No kier a vota pa un ilusion di integridad

Miguel Mansur no ta intimida pa e trabou Parlamentario, pero si ta un poco desapunta. Pasobra tur cos ta indica cu Aruba ta keda cu e sistema di stempelparlament, unda coalicion ta sostene tur ley y decision di Gobierno y ta ignora cualkier contribucion di oposicion.

Esey e lider di fraccion di Accion21 a bisa Bon Dia Aruba na fin di e reunion publico riba e ley di limitacion di productonan di tabaco. Un reunion cu den su concepto, tabata mas bien un papiamento na cantidad ken mester tuma credito of no.

Contra ley di integridad

Segun Miguel Mansur, el a vota contra e Ley di Integridad pa e simpel motibo cu e no ta cumpli cu su meta. “Miho keda sin pasa un ley cu pasa e ilusion di un ley.” Riba dje, e lider di Accion21 ta haya straño cu aunke cu e concepto tabata cla pa tres luna caba, a warda pa Gobierno MEP-Raiz forma pa trata e ley. “E motibo pakico kier a pasa e ley ta pa no pasa berguensa? Por a haci’e prome cu Gobierno a forma.”

Riba dje, tanten cu e Formado ta keda un persona politico, ley no ta bay yuda, pasobra cada un di e asientonan ta di Gobierno y e ta keda un conflicto di interes. Inicialmente Mansur a entrega un amienda pa pone e minimo nivel di estudio pa Parlamentario na HBO, pero a dicidi pa saca e criteria for di su amienda pa haya mas sosten. Otro punto cu e ta kere den dje ta cu e Formado no por ta un persona politico y kier duna Parlamento un papel den e proceso di screening. E proposicion di Accion21 ta pa un comision di Parlamento consistiendo di lidernan di fraccion por haya bista den e documentonan di screening, kizas na Gabinete di Gobernador y cu presidencia di e comision ey mester bay pa lider di e partido di oposicion mas grandi.

Ta pa medio di legislacion asina aki por yuda Parlamento funciona mas independiente di Gobierno. Pasobra na e momentonan aki, ta coalicion tin presidencia di tur e comisionnan parlamentario, cu ta nifica cu ta MEP y Raiz ta determina e agenda di e reunionnan. Ta nan por permiti e comisionnan funciona of no. Den otro palabra, dor di legalisa procesonan, entre otro den e ley di screening por a percura cu Parlamento por funciona miho.

Ilusion di integridad

“Tur mocion di coalicion a pasa, y tur mocion di oposicion a keda rechasa.

Consecuentemente, e no por kita di e impresion cu e tratamento di e ley tabata mas bien un formalidad. Pero e no ta resolve e problemanan cu ta biba den e ultimo formacion. Y mescos cu tabata e caso cu lider di MAS, Marisol Lopez Tromp, Miguel Mansur a remarca cu e decreto nacional di 2013 ta mas completo ainda cu e ley actual. Particularmente ora ta trata e relacionnan di un Minister. E decreto nacional tabata exigi un screening di tur famia te na di tres grado, y e ley cu a pasa no ta rekeri esey, ni sikiera ta exigi screening di personanan hopi yega na e candidato pa Minister. “E ley no ta suficiente amplio. Un Minister por tin un pareha otro cu su casa y cu por tin un conflicto di interes. Pero e relacion por ta un bisiña of un amigo. Nos amienda a propone pa amplia e screening. E no mester ta limita unicamente na famia.” Mansur ta kere cu unabes cu e caso contra entre otro Benny Sevinger sigui cana, cu e ta bira cla pa hopi den comunidad, cu relacionnan, amistadnan di un mandatario tambe mester keda investiga pa evita conflicto di interes.

E lider di Accion21 a bisa cu miembro di fraccion di Raiz, Misha Raymond, aunke cu el a vota contra e amienda a acerk’e pa bisa cu e ta de acuerdo cu hopi punto, pero cu e amienda ta hopi amplio. Ta Raymond a sugeri pa reuni despues pa manda un nota di cambio den e ley, y cu Raiz lo sostene esey. “P’esey ma vota contra, pasobra no tin urgencia. Gobierno lo sinta pa cuater aña si tur cos bay bon. Awor aki mi a tuma un posicion cu nan ta bay bende e idea cu awor cu a pasa e ley di integridad, cu tur hende ta integro. Esey nan ta bay bende na pueblo y esey no ta e berdad.” Den otro palabra, esey ta e ilusion cu a crea cu e tratamento ayera.

