Diabierna mainta durante un conferencia di prensa a desvela e maquette, y a lansa tambe oficialmente e pre-venta di e proyecto Caribbean Town Villas and Apartments. Managing Director di Palm Aruba Group y Caribbean Town Villas and Apartments, Sr. Victor Acosta, a splica e vision y proposito di e proyecto aki. Director di Directie Infrastructuur en Planning (DIP), Sr. Haime Croes a elabora ariba e colaboracion di DIP cu Caribbean Town Villas and Apartments.

Caribbean Town Villas and Apartments ta un proyecto cu a wordo diseña specificamente pa comunidad local y cu a bin pa innova e manera cu ciudadanonan ta biba ariba nos isla. Sr. Acosta a splica cu nan tin algun aña trahando ariba e proyecto aki y finalmente momento a yega pa ofrece formalmente e productonan cu ta bay wordo construi pa e comunidad Arubano cu ta buscando un solucion efectivo y sostenibel financieramente pa locual ta trata vivienda.

“Caribbean Town ta un proyecto dirigi pensando ariba nos hende Arubiano. Nos a pensa internamente con nos ta biba den nos cas, cua ta e aspecto- y componentenan cu tradicionalmente nos ta usa den nos cas y cu esey nos a proyecta y diseña edificionan halto, edificionan caminda un comunidad por biba trankil”, Sr. Acosta a bisa.

El a indica cu e proyecto Caribbean Town tin un total ta 328 unidad residencial cu cuater local comercial. 256 apartamento, 40 town houses y 32 villas. E proyecto lo tin pool, cancha di deporte multifuncional, un plaza unda hende por socialisa, un parke pa mascota, un outdoor fitness center, localnan pa oficina, un espacio pa polis di bario cu lo wordo integra den e vecindario di Eagle

E proyecto completo lo ta dividi den dos fase. Den e prome fase lo construe dos edificio residencial, un di nan ta conta cu 56 apartment y e otro ta conta cu 70 apartament y di 7 piso halto. Lo construi dos edificio di Town House, cada un di nan cu 10 unidad den dje, y lo construi tambe 16 villas. Prijsnan di unidadnan ta cuminsa di 150 mil florin y den e prome fase e prijs por yega te cu 330 mil florin.

Sr. Acosta ta splica cu e diferencia di e proyecto aki, compara cu otro proyectonan di vivienda aki na Aruba ta cu Caribbean Town no ta un proyecto di construccion solamente, “e ta un proyecto di comunidad”. El a sigui splica cu pa nan esaki kiermen cu nan no a pensa solamente ariba e parti tecnico, di construccion, e costo y con por haciele bon pa e medio ambiente. “Nos a pensa tambe ariba e hende cu ta bay cumpra un unidad con nan ta bay convivi cu otro, con nan por crea un comunidad caminda e hendenan por biba trankil y por tin e seguridad cu nan lo lanta nan famia bon”, el a agrega.

El a indica cu pa logra esaki e ta un proceso di educacion, un proceso caminda nan lo yuda cu e parti huridico, pa crea algun normanan di convivencia den e proyecto, pero alabes e parti informativo y educativo caminda hendenan sa kico nan mag di haci of no na un desaroyo asina. “Nos ta buscando cu e hendenan lo cera cabes y crea consciencia colectivo caminda un hende ta resepta su bisiña, un hende lo ta solidario cu su bisiñanan”.

Acosta a agrega tambe cu despues cu nan construi e proyecto lo tin un ekipo special pa haci e maneho completo di e proyecto. El a enfatisa cu nan no lo bay laga e proyecto tanten cu nan no ta sigur cu e comunidad ta trahando bon y ta bon organisa. “Nos lo keda te ora e doñonan ta bon prepara pa nan por sigui cune, y esey por tuma nos di 2 pa 5 aña”, el a bisa.

Segun Sr. Acosta, e idea ta, door cu esaki ta e prome proyecto residencial di e magnitud aki, pa e hendenan mira e proporcion di e proyecto. Con ta combina e parti di edificionan halto cu villas y edificionan chikito y e parti berde cu e espacionan di recreacion y tur aspecto di e proyecto.

Sr. Haime Croes, director di DIP tambe a elabora ariba e colaboracion entre DIP y Caribbean Town Villas and Apartments. No ta un secreto cu pa basta tempo tin un lista largo di ciudadanonan cu ta wardando pa yega na nan propio tereno, pa e motibo aki e participacion di DIP den e proyecto ta hunga un rol hopi importante, specialmente pa e ciudadanonan aki.

Sr. Croes a splica cu na comienso Gabinete Wever-Croes II a fiha na comienso un vision pa loke ta trata teritorio. Un di e visionnan ta un desaroyo duradero y sostenibel pa e espacio Arubiano. E ta indica cu esaki ta nifica cu gobierno kier pa tin un balans, cu pa hopi aña nos no a mira, entre desaroyonan economico, desaroyo social y medio ambiente.

“E palabranan medio ambiente y naturalesa ta esun cu ta hunga un rol hopi importante pa e proximo añanan pa nos pais pasobra nos tur kier sigui biba akinan y nos tur kier biba na un manera sano y saludabel y na unda cu nos por gosa ainda di e tiki cu tin pa nos por cana den mondi, gosa di nos flora y fauna etcetera”, el a bisa.

E ta splica cu a base di esey nan a haya e asignacion pa traha un ROP y un ROPV na unda cu ta tene cuenta cu esakinan. A base di a tene cuenta cu esakinan, el a indica, un di e prome pronosticonan ta con grandi Aruba lo ta pa 2030 y asina ta bay lihe ariba e capacidad di carga di e pais.

“Ora nos papia di nos capacidad di carga esey a pone nos bay back pa wak cuanto espacio lo tin ainda den futuro pa nos hendenan. Si nos pone nos calculacionnan y Censo tambe, na 2030 nos lo yega alrededor di 132 mil habitante, cu lo fiha nos na 50 mil famia pa 2025. Esey kiermen un desaroyo caminda nos lo mester bin cu un 5 mil cas cu lo mester bin den cinco aña. Mirando nos capacidad nos ta calcula cu nos tin e posibilidad di traha entre 300 pa 500 cas pa aña”, el a splica.

El a señala cu esey ta trece tres punto importante pa dilanti. Uno, mester tene cuenta cu e naturalesa, capacidad di carga y economia. Dos, e cantidad di luganan cu tin ta limita y tres, mester cuminsa pensa pa futuro. “Si nos no pensa pa futuro nos lo tin problema cu nos generacionnan. P’esey nos ta cuminsa bisa cu nos kier un desaroyo duradero y sostenibel, pasobra nos yiunan tambe tin e derecho di gosa di loke nos tin awo”, el a agrega.

E tres puntonan, Sr. Croes ta indica, a pone nan yega na unda tin limitacion di teritorio. E disponibilidad cu tin na tereno tambe ta chikito y e ta enfatisa cu mester tene cuenta cu esey pa e proximo 10 aña. “Nos mester duna nos hendenan cas y esey no ta kita cu nos por haciele na un otro manera cu nos ta pensa ta cu nos mester bay halto pa asina usa e tiki terenonan cu tin ainda eficientemente pa nos por yega tambe na duna e hendenan cas mas lihe”, el a agrega.