Segun Organisacion Mundial di Salud 1 riba cada 5 hende muhe ta cay bou di e asina yama “pobresa menstrual“ den region di Caribe y na Hulanda 1 riba cada 10 hende muhe pa motibonan financiero no por cumpra “maandverband”/kotex.

Pobresa menstrual ta nifica falta di acceso na productonan di uzo personal pa e periodo di menstruacion, manera p.e. “maandverband”/kotèks. E pobresa menstrual aki a bira aun mas tanto den nos region y mundialmente debi na e pandemia di COVID-19.

Segun estudionan haci den region di Caribe e hende muhe hopi biaha mester scoge entre cumpra cuminda pa su famia of cumpra producto pa su higiena personal. Den mayoria caso e hende muhe ta scoge pa buta su higiena personal un banda pa por duna su famia di come. Esaki ta un situacion ku aki na Corsou tambe nos ta tuma nota di dje.

Segun UNICEF mucha muhenan hoben cu ta bay scol ta perde un promedio di 5 dia di scol pa aña pa motibo di pobresa menstrual. Esaki ta mina e drechi universal di e hoben pa por tin acceso na educacion sin barera. Aki na Corsou na diferente ocasion nos a haya señal cerca docentenan di e situacion aki. Tambe nos ta keda acerca pa mamanan cu ta pidi nos ayudo financiero pa por cumpra productonan di uzo personal pa nan menstruacion.

Lamentablemente na Corsou nos no tin nos propio estudio riba nos pobresa menstrual manera otro paisnan.

Na Corsou tambe hopi hende muhe ta pasa den situacion ferfelo of nan ta perde dia di trabou of di scol pa motibo cu no tin cen pa cumpra productonan di uzo personal pa su menstruacion. Hopi hende muhe ta haya nan den e situacion cu e menstruacion ta presenta na boca di trabou, scol of un luga publico y nan no tin e productonan cu nan tin mester di dje.

E situacion aki tin como consecuencia cu e hende muhe no por saca su maximo potencial. Esaki ta contra dignidad humano cu ta un di e pilarnan solido di ideologia di Partido MAN como Social Democrata.

Den cuadro di empoderamento di nos hende muhenan, Ala Femenino di Partido MAN ta organisa riba diasabra 30 di october y diasabra 6 di november 2021 proximo di 9:30or di mainta pa 12:30or di merdia un “drive thru” caminda cu sosten di pueblo di Corsou nos lo bay colecta productonan di uzo personal pa menstruacion. E “drive thru” lo tuma luga na sede di Partido MAN. Tur loke keda colecta riba e dos dianan aki lo keda reparti entre Voedselbank y scolnan basico y avansa.

Di e manera aki Ala Femenino di Partido MAN ke demostra cu menstruacion no mag di conduci na miedo, exclusion y berguensa, pa motibo cu biba cu dignidad durante menstruacion tambe ta un derecho humano.