Huursubsidie mester…Resolve problema vivienda social…?

E partido grandi den oposicion a sali cu un propuesta pa subsidia huur, cu ta mustra a primera vista interesante, pero no ta toca par di e aspectonan importante di e problematica di vivienda social na nos isla. Logicamente nan constatacion ta corecto, cu pa via di e crisis di Covid-19 mas persona y famia ta luchando cu nan finanzas y por lo tanto tambe cu pago di huur. Tambe cu prijs di real estate y material di construccion ta keda subi, loke lo mantene influencia di aumento riba prijs di huur. Por lo tanto anto e propuesta pa gobierno, for di medionan general, cu ta hopi scars caba, cuminza un programa di huusubsidie, pa baha e presion financiero riba e famianan cu ta den e situacion describi.

Ban cuminza pa purba analiza kico ta posibel banda positivo di un tal plan. Na promer lugar e personan cu ta probecha di un areglo asina, cu no lo perde nan lugar di biba via e aumento di nan entrada aki, riba loke nan tin caba eventualmente di trabao o beneficio social (bijstand). Esaki lo ta un avance financiero cu no lo topa cu hopi resistencia cerca esnan den e situacion ey. Di otro banda, e grupo di doño di vivienda y apartamento lo ta satisfecho, pasobra e medida lo reduci e grupo di mal pagador y lo garantiza pago na tempo. Ningun medida por ser tuma sin cu tin un otro banda di e medaya. Den e caso particular aki e aspecto mas negativo ta e suma considerable cu gobierno lo mester pone disponible pa financia e areglo aki. Esaki fuera di e discusion – politico – di e necesidad/deseo di tal medida. Si segun CBS como 22% di persona/famia ta biba den cas o apartamento di huur, esey lo por yega na mas di 8.000 caso. Ban supone cu 50% di nan lo ta cualifica pa un subsidio, pa via di nan situacion financiero. Tuma na cuenta cu e cifra aki ta solamente un presuposicion, pa facilita un calculacion di gasto. Si 4.000 beneficiado ricibi cada luna Afl. 100 di subsidio, esaki ta percura pa un suma mensual di 400.000 florin, pa aña casi 5 miyon florin di gasto. Tuma na cuenta cu e suma final di un operacion asina por ta un ‘factura’ di varios miyon mas, aparte di e gastonan cu gobierno tin pa maneha henter e asunto. Anto esey den un tempo cu mester busca forma di baha gasto di e aparato publico…

Finalmente, mester papia tambe di e efectonan cu e medida lo tin riba mercado di vivienda. E mercado aki nunca ta un totalidad estatico, y lo ta logico cu doñonan di propiedad lo cuminza busca tur forma – legal o ilegal- pa aumenta huur. Y no bisa cu esaki no lo sucede, nos por a mira e cosnan aki pasa varios biaha caba, unda gobierno por tuma cierto medida, pero no tin e instrumentonan di control pa mantene orden den e sistema, y e iniciativa priva ta prevalece.

Pero, e iniciativa aki ta trece mas cos dilanti, cu talvez e partido no a considera. Ora nos tira un vista mas amplio riba e materia aki, mester constata cu tur e placa cu un gobierno lo por hinca den un proyecto asina lo beneficia e propietario y inquilinonan, pero practicamente no ta toca e problema grandi di escasez di vivienda pagable na nos isla. Y den e contexto aki ta bon pa recorda e partido aki riba nan propio pasado recien den gobierno, unda no a haci absolutamente nada pa vivienda popular, pero tabata biba cu nan cabez den nubia cu e consigna idiota di e “Aruba di cinco strea” unda supuestamente cualkier Arubano por a haya un pida tereno pa traha su cas, despues cuestion di djis bay banco pa cualifica pa un hipoteca y ya… Nos ta un periodo di gobernacion aleha caba di e tipo di politica nonsense ey, y por lo menos a drenta caba e realismo cu no tin tereno mas pa emiti manera semper a haci. Ademas cu e realidad di Aruba no a cambia, unda dos tercera parti di e poblacion no tin un base financiero cu cual nan por bay busca financiamento. Solucion di escasez di vivienda mester bin di construccion vertical, pero cu enfasis riba vivienda traha pa yuda esnan di menos recurso.

Lamentablemente e ultimo proyecto di gobierno actual hunto cu sector priva, den e area hotelero, ta di apartamento luhoso pa esnan cu por afford esey, sin duda tambe un necesidad y ademas un sector di mercado financieramente atractivo, pero cu no tin nada que ver cu e problematica di vivienda pa esnan cu no por yuda nan mes, cu ta e gran mayoria. Di e manera aki ya pa varios aña nos ta lidia cu maneho deficiente di vivienda popular, unda no ta mira mucho analisis drechi ta keda publica, unda ta conta bon cla unda nos ta para. E ultimo intento aki di e partido den oposicion ta parce nada otro cu un invento politico pa pone gobierno den un ‘tight spot’: Si nan cumpli, ta un victoria pa esun cu a propone; si nan nenga e ta bira un arma den siguiente eleccion. Loke en todo caso ni remotamente e ta, ta un solucion pa e problema di vivienda popular.