(AP) – Ehecutivonan di Microsoft a bisa cu den ana 2008 nan a adverti Bill Gates pa stop di manda mensahenan inapropia na un empleado femenino di e compania, pero no a duna siguimento na esaki pa motibo cu Bill a sigura cu e lo stop di haci esaki.

The Wall Street Journal tabata e prome cu a reporta cu Brad Smith, ken tabata Microsoft su consul general y awo ta e compania su presidente, y un otro ehecutivo a reuni cu Gates despues cu e compania a descubri e-mail inapropia na empleadonan di nivel medio.

E corant a reporta cu Gates no a nenga e acusacionnan, y cu miembronan di Microsoft su administracion cu a ser informa tocante e incidente, a dicidi di no tuma mas accion pa cu e incidente pa motibo cu ningun accion fisico a sosode entre Gates y e empleado.

Microsoft a nenga di duna comentario riba dialuna, fuera di confirma e corant su reportahe. Smith no a contesta na un peticion pa comentario haci pa medio di e compania.

E advertencia reporta den aña 2008 a tuma luga mas di un decada prome cu un comportamento similar a causa cu e gigante den tecnologia a contrata un agencia di abogado pa investiga un carta di un ingeniero cu a bisa e tabatin un relacion sexual cu Gates durante varios aña.

E investigacion a precede Gates su retiro di Microsoft aña pasa, pero e no a sali na luz publicamente te despues cu Bill y Melinda French Gates a anuncia den mei cu nan a dicidi di termina nan matrimonio di 27 ana. E divorcio a keda finalisa den augustus. E pareha te ainda ta maneha e Bill & Melinda Gates Foundation hunto.

Gates tabata Microsoft su CEO te cu aña 2000 y desde e aña aki el a keda gradualmente baha su responsabilidadnan den e compania cu el a funda cu Paul Allen den aña 197. El a bay for di un rol di tur dia na Microsoft den aña 2008, y a sirbi como cabesante di e administracion te cu aña 2014.

Vocero di Microsoft Frank Shaw a conta The Jorunal cu e advertencia den aña 2008 di parti di ehecutivonan a tuma luga poco prome cu Gates a retira como empleado full-time. Shaw a conta e corant cu Gates a sugeri un reunion cu e empleado fuera di trabao den e e-mail cu tabatin contenido no hopi apropia, pero tampoco “directamente sexual.”

“Reportahe di Bill Gates su relacion inapropia y avance sexual dirigi na empleadonan di Microsoft solamente a aumenta e preocupacionnan, poniendo den cuestion e cultura cu liderazgo a pone den luga, y e administracion su rol den mantene e personanan culpabel responsabel pa nan accionnan,” a describi den e proposicion di topico pa e reunion di Microsoft anual cu lo tuma luga otro luna.

Microsoft a urgi inversornan rechasa e proposicion den un nota yena di regulacion siman pasa, argumentando cu e no ta necesario pa motibo cu e compania ya a adopta plan di publicamente reporta con e lo implementa e politicanan tocante acoso sexual y discriminacion di genero.