Dialuna ultimo Minister di Salud Publico Sr. Dangui Oduber a reuni cu e Asociacion di Fisioterapistanan (AVF) na bestuurskantoor.
Segun un comunicado di gobierno, e tabata un bon reunion caminda e directiva a haya e oportunidad pa presenta nan puntonan di preocupacion pa cu cuido medico di Aruba na e mandatario. Fisioterapistanan tin un rol hopi importante den henter e plan nacional di prevencion di malesanan di NCD’s.
Motibo di esaki ta cu den cuadro di e clinica di prevencion e fisioterapistanan lo tin e tarea importante pa duna guia den e estilo di bida cu un pashent mester hiba. Minister Dangui Oduber a mustra nan riba e vision di Ministerio di Salud Publico cu ta basa riba e parti di prevencion. Di otro banda e mandatario a scucha algun punto di preocupacion di AVF. AVF ta desea di por traha mas di cerca cu e dokternan di cas y tambe cu e specialistanan cu ta e segundo liña di cuido, specialmente ora ta trata di referi casonan agudo (acuut gevallen, casonan serio). Durante e reunion aki minister Oduber a splica cu NO lo saca fisioterapia for di e pakete di AZV cual tawata un di e preocupacionnan di e asociacion.
Minister Oduber a haci palabracion cu AVF, cu lo bay involucra nan den e plataforma cu ta dirigi e plan nacional di prevencion di NCD’s. Di e manera aki nan por traha mucho mas di cerca y di e manera aki acelera e parti cu ta referi e pashentnan den e cadena di cuido, drechando asina e proceso pa evita cu lo por tin tratamento cronico.
Otro punto cu AVF a trece dilanti na e mandatario ta e hecho cu e cantidad di pashentnan cu ta haci uzo di fisioterapia a aumenta. Esaki ta debi na e edad di e poblacion cu a redobla, e accidentenan cu ta tuma lugar y tambe e pashentnan cu a haya COVID y mester di fisioterapia.
Minister Dangui Oduber a keda masha satisfecho con e reunion a bay caminda AVF a mustra boluntad di nan banda pa traha na mehoracion di e cuido aki na Aruba.