Stempel Parlament

Pa Mansur, te ainda e trabou di Parlamento ta un poco decepcionante, pasobra e ta mustra cu ta continua cu stempel parlament. Tur peticion di coalicion ta pasa, y ta nenga tur di oposicion. “Ta un biaha so, cu Raiz a vota diferente cu MEP y tabata trata riba e tema di deadline pa manda pregunta. Pero te awor, mi ta keda cu e impresion cu e instruccion ta bin di bestuurskantoor pa Parlamentarionan implementa. Mi no a mira un Parlamento independiente. Y e procesonan ta cana hopi lento.”

Motibo ta cu no tin un kalender pa tur Parlamentario sa cua ley lo bay trata den tanto tempo. Ta e Presidente di Parlamento ta dicidi cua ley ta trata ki dia. “E siman aki tin cuater reunion publico. E invitacion pa tur cuater a sali siman pasa Diahuebs despues di e ultimo reunion publico. Mi ta haya cu e ta un forma di traha adhoc. Mi ta compronde cu mester tene cuenta cu nan mester nan Parlamentarionan presente pa forma quorum.”

Pero Mansur tin speranza despues cu Sr. Raymond Kamperveen di Raiz a indica cu e tambe kier mira un kalender, pasobra asina Parlamentarionan por haya tempo pa prepara debidamente riba un ley specifico, entre otro reuni cu stakeholders. “Pero si ta haya invitacion 72 ora prome cu tur cuater reunion, ta cera e porta pa e sesionnan informativo. Si mi tabata sa cu e ley di screening lo a bin e siman aki, mi lo a haci mi investigacion mas profundo y prepara e amienda miho.”

En todo caso, Mansur kier mira un Parlamento mas dinamico, cu Parlamentarionan cu tambe a pasa screening.

Benny Sevinger

Miguel Mansur a bisa cu modificacion di e ley lo por trece claridad riba e posicion di Benny Sevinger, cu awor particularmente fraccion di MEP ta usa pa continuamente ataca oposicion. “Sr. Sevinger a haya voto preferencial y pa ley e tin derecho pa ta den Parlamento. Kizas nos por a prefera pa pueblo a vota diferente pero e ta legitimamente eligi. Y segun nos democracia, pueblo tin derecho di scoge ken kier pa represent’e. Y Sr. Sevinger tabata presente na tur reunion publico, aunke mi a ripara cu e ta keto. Pero MEP ta haci politica cune. Mi ta compronde. E no ta ideal pa un Parlamentario ta un sospechoso, bou investigacion. Pero Gabinete Wever Croes tambe tin ex Minister bou investigacion y nan no ta directamente eligi. E ta tristo si, pero e ta mas bien un reflexion di e politica di ultimo 20 añanan.”

Papiamento of Hulandes

Mansur a keda informa na prome instante cu e por a entrega su amienda na Papiamento segun e ley cu a pasa na 2003, pero despues mr. Carlos Guaimo di Raiz cu ta bin di Direccion Legislacion y Asuntonan Huridico a clarifica cu esaki ta conta pa mocion so y no amienda cu si mester ta na Hulandes, ya den e mesun ley di 2003 tin un clausula special pa amienda. A traduci e amienda y a entreg’e. E momento ey, mr. Edgard Vrolijk cu a defende e ley pa motibo cu e ultimo version tabata un iniciativa di su persona hunto cu Rocco Tjon a remarca riba e hecho cu mester a bay traduci e amienda na Hulandes y cu ta duna Griffier trabou na ultimo momento. Mansur a hari cu e pregunta y a bisa cu e persona cu a yud’e cu e traduccion ta otro persona trahando na Parlamento. “Es mas, el a bisa mi cu si otro biaha mi tin amienda, pa mi mand’e adelanta y den fin di siman lo por skirbie na Hulandes. Griffier y staff di Parlamento t’ey pa yuda tur Parlamentario.” Mansur no a tuma e critica di Vrolijk personal y a bisa cu esey ta parce di ta parti di e cultura di mama gai (banter). “Mi no a tuma ningun ofensa.”

Pa loke ta e acusacion cu el a tuma credito cu awor tur Parlamentario tin nan nomber na e luga di parkeer auto? Aki tabata unda e Parlamentario a cuminza hari, pasobra ya cu e instancia cu mester haya credito ta DOW. “Ta nan a pone e borchinan. Pero por lo menos awor, despues di cuater aña, tur Parlamentario sa cu unda nan por para na auto,” tabata e comentario di Mansur.