Mientras cu Minister ta reconoce cu AZV no ta sostenibel: No por baha mas gasto sin afecta e calidad di cuido y a informa Hulanda esey

Tin un menasa continuo riba Gobierno, esta si no cumpli cu tur e condicionnan imponi. Aki ta papia specificamente riba e recorte di 60 miyon di gasto di AZV cu segun Minister di Salud Publico simplemente lo no por cumpli cu n’e, sigur no den añanan di pandemia.

Minister Oduber a enfatisa cu a haci tur locual cu por pa baha gasto y apesar di retonan, a logra baha cu 35 a 40 miyon, pero pa 2021, lo no por corta te cu 60 miyon. Esaki el a bisa riba pregunta di Bon Dia Aruba, cu si tur e cambionan den maneho di AZV a logra pa cumpli cu e condicion cu Aruba mes a accepta na Mei 2020.

“Nos ta deliberando pa mira kico ta e pasonan, si en caso cu no bin e ayudo financiero. E bon ta cu turismo ta recuperando, economia ta recuperando y nos no tin e necesidad pa fia e sumanan cu nos tabata fia anteriormente. E ta pone nos den un posicion cu localmente por haya e fondonan cu mester (pa financia operacion di Gobierno),” Minister di Salud, Dangui Oduber a bisa Bon Dia Aruba.

Contribucion propio

Lista positivo y contribucion propio  lo mester yuda baha gasto, pero tin otro area cu por baha gasto. Segun  Director di AZV, ir Edwin Jacobs, MSc, e instruccion di Hulanda pa baha 60 miyon di gasto ta uno hopi grandi, pasobra un di e dimensionnan di sostenibilidad ta e acceptacion social. “Nos mester bay pone prioridad y  haci escohencia y esey ta bay ta e reto mas grandi. Tur caminda cu por corta sin cu e ta haci dolo, sigur lo haci esey. Unda cu no por, lo busca e forma menos doloroso pa controla e gastonan.”  Y den e sentido aki,  Gobierno ta evaluando e socialisacion di contribucion propio, Jacobs a sigui splica, ilustrando cu e sistema mester ta fungi di forma cu mester yuda esnan cu no tin forma pa paga nan contribucion propio.

Minister di Salud Dangui Oduber a agrega cu introduccion di contribucion propio mester sirbi pa baha e cantidad di uso di servicio medico cu ta pone presion riba AZV. “Pero netamente e grupo mas vulnerable, esnan cu malesa cronico, ta esnan cu no tin e placa pa duna e contribucion propio. Normalmente, ora un hende ta saludabel, casi e no ta bay dokter.  Kiermen e contribucion di e grupo aki ta minimo.  Pero ta e grupo cu ta den embehecimento, esta hendenan grandi, net nan lo afecta. Pesey desde un principio ora cu a cuminsa cu e combersacionnan cu Hulanda, nos a bisa cu no por introduci un contribucion propio y lista positivo na momento cu den un pais, unda mayoria hende ta riba FASE of subsidio di salario.”

Segun Minister Oduber, a pidi Hulanda pa laga Pais Aruba recupera, laga turismo y economia recupera  prome . “E ora nos ta habri pa reforma di gastonan structural di AZV. Nos a purba a yuda unda nos por, cu ta e 35 a 40 miyon di recorte den gasto di AZV. Mas leu cu esey nos no por, pasobra e ta bira irresponsabel den e lunanan cu ta sigui.”

Gastonan no ta sostenibel

E Minister ta admiti cu e forma con e gastonan di AZV ta desaroyando no ta sostenibel y hopi hende na Aruba mester realisa cu e cobertura cu AZV ta brinda, ni paisnan desaroya manera Merca ta duna. Paisnan manera Swisa so ta brinda cobertura pa practicamente tur tratamento medico. “Den e caso ey, teniendo cu embehecimento y e hecho cu nos ciudadanonan  no ta esunnan di mas saludabel, nos a laga haci un revision pa haya recomendacion. Y un di e recomendacionnan tabata pa haci uzo di tecnologia, pa brinda servicio medico di forma remoto, pa medio digital. Ta papia aki di e-health, telemedicine cu ta tecnica nobo cu ta considerando, pa mira cua ta e maneho ta responsabel.” Mescos cu Director di AZV a bisa, e Minister a mustra cu  corta den cuido ta doloroso y como tal mester haci’e den forma responsabel, cu no ta afecta e pacient.

