defende su ruman”, Baloyes a afirma.
Director di Polis John Dornheim, a señala cu varios di e personanan involucra tabatin antecedente penal y herida di bala pa incidentenan anterior.
Diferente asesinato a tuma luga den ultimo simannan na Panama na restaurantnan y negoshinan comercial, loke a genera alarma. Autoridadnan Panameño ta vincul’e cu ahustacion di cuenta entre gangnan rival pa e control di rutanan di droga.
Expertonan ta considera cu mientras mas nan ta confisca, ta produci un number mayor di asesinatonan como represalia pa e mercancia confisca.
