Recientemente Minister di Husticia y Asuntonan Social Rocco Tjon a reuni cu sra. Sue-Ann Ras, pa ricibi informacion di e ‘nulmeting’ cu a wordo haci riba e tema di ‘kinderopvang’. E nulmeting ta encera diferente tema manera: tocante di personal, seguridad, pedadogico y salud y higiena.

‘Nulmeting’ ta un inventarisacion di e situacion actual, na unda cu e investigacion ta duna un bon bista di e kico a wordo haci y locual ta sosodiendo. Resultado di e investigacion por wordo uza pa trabounan cu ainda mester wordo haci. Minister Tjon a duna di conoce cu e team cu tabata encarga cu esaki a percura pa tin participacion di mayoria di e centronan. E 28 centronan cu a participa ta duna un bon bista di kico ta ‘come y bebe’ den e centronan aki.

‘Mi lo reuni e siman nos dilanti cu diferente centro cu a pidimi un reunion, pa di e forma aki mi mes tambe scucha di nan banda di e situacion cu ta biba cerca nan.’

E mandatario a sigui splica cu e Landsverordening kinderopvang ta uno cu ta data bek for di 2017. Banda di e nulmeting cu a wordo haci aworaki, tin diferente rapport, tratado y ley cu ta fungi como base pa locual cu tin riba mesa. Por ehempel rapportnan di KPMG, di Unicef, di Sociaal-Economische Raad (SER) y tambe ‘advies nota’s’ cu a wordo traha.

Un otro parti importante pa menciona segun e mandatario ta cu e ekipo a percura tambe pa por bin un opleiding riba MBO Niveau 3. A tuma nota cu tin hopi interes den esaki, y ya caba tin varios cabesante di e diferente centronan cu a inscribi (56 persona). Minister Tjon a duna di conoce cu e estudio ta den preparacion y teniendo e presupuesto di Ministerio na cuenta, lo haci e maximo esfuerso pa e estudio aki por tuma luga pa aña 2022.

Minister Tjon a enfatisa cu a pesar di tur e trabou y bon noticianan, ainda tin diferente Landsbesluit cu mester wordo traha pa reglamenta por ehempel: ora cu un persona tin un keho, registro, supervision, Ministeriele regeling cu mester traha ainda manera e vergunnigsvoorwaarden y tambe exigencianan di calidad.

‘Pues e ta un proceso andando y nos ta contento cu loke tin riba mesa y cu tur e trabou cu a wordo haci. Aworaki ta den e fase pa scucha otro partidonan y dentro di poco lo reuni cu representantenan di e diferente centronan na Aruba, Minister Tjon a termina bisando.