Pero locual kier di Hulanda y nunca a ricibi splicacion ta con a yega na e suma di 60 miyon .Esey ta e discusion cu falta cu Hulanda pasobra semper nos a pidi un splicacion con a yega na e suma di 60 miyon cu mester recorta. Nos tur ta conciente cu tin espacio pa corta y nos a corta. Pues no ta cuestion cu no tin boluntad pa corta. Nos a haci’e aunke con doloroso e ta.”

Pero segun Oduber, locual Hulanda ta pidi ta algo sobre natural, unda hustamente den aña di pandemia, mientras cu tur pais rond mundo ta inverti den cuido y na Aruba mester a corta. Mas no por corta cu locual a haci caba, pasobra bay mas leu ta afecta e pacientnan.

E Minister a bisa cu ta habri pa Hulanda bin yuda restructura AZV pa busca forma pa haci’e mas eficiente, y garantisa cu e ta keda sostenibel pa sigura cu Aruba ta mantene su Seguro medico general. “Ta facil pa hisa e prima, ta facil pa hisa e BAZV, pero na final di dia mester maneha e gastonan tambe.”

E pais no mas saludabel

Durante Gabinete Wever Croes I, hunto cu PAHO a desaroya un plan nacional di prevencion. Pero pa motibo di e pandemia no por a pone e plan den accion, ya cu mester hinca tur esfuerso pa bringa esaki. Pero awor kier enfoca un biaha mas riba e aspecto di prevencion.

“Nos kier bin cu un centro di obesitas. Mayoria cu a fayece di COVID-19, ta esnan cu tabata obeso y no tabata den e miho condicion di salud. Nan a fayece di COVID pero nan por a muri di cualkier otro virus tambe.” Hospital ya tin un espacio disponible pa e Centro di Obesitas y AZV ta bay yuda den su financiamento. “Ta bay cuminza cu un proyecto piloto, y si e ta exitoso lo amplia e proyecto pasobra na final di dia nos kier un comunidad mas saludabel. Pasobra ta baha e mortalidad y tambe gastonan di AZV. Tur rapport di Raad van Advies, di IMF, di CAft ta señala cu mester traha na forma preventivo. Esey ta nos enfoke di proximo añanan, pa traha den forma preventivo. Pasobra di e forma con e gastonan ta structura ta nifica cu den futuro no por carga nan mas

Saca fysioterapia di pakete

Di otro banda, fysioterapistanan recien a manda carta pa e Minister y tambe pa Parlamento pa protesta e intencion pa saca fysioterapia for di e pakete basico. Nan ta considera esaki un paso robes den e mesun maneho pa traha riba prevencion di malesa. Director di AZV, ir. Jacobs a splica cu ta profesionalnan den cuido a haci un inventarisacion di diferente opcion na AZV, hunto Comision Nacional di Cuido. Awor Gobierno tin e recomendacionnan na su disposicion pero en todo caso no a tuma ningun decision ainda riba si fysioterapia ta keda den e pakete basico of no. “E Comision Nacional di Cuido a identifica e opcionnan si,” Edwin Jacobs a bisa.

Pero mientrastanto AZV a amplia e cantidad di fysioterapistanan den servicio y ta trahando pa percura cu e lista di espera ta bira mas chikito.  Realidad ta cu particularmente den e periodo, hopi fysioterapista mester yuda pacientnan cu ta recupera di COVID-19. Pero mesun cos ta conta pa otro dunadonan di cuido cu ta sinti cu mester mas di nan servicio den e periodo aki di pandemia. Y Edwin Jacobs a bisa cu netamente tur esaki ta bin banda di e instruccion di Hulanda pa baha gasto. “Unda cu bira, e toro ta cachabo.”

Gasto operacion AZV a aumenta.

Mester bisa cu un di e criticanan di e fysioterapistanan ta cu mientras cu tin intencion di kita e terapia for di e pakete basico pa baha gasto, Organo Ehecutivo a mira aumento den gasto di operacion na 2020. Pero Director di AZV Edwin Jacobs tabatin un splicacion. “Mescos cu tur instancia di Gobierno, nos a haci e recorte di  12.6 porciento cu a keda deposita den FASE. Pero no ta mira e recorte den e cifranan di cuenta annual di AZV pasobra el a keda un gasto. Mester a saca e fondonan y mandanan otro caminda, pero e peso financiero a keda di AZV, Jacobs a splica. Mesun cos ta conta pa e five way model, cu tambe a yuda. “Nos a mustra CAft cu nos a logra baha nos gasto di operacion cu dos miyon florin. Prome cu e pandemia, nos tabatin diferente trahado cu tabata yuda y cu tabata di diferente uitzendburos y tur a bay cas.”