Durante ultimo cuatro añanan segun Maduro a anuncia, nan a mira un desaroyo enorme cu hopi compania vooral den sistema hidroponico cu a habri y expande aparte di logra y yega na un acuerdo cu WEB.NV.

Asina director di Santa Rosa Nathalie Maduro a duna di conoce na Bon Dia Aruba na unda cu el a trece dilanti diferente logro cu nan a haya den ultimo cuatro aña y segun el a sigura, un di nan ta un acuerdo cu nan a logra cu WEB NV tocante e prijs di awa pa productornan comercial cu ta na 5.50 florin per cube cu antes tabata na 9.50 florin.

Aparte di esey, Maduro a bisa cu na aña 2011 Santa Rosa a manda un peticion na e minister encarga na e tempo ey pa motibo cu nan a mira e necesidad cu cunukero pa algun biaha nan tin hopi miedo pa impuesto, sinembargo, e no ta un negoshi na unda ta traha cu miyones na comienso, den negoshi aki ta presenta hopi challenge, ta dificil pa haya prestamo di banco, e clima no ta facil tampoco, entre otro.

Tambe tabatin cierto desaroyonan na Directie Infrastructur den Planning (DIP) pa loke ta trata terenonan, di esaki Maduro a señala cu pa hopi biaha e sector primario ta depende di cooperacion di otro departamentonan, di parti Santa Rosa el a bisa cu nan ta purba di tin bon contacