Segun resumen diario di Departamento di Salubridad Publico DVG riba e desaroyonan di pandemia di coronavirus na Aruba, actualmente ainda tin 16 pashent di Aruba ta hospitalisa den ICU na Colombia.
DVG a informa den su resumen di ayera cu ademas di e 16 persona den ICU na Colombia, tin 14 persona hospitalisa na Aruba, di cual 4 ta den Unidad di Cuido Intensivo y 10 ta riba piso general.
Ademas, DVG a informa cu segun su resumen, ayera tabatin 19 persona cu a recupera di e malesa causa pa e virus SARS-CoV-2, mientras cu a registra 19 caso nobo di Covid-19, di cual tres no ta residente. E cifranan aki ta representa un tasa di positividad entre nos residentenan di dies porciento.
E cantidad di casonan activo di Covid-19 ayera tabata 177, y e cantidad di morto no a conoce aumento y ta na 171.
Datonan di DVG ta ilustra casonan nobo di Covid cu un averahe semanal di 16 caso pa dia y un averahe di tasa di positividad semanal di diesun porciento pa dia.
