SADA durante firmamento di convenio cu sindicatonan di Corsou; Sindicato ta bringa na defensa y beneficio di e miembronan

Ayera Sindicato di Aduana (SADA) a firma un convenio di colaboracion cu dos sindicato di Corsou, esta STRAF y ABVO cu e obhetivo di estrecha lasonan y intercambia informacion, entre otro.

Asina a indica e presidente di Sindicato di Aduana Edward Maduro den un conferencia di prensa na unda  el a splica cu pa varios aña caba desde cu e tabata den directiva di sindicato aki nan tabatin un comunicacion cercano cu sindicatonan di isla di Corsou unda cu ora nan tabata mester di apoyo y conseho nan tabatin porta habri pa nan por acerca.

Cada biaha cu nan ta celebra dia internacional di Aduana nan ta fortifica y amplia mas e lasonan cu sindicatonan durante e celebracion aki, ayera mainta nan a duna di conoce e decision mutuo di fortifica y firma un convenio pa lo formalisa e funcionamento, hermandad y tambe intercambio di trabounan di sindicatonan entre Aruba y Corsou.

“Constantemente nos ta den cierto problematica, e mayoria di biaha cu doño di trabou, pero semper y cuando los di esaki nos ta purba di traha di un manera mas eficiente y profesional pa nos miembronan cu na final di dia ta esunnan cu ta sali beneficia riba e trabounan sindical cu nos ta ehecuta”, Maduro a señala.

Pa e motibo ey, el a indica cu ora tin cosnan cu ta presenta nobo nan ta acerca na nan colega di sindicato tanto di Aruba pero tambe di Corsou y mirando cu na Aruba ya caba tin lasonan estrecho pa lo cual ta traha sindicalismo, “mi ta kere awe di un  manera mas formal nos lo bay hancra esaki den un convenio”, el a bisa.

Ademas, ayera a tuma luga un reunion entre SADA y sindicatonan di Corsou na unda cu nan a intercambia ideanan di lo cual ta trata e trabou cu nan ta bin eherciendo, nan a splica den detaye con nan ta experiencia esaki pa motibo cu no solamente ora tin problemanan cu ta presenta na pia di trabou e sindicato lo mester atende cu esey sino tambe den momentonan positivo.

Di mesun manera, Maduro a afirma cu na Aruba tin hopi hende cu no ta compronde e trabou di sindicato y cu hopi hende ta mira sindicato como herment cu ta bringa cu dunado di trabou pero mas di esey “sindicato ta bringa na defensa y beneficio di e miembronan”.

Di su parti, Juan Laurens presidente di sindicato STRAF na Corsou a menciona cu nan ta representa e trahadonan di Aduana hunto cu sindicato ABVO na unda cu el a sigura cu pa hopi aña caba for di lantamento di SADA nan tabatin un estrecho cooperacion cu otro pero cu nan a haya sumamente necesario pa formalisa esaki, pa motibo cu  tin un par di punto cu na Corsou ta un poco mas miho compara cu na Aruba pero nan ta kere cu “sindicalismo ta un parti hopi importante di un pais, bo ta representa e trahadonan y bo no ta amigo di doño di trabou pero bo no mester ta enemigo tampoco, madurez politico di un banda y madurez sindical di otro banda, mester haya otro na bienestar di e trahado pasobra na final nos tur ta trahado riba e pais”, Laurens a declara.

Di mesun manera, el a expresa cu na Aruba un di e cosnan hopi importante ta cu hunto cu sindicato SADA nan lo duna di nan banda pa respeta sindicalismo y duna sindicalismo e luga cu e mester tin y e mester ta.

Manera a keda conoci na luna di juli ultimo, Sindicato di Polis di Aruba (SPA) tambe a firma un convenio cu e sindicatonan aki na unda cu den ocasion ey tabata trata di convenio cu departamento di polis, e biaha aki ta referi na e area di Aduana y cu nan ta na haltura di diferente problema cu sindicato SADA tin na unda cu ora un persona tin e funcion di minister, por ehemplo, “e poder cu tin ta relativo y tanten e ta minister e nunca lo mester usa esey pa oprimi e trahadonan of oprimi e sindicato, na final trahado na Aduana na Aruba y politico na Aruba ta forma un comunidad”, Laurens a afirma.

Na Corsou esaki ta funciona di un manera un tiki diferente manera Laurens a bisa pero nan ta haya e mandatarionan na mesa pa papia cu nan, ta p’esey cu nan a firma e convenio aki na unda nan lo duna di nan parti pa splica esunnan cu no ta compronde cu politica no mester ta enemigo di sindicalismo.

Raymond Margaritha secretario di empleadonan publico di sindicato ABVO di Corsou a trece dilanti cu tambe nan tin algun tempo trahando hunto cu SADA. El a bisa cu na Corsou e sector duanero a pasa den un reorganisacion cu no a keda completo, e semper lo tin fayonan y nan lo t’ey si doño di trabou na Aruba lo dicidi cu nan kier reorganisa aduana, nan lo t’ey pa yuda, informa, wak na unda tin fayonan pa nan por tene na cuenta esey akinan.

Gregory Wilson cu ta secretario di organisacion di sindicato ABVO a menciona cu e situacion ta haci cu e traha hunto aki ta necesario, nan tin lasonan for di basta añanan caba manera el a sigura, e ta kere cu awor ta momento pa duna contenido na esey y den mundo sindical nan lo duna un aporte na otro.

“Ban wak asina ey cu ambito laboral e trahadonan di Aruba por haya un miho beneficio for di e acuerdo di trabou cu nos a cera cu otro”, Wilson a indica.

Tambe, el a señala cu na Sint Maarten tur sindicato ta sinta hunto, igualmente na Corsou pero e ta sinti cu Aruba no tin esey ainda,  caminda cu gobierno ta tende di sindicatonan cu ta sinta den sector ey pero akinan no tin un sector na unda tur ta sinta y bin cu ley pa empleado publico su bienestar, “esey mi ta sinti falta di dje y ma ta espera cu den futuro e firmamento di awe nos por duna hopi idea con esey a sucede na Corsou”, Wilson a finalisa.