Minister di Transporte, Integridad, Naturalesa y Asunotnan di Adulto Mayor, Sr. Ursell Arends, durante un rueda di prensa a elabora ariba e topico rioolwaterzuiveringsinstallatie (RWZI).
For di 2018 e tema di RWZI a wordo treci pa dilanti como un topico di prioridad y segun Minister Arends e momento porfin a yega para keto y reconoce e urgencia y prioridad cu tin pa atende cu RWZI.
Minister Arends ta splica cu e momento a yega tambe pa comunidad di Aruba realisa cu pa RWZInan por sigui opera, e ta bay rekeri un inversion cuantioso. El a indica cu prome cu por papia di e vision y direccion cu gobierno kier bay, mester realisa tambe cu na e momentonan aki e condicion cu plantanan di RWZI ta encontra nan mes aden, vooral esun na Bubali, ta pone e unico pilar economico di e isla na peliger. “E ta pone e salud di henter nos comunidad na peliger y tambe e ta causando dañonan negativo na nos naturalesa”, el a bisa.
.
Minister Arends a splica cu e vision di e gabinete pa locual ta trata e plantanan di RWZI ta netamente con gobierno a organisa naturalesa. Normalmente RWZI ta cay bou di DOW cu ta infrastructura y na su turno infrastructura ta cay bou di Minister President, pero segun Miister Arends a señala Gabinete Wever Croes II ta traha di forma horizontal y di forma ey e Ministerio di Naturalesa por traha hunto cu DOW cu ta ocupa di e parti tecnico y e Ministerio di Naturalesa ta ocupa di e parti financiero pa traha un business case pa haya e inversionnan necesario pa yega na e forma ideal.
“E forma ideal ta caminda cu for di RWZI nos ta bay traha awa cu ta accesibel na agricultornan, ya cu esaki ta un di e retonan cu e agricultornan ta pasa aden, pero cu nos por haci uso di tur e desperdicio cu ta sali for di RWZI pa asina haci uso di esakinan pa e ta un forma sostenibel y cu no ta causa daño na nos naturalesa y cu nos por ta sigur cu nos unico pilar economico, cu ta turismo, por keda vigente y sostenibel tambe”, el a agrega.
Minister Arends a informa cu den e proximo cinco añanan lo bin un total di 2000 camber extra den area di turismo y esaki ta pone mas presion ariba e RWZI. El a splica cu su ministerio hunto cu DOW ta trahando ariba un business plan y dentro di poco, na momento cu e business plan aki keda cla, lo tin un planta nobo cu ya caba e minister ta premira lo bay ta un suma cuantioso di inversion. “Nos tur sa e situacion financiero cu nos isla ta aden, pero nos mester zorg pa nos por yega na un planta nobo y asina garantisa y sigura cu nos unico pilar economico lo keda vigente tambe”, el a bisa.
El a sigui splica cu RWZI Bubali ta poniendo den peliger e unico pilar economico, y el a reitera cu DOW ta enfoca ariba e parti tecnico di locual ta trata e plantanan, kico ta e necesidadnan pa e planta nobo y for di su ministerio tin profesionalnan trahando ariba e parti financiero pa asina por calcula e inversion necesario y cuanto e lo costa pa gobierno por yega na e fondonan pa traha un planta completamente nobo cu por cumpli cu e norma y standardnan internacional, cu por carga y procesa e cantidad di awa di tur e hotelnan y e cambernan nobo cu mester bin garantisando, na mesun momento, cu den futuro lo tin un planta cu por maneha tur e desperdicio nan aki. “Na e momentoan aki cualkier camber di hotel cu ta bal 300 of 400 dollar, si e WC no por flush e camber lo bal 0 dollar, dus pesey nos tin un urgencia y prioridad pa soluciona e problema aki.
Turismo ta keda nos unico pilar economico y e ta crea cuponan trabou pa nos hendenan y nos tin cu atende cu e situacion aki cu prioridad y esey ta locual cu nos ta haciendo”, el a agrega. Den fin di siman, dump na Parkietenbos tabata na candela un biaha mas, di parti di Bon Dia Aruba a puntra e minister si el a reuni cu Serlimar pa dialoga e siguiente pasonan pa e problematica aki y kico su minitserio lo haci, ki herment e inisterio tin, pa solucion e problema di medio ambiente pa e bario di Simoen Antonio y becindario.
Minister Arends a splica cu durante e simannan tras di lomba el a sinta cu tur e representantenan di e becindario di Parkietenbos pa asina scucha nan preocupacionnan. El a indica cu na momento cu ta papia di Prkietenbos no ta papia solamente di desperdicio pero tambe di e problematica di cacho cu tin den e bario. “E forma cu nos ta traha di parti di e Ministerio di Naturalesa, nos tin un plan tambe.
Na momento cu mi a bira minister di naturalesa nos a haya un cantidad di estudionan cu a wordo haci caba, kico ta e proposicionnan pa asina ki por remedia e problema di Parkietenbos y tambe trece un structura nobo di con Serlimar ta maneha e desperdicio”, el a bisa. El a indica cu tin hopi estudio haci caba y aworaki a yega tempo pa tuma decisionnan politico pa con nan lo sigui pa dilanti cu e situacion aki, cumpliendo cu e metanan di Gabinete Wever- Croes II, e acuerdonan cu e gabinete tin pa loke ta trata SDGs, “nos lo bay handle esaki tambe den un forma coherente na unda cu desperdicio no lo ta un problema mas y e problematica di parkietenbos lo pasa pa pasado.
El a sigui splica cu mescos cu e situacion di RWZI, nan ta desaroyando aworaki e parti tecnico hunto cu DOW y Serlimar, y tambe e parti financiero pa assina nan por forma un business plan pa por haya e fondonan necesario pa atende cu e problematica, e situacion cu Parkietenbos y Serlimar ta aden aworaki.
