MOU entre Minsterio di Salud Publico y Stichting BOB a keda firma!
Diahuebs mainta a tuma lugar e firmamento di un Memorandum Of Understanding (MOU) entre Ministerio di Salud Publico y Borstkanker Stichting Bevolkingsonderzoek Aruba (BOB). Esaki a sucede den cuadro di e plan nacional multisectoral di prevencion di NCD’s.
E acuerdo aki cu Minister Dangui Oduber a firma ta haci posibel pa intercambia datonan entre Ministerio di Salud Publico y BOB haciendo uso di e Aruba Health App (AHA), cu lo bin na vigor entrante e fecha di 1 di januari 2022.
Segun un comunicado di gobierno, door di haci uso di e AHA lo haci cu e trabaonan ta bay na un manera mas eficiente y tambe ta mas facil pa yega na e comunidad den cuadro di prevencion di malesanan cronico. Den e caso di stichting BOB esaki ta nifica cu nan lo por haci deteccionnan na tempo di cancer di pecho pa asina trata esaki na tempo y preveni posibel complicacionnan.
E AHA ta bay percura pa hisa e nivel di servicio pa cu e cliente, pronto via bo celular mes bo lo por haci invitacion y tambe traha un cita pa haci screening na Stichting BOB. Via e portal di e AHA e cliente di BOB lo haya acceso na BOB su sistema digital y asina por haci su afspraak pa screening. Di e manera aki e cliente tin mucho mas transparencia, e cuido ta netamente den bo man a traves di e Aruba Health App.
Minister a señala cu screening di cancer na pecho na tempo por evita complicacionnan a largo plaso cu por tin hasta morto como consecuencia. Ta hopi importante pa ta na tempo ora ta trata di bo salud p’esey Minister Oduber ta keda zorg pa trece e tipo di innovacionnan aki cu ta facilita e comunidad di Aruba.
E mandatario a elogia e trabaonan cu e stichting ta haciendo den cuadro di prevencion y tur locual cu nan ta haciendo pa cu e cuido di e comunidad di Aruba. Minister Dangui Oduber kier a gradici DVG y Sr. Lucas cu ta e voorzitter di Stichting BOB, esaki ta mustra cu trahando hunto bo ta logra.
