(CNN Español) – E maximo hefe di Clan del Golfo y e narcotraficante mas busca di Colombia, Dairo Antonio Usuga, alias “Otoniel”, a wordo captura diasabra ultimo, segun fuentenan di gobierno y Polis Nacional a indica na CNN.
“Esaki ta e golpi mas duro cu a duna na narcotrafico e siglo aki na nos pais. E golpi aki ta comparabel solamente cu e caida di Pablo Escobar den añanan 90”, e presidente Ivan Duque a bisa den un declaracion publico despues di e captura.
“Asesinonan di polis, di militarnan, di lidernan social. Ademas nan ta busca muchanan menor di edad, nan ta abusa di nan y di adolescentenan. No solamente e tabata den e cartel di esunnan mas busca pa narcotrafico y reclutamento, sino tambe pa abuso di muchanan menor” e mandatario Colombiano a agrega.
Despues Duque a informa riba su cuenta di Twitter cu Usuga a wordo hiba na Bogota y a publica un video di e momento cu un avion a sali for di Polis Nacional.
Ministerio di Defensa di Colombia ayera diadomingo a confirma cu Usuga lo wordo extradita pa Merca, pero te awor e fecha no ta conoci.
Clan del Golfo ta un grupo delictivo hopi temi pa narcotrafico y extorsion. Antes tabata conoci como Clan Usuga, entre su lidernan tin ex-narcotraficante y ex-paramilitar na unda a nace e desmobilisacion di Autodefensa Uni di Colombia (AUC) grupo paramilitar di extremo derecha na aña 2006.
Usuga tambe ta wordo busca pa Administracion di Control di Droga (DEA na Ingles).
E hunto cu otro miembronan di Clan del Golfo ta acusa di opera empresanan criminal, participa den conspiracion internacional di trafico di cocaina y usa arma di candela pa promove delito di trafico di droga.
Pa su captura, Merca a ofrece un recompensa di 5 miyon dollar.
