Gobierno ta sigui hunga politica di avestruz. Nan sa kico mester haci. Pa motibo cu e no ta politicamente expediente, nan ta keda pospone cumplimento cu palabracionnan cu Hulanda. Asina lider di Accion21 Miguel Mansur a bisa riba e decision di Hulanda pa no trata e punto di agenda si Aruba ta haya sosten di likides of no. Consecuentemente, esaki ta di dos luna cu Aruba mester maneha su pais sin sosten di likides di Hulanda.
Miguel Mansur a duna e reaccion aki despues di a reuni cu miembronan di College Aruba financieel toezicht, CAft.
“E realidad ta cu Gobierno no tin un fuente incansabel di placa. Nos tin un debe financiero grandi nos dilanti. Pero ta di lamenta cu nos no tin un presupuesto cla pa 2022. Nos ta e ultimo pais di Reino cu no tin e presupuesto cla. Semper nos ta laat cu esey.”
Segun Mansur, ta a base di presupuesto cu organisacionnan cu ta evalua Aruba y tambe e instancia cu ta midi con Aruba ta cumpli cu e landspakket, por determina si ta cumpli of no.
E prome paso cu Aruba mester haci ta bin cu e Presupuesto 2022 prome cu fin di 2021, pa cuminza sanea finanzas.
“Ta di lamenta cu Aruba awor mester bay busca fianza (mas caro) y ta pueblo ta keda cu e peso di interes, mientras cu si realmente Gobierno a tene su mes, na locual e mes a palabra, nos lo tin sosten di likides na cero porciento di interes. Tambe nos ta bay mira ki implicacion esaki tin pa e futuro tranchenan, si no cumpli cu e recorte di 60 miyon den AZV, manera nan mes a palabra (cu Hulanda),” Mansur a bisa.
Su conclusion ta cu Gobierno no a demostra e disponibilidad te ainda pa tuma decisionnan duro.
Bon Dia Aruba a tuma contacto tambe cu Minister di Finanzas mr. Xiomara Maduro riba e posponemento di Conseho di Minister di Reino pa trata e punto di sosten di likides pa Aruba. E Minister a bisa pa medio di su vocero, Sr. Junior Arends, cu “Aruba ainda ta papiando cu Hulanda. No tin un decision ainda riba sosten di likides. Si acaso no haya sosten, Gobierno lo cumpli cu su obligacionnan financiero basa riba un lista di urgencia.”
