Pa Tony Geerman, awa a pasa hariña. E ta rabia y sigur cu e habitantenan di Santa Lucia cu ta parce di no ta interesa pa cuida nan bario. Geerman, un contratista di Serlimar encarga cu limpiesa di bario a notifica Bureau City Inspector, BCI cu tin sushi benta banda di caminda na altura di Santa Lucia. Pero locual Geerman mes no a ripara na prome instante, ta cu e sushedad ta mas spantoso cu e mes a kere.
Ayera vocero di BCI Robby Rosel hunto cu city inspector, y sr. Bob Ras encarga cu e trabou di limpiesa di bario pa Serlimar a yama medionan di comunicacion na e dump ilegal na Santa Lucia pa experiencia di cerca, e desaster ambiental den un di e areanan natural mas bunita di Aruba. Carcas di dos porco grandi, sero di botternan di plastic, resto di sushi di construccion. Hasta piscadonan ta bin tira resto di pisca y cocolishi na e area, ademas cu tin un area unda tabata kima tubo di koper, banda di un mangazina tradicional y un renbak bandona, pero si yena cu sushi. Den otro palabra, un dump completo.
Segun Rosel, inicialmente a bay e sitio cu e ekipo di limpiesa di Serlimar asina cu a ricibi e denuncia. Pero ora cu a yega y a ripara cu e sushedad ta extende te mas patras, cu a conclui cu ta trata di un caso mucho mas serio. Tin un cantidad grandi tira den e mondi aki na Santa Lucia. E ta asina un malhecho cu ciudadanonan ta drenta mondi y tira sushi di forma aki.” Rosel no ta duda cu ta hende di e propio bario. “Nos ta haya yamada tur dia di sushedad na cantidad cu ta asotando Aruba.
Corda bon cu nos tin un dump pa tira e desperdicionan.” Robby Rosel ta urgi pa ciudadanonan asumi responsabilidad y deshaci di sushi den forma responsabel. Pero locual e ta haya preocupante ta cu riba e tereno encuestion, a haya indicacion cu pa hopi tempo ta kima koper y Rosel ta bisa cu ta increibel cu ningun bisiña por a tuma nota y yama autoridadnan. “Nan no por laga di haya holo di huma y holo di e koper kima, Rosel a bisa.
No por hunga ‘mooi weer’ mas, Nos ta den un bunita bario, naturalesa asina bunita. Pero mi tin cu yama e habitantenan pa hendenan sin escrupulo, pasobra nan no ta haci nada pa stroba e sushamento. Nos ta cansa di conscientisa di e pueblo di Aruba,” Tony Geerman a sclama. “Nos mester manda un advertencia ‘loud and clear’ pa pueblo di Aruba, pasobra ta ora pa stop e sushamento.
Esun cu nos gara, tin cu paga pa tur e bagabunderia, pasobra ki bal awe ta haci e luga aki limpi y mañan ta hay’e sushi bek. Corda bon, ta hopi placa mester hinca pa haci e luga aki limpi. Nos no ta baby sitter, pasobra ta hende grandi ta haci e cosnan aki.
Nos ta papiando cu pueblo di Aruba aña den, aña afo. Nos ta den tempo moderno. Unico manera cu ta sinti’e ta den saco.” Saca multanan for di lachi Segun Geerman, e problema ta cu e multanan ta hinca den lachi. Ta ora pa pone mocionnan di Parlamento den accion. Kier camera, cu night vision y motion detector pa por gara esunnan cu ta daña medio ambiente y ta susha Aruba sin merced. Y ta esnan cu ta susha mester paga pa tur e trabou. E trabou ta di cada Arubiano pa percura cu e luga no ta sushi. Ora mi ta bezig ta trahando aki, mi ta mira habitantenan ta pasa, nan no ta ni para wak si ta sushi mi ta bentando aki of ta sushi mi ta recog’e. Para, boso ta doño di e bario. Aruba ta nos cas. Para puntra kico ta hacienda. Pues si tin un auto cu sushi, para puntra. Pero Geerman ta lamenta cu hopi na Aruba no ta mustra interes pa tuma accion contra sushamento. Den su concepto, hendenan asina ta mes culpabel cu e sushadonan, pasobra e actitud pasivo aki ta contribui na sushamento. “nos mester papia duro. Ya no por hunga mooi weer, y uza palabra suave. Aruba ta un pais asina chikito, nos ta bibando di turismo. Cada un ta biba di turismo Y nos kier un Aruba limpi, nos kier lag’e limpi pa generacion futuro. Santa Cruz ta sushi. Segun Geerman, un di e barionan mas sushi di Aruba ta Santa Cruz. Rosel di BCI a confirma y a bisa cu otro barionan ta San Nicolas, Zeewijk y Dakota. Pero pa Geerman e ta haci dolo pa bisa cu Santa Cruz ta sushi. “Ta e bario cu mi mes ta biba aden. Pero tur diasabra, tanto ami cu su señora ta cana den nan bario ta piki sushi. Pakico? Pasobra nos ta stima Aruba.” E ta tin un whatsapp chatgroup cu su bisiñanan cada uno ta informa otro di cosnan cu ta pasando, sea ta ladronicia of sushamento.
Nos mester uni mas pasobra si nos sigui asina, e ta bira un ‘free for all,’ unda muchanan ta lanta keriendo cu ta asina cos mester ta. Nos a cansa di conscientisa, ta advertencia mester manda. Manera mi hefe, Bob Ras ta bisa, ta den cartera hende ta sinti. Gara un sushado awe, boet e 250 florin. Gar’e otro biaha, otro 250. E di tres biaha, 500 florin y saca su potret den tur medio di comunicacion pa tur hende haya sa ken no ta stima e pais aki. Ya no ta por sigui papia suave mas. Mi ta spera cu Gobierno y Parlamentario saca e leynan for di lachi y no laga nan pa pronk, manera e ley di cacho. E toro, ta na cacho mester gar’e. Pasobra si gar’e na rabo, e ta cachabo na mal caminda.”
Bob Ras di Serlimar ta de acuerdo.
E mes tin ocho aña ta mira cu no tin mehoracion den e comportacion di e ciudadano y maneho di medioambiente. Ademas cu Serlimar awor lo mester inverti 400 florin pa ora pa algun di na ekipo pisa, e ta un desgaste riba e animo pa mantene e isla limpi. Pasobra ta haci limpi un dia, y e siguiente ya e area ta sushi atrobe.
Di otro banda Robby Rosel a bisa cu tin ehempel cu intervencion cu camera y boet ta yuda. Hooiberg ta un ehempel. En todo caso, awor ta investigando si e tereno ta di Gobierno of ta erfpacht, pa asina por determina ken ta responsabel pa e dump. Pa otro siman lo tin contesta oficial di ken e tereno ta pa asina por dicidi pa cera acceso na e luga.
Mester bisa cu Bon Dia Aruba a ricibi e notificacion cu BCI ta papia di dumpnan ilegal, pero formalmente hasta Parkietenbos ta un dump ilegal. Ta opera henter e dump cu un decreto ministerial, sin cu tin un base legal, sin cu e ta cumpli cu e hinderverordening. Den otro palabra, hasta Gobierno no ta cumpli cu leynan medio ambiental.
