Ayera a keda presenta un proyecto nobo y innovativo pa pueblo di Aruba cu ta yama Les-A-Thon, manera Vanessa Croes di Stichting Kids Creation Center a informa, pa asina conmemora luna internacional di Derecho di Mucha y siman di Buki y Lesamento.

El a sigura cu e proyecto aki lo cuminsa dia 1 di november na unda cu durante 30 dia lo tin un marathon di lesamento dirigi pa muchanan di Aruba cu ta invita pa lesa tur dia 15 minuut te cu 30 di november pa asina “lesa cu alegria”.

Croes a informa cu nan tin un pakete pa tur mayor di mucha por registra pa motibo cu e Les-A-Thon aki ta uno cu tin un lista di aventura cu muchanan lo ricibi na momento cu lo registra na nan pagina di Facebook Scol Amplio Nos Cosecha of na number di telefon 5670521.

“Den e pakete bo lo ricibi un lista di aventura cu bo por lesa na lama, riba cama y tin hopi idea mas pa bo lesa y pasa bon”, Croes a señala.

Esaki ta un iniciativa conhuntamente cu Biblioteca Nacional di Aruba, Scol Amplio Nos Cosecha y Asociacion di Trabao pa Hubentud di Aruba (ATHA) caminda cu esaki ta su prome edicion, Croes tambe a informa cu pa esunnan cu lo registra lo tin diferente premionan.

“Participa den e Les-A-Thon, lesa y desaroya pa na final gana premionan pa henter famia”

Lesamento pa muchanan ta hopi importante pa asina nan por siña y haya conocemento pa nan por expresa di un miho manera, esaki ta trece cune beneficionan pa futuro y ora nan ta cuminsa haciel’e for di chikito esey ta yuda pa nan por papia cu mas fluidez, desaroyando nan concentracion, memoria, imaginacion y agilidad mental pa muchanan por bisa loke nan ta pensa y sinti.

No ta necesario pa papia tocante un cantidad di buki cu muchanan tin cu lesa, mester tene na cuenta pa loke nan ta mustra mas interes y ta genera placer pa lesa, no di un forma obligatorio.

Tambe mayornan tin e labor di prepara e muchanan prome cu lesa y haci siguimento despues, ta recomenda pa pone muchanan den contacto cu lesamento for di e prome aña.

Den caso aki, por cuminsa cu bukinan cu imagen grandi y poco texto, cu despues lo por amplia a medida di edad di e mucha, ta bale la pena pa “perde tempo” cu e muchanan y lesa bukinan na nan pa conta historia pa motibo cu e efectonan por ta hopi positivo.

E ta enrikece e relacion entre adulto y mucha, akinan e mama y tata ta esunnan encarga di mustra nan yiu e maraviya cu e buki ta presenta y e mucha por descubri un mundo diferente, ademas e tempo di lesamento aki gratificante tanto pa e mucha como pa e mayor, por ta prome cu e mucha lo drumi pa siña su yiu e magia cu e buki tin den dje.

Ademas e mucha ta cuminsa conoce e mundo cu tin rond di dje, e ta cuminsa conoce su mes y domina su entorno, e buki lo ofrece experiencianan na futuro.

Tambe ta importante pa nan por tin un bon ambiente pa lesa, un ambiente comodo y cu hopi luz, na unda no lo tin distraccion como television, telefon of un tablet. Laga e mucha scoge kico e kier lesa, pa di e forma ey e por haciel’e cu mas interes.

Pa finalisa, mayornan tambe por cuminsa tin un variedad di bukinan na cas pa asina nan por tin contacto cu lesamento, tambe ta un bon idea pa bishita un biblioteca pa di e forma ey nan por cuminsa haya interes pa busca bukinan, descubri lecturanan nobo y tur e bukinan cu ta existi.