Ya caba e tradicional partido politico Dominicano PRD a cuminsa organisa su mes na Aruba aunke eleccion general venidero lo tuma luga na aña 2020, considerando cu nan tin presencia di un comunidad grandi riba nos isla pa basta aña caba.
Ta asina cu e Partido Revolucionario Dominicano (PRD) su seccion na Aruba a nombra un directiva nobo bou encargo di e delegado di asuntonan Caribe, sr. Virgilio Torres. E presidente di e directiva di PRD –Aruba ta e conocido periodista Dominicano y productor di television, Wilfredo Castillo.
Den combersacion cu Bon Dia Aruba, Castillo a manifesta su inkietud pa sigui e linea pensamento y programa di e maximo lider di PRD y Canciyer, Ing. Miguel Vargas Maldonado. Un punto clave tin di haber cu e fortalecemento y vinculo cu semper a existi entre Aruba y Republica Dominicana. Nan kier mantene bibo e herencia politico cu e estadista Dominicano, Dr. Jose Francisco Peña Gomez (d.f.m) a laga atras pa medio di organisacion di Internacional Socialista cu tabata un escenario cua duna su sosten na e gran estadista Arubiano, Betico Croes den su lucha pa Aruba por a logra su Status Aparte.
Castillo a indica cu e cambio y desaroyo riba escenario politico ta parti di un proceso den un sistema democratico. El a referi na e figuranan nobo cu a drenta den arena politico Dominicano. “E caranan nobo di Dominicanonan meritorio ta mustra un vocacion di servicio nan tin como mision pa sigui cu e balornan aki den exterior teniendo na cuenta e elementonan vital relaciona cu derechonan humano”.
Na final, Castillo a haci un yamado na e comunidad Dominicano na Aruba pa forma parti di e proyecto di e partido PRD den cuadro di eleccion venidero.
