(AP) – Un hungado di basketball den universidad a duna luz na e idea despues di a mira un caso di discriminacion casi destrosa su propio ekipo, cual a pone su persona pensa dicon ningun hende no a tuma accion pa mehora esaki ainda.

10 aña despues, e hungado aki a desaroya e idea y a crea un herment clave den drecha e ambiente deportivo unda cu tin hopi caso di abuso sexual, pero tambe caso di racismo y sexismo den e luga di empleo, discriminacion, acoso y te hasta uso di droga den practicamente tur nivel.

E hungado, David Chadwick, a transforma su idea den un compania yama RealResponse, cual ta provee e cliente, cual ta mas tanto departamentonan atletico di universidad y otro organisacionnan deportivo, e tecnologia pa duna atleta y empleadonan un chens pa inicia y entrega keho nan anonimo y na momento cu e incidente tuma luga pa medio di simplemente manda un mensahe di texto.

Riba dialuna, RealResponse a anuncia un trato cu Merca su Anti-Doping Agency, cual lo usa e plataforma como un di su varios recurso pa e personanan reporta nan preocupacion cu nan a ser droga.

Den un señal di e compania su popularidad y rango, cual tambe ta ilustra e rango amplio di posibilidadnan y problemanan cu ta surgi den deporte, RealResponse ya caba tin trato den luga cu U.S.A Gymnastics, e NFL Players Association, the National Women’s Soccer League y mas di 100 universidad su programa di deporte. E tambe ta buscando pa uni cu miles di organisacion y club di deporte pa hobennan na Merca.

“Mi tabata kier a crea algo cu lo resolve un desafio directo, e falta di manera confidencial, directo y anonimo pa atletanan y otronan comparti nan preocupacion y comentario cu administracion,” Chadwick a bisa.

E tecnologia ta diseña pa ta lo mas simpel posibel, specificamente pa un generacion di atleta cu ta custuma caba di haci tur cos riba nan telefon.

E ta permiti atletanan of empleadonan cuminsa un reporte tocante discriminacion den e luga di empleo, violacion di uso di droga, abuso sexual y otro preocupacionnan cu un simpel mensahe. E no tin tur e formulario unda cu tin yena yen di informacion y menu cu normalmente tin riba varios aplicacion similar, e tin privacidad cu ta permiti administradonan ricibi mas informacion di e personanan reportando e incidente mientras cu e ta permiti e persona mantene su identidad anonimo.

E NFL Players Association inicialmente a cumpra e servicio pa duna e atletanan e oportunidad di reporta inconsistencia den e protocol di testnan di COVID-19. Desde esaki, el a expande e uso di e servicio na, segun un relato di prensa, “di manera anonimo y cu hopi siguridad reporta tur y cualkier problema, pa tur cos desde incidente den e campo di training, politica di droga, preocupacion di inhusticia social, problema medico, violacion di politica di COVID-19, mal conducta, acoso y hopi mas.”

E pensamento a cuminsa pa Chadwick tempo cu e tabata hungador di ekipo di basketball na Rice, unda cu un par di hungado a bay for di e ekipo despues di acusa e administradonan di discriminacion.

“Mi a haya mi mes den medio di e problema, sin sa kico tabata tumando luga, y pensando si nan tabata pasando, dicon ningun hende no a bisa algo y trata esaki mas trempan?” Chadwick a bisa.

El a transferi na Valparaiso, y a cuminsa e investigacion. El a tuma contacto cu mas di 200 administrado den departamentonan atletico di universidad, puntrando ki sistema nan tabatin den luga pa ricibi keho y preocupacion di atletanan.

“Mi a tende un tema di varios forma informal di contacto, cosnan manera ‘mi tin un politica di porta habri,’ y ‘mi ta desaroya un relacion cu mi muchanan,’” Chadwick a conta. “Pero no tabatin consistencia. Algun di nan tabata haci esaki sin anonimidad, algun si tabatin anonimidad, algun cu pen y papel, otronan pa medio di tecnologia. En general, tabatin participacion teribel.”

Chadwick su prome version di e sistema a permiti departamentonan atletico conduci encuesta di fin di temporada na e hungadonan. E feedback cu e administradonan ricibi tabata impactante, cuentonan di violacion, uso di droga, asalto sexual, entre hopi otro cos mas.

“E hungadonan a haci hopi uso di esaki y tabata dispuesto pa comparti cosnan hopi intimo, serio y confidencial den e sistema” Chadwick a bisa. “Mi a pensa, mi no por warda pa e encuestanan di fin di aña ricibi e informacionnan aki.”

RealResponse a expande su tecnologia pa inclui maneranan pa atleta inicia contacto pa medio di un simpel mensahe.

E compania tambe ta ofrece maneranan diferente y nobo pa organisadonan por mantene un record di maneranan cu e nan ta responde na e kehonan entrega y reporta. Algun di e scandalnan di abuso sexual Olimpico a envolve purba di saca afo kico autoridadnan a haci na momento cu nan a ricibi e keho of informacion, pero e programa aki ta mantene tur esaki den record, haciendo e hopi mas facil y accesibel na momento di mester habri un investigacion.

U.S Anti-Doping Agency su union na e plataforma ta marca otro logro pa e compania. Un problema cu ta keda sosode den e mundo di anti-doping ta cada biaha e falta di habilidad di por protehe e personanan cu reporta e caso despues cu nan comparti e informacion.

“E conexion cu RealResponse ta yuda kibra e bareranan potencial pa e personanan cu kier reporta un incidente na momento di comunica cu nos ekipo di investigacion,” U.S Anti-doping Agency su CEO Travis Tygart a expresa.

Chadwick a bisa e meta mas grandi ta di haci esaki mas facil den tur aspecto di deporte. Otro obstaculo pa logra combati ta di logra cu e organisacionnan cuminsa reuni e informacion hopi mas eficiente cu pa decada largo, no tabata maneha di manera corecto y hopi biaha no tabata maneha en general.

“Den ultimo ananan, tabatin un duda pa implementa un sistema manera esun di nos pa motibo cu e pregunta hopi baha ta “nos kier sa?” Chadwick a expresa. “Y esey ta un punto di enfoke pa nos. Si bo kier sa, bo mester implementa sistema y hendenan den luga no solamente pa descubri e problemanan aki y lesa e informacion, sino tambe di lidia cu esakinan y soluciona e problemanan di e manera adecua.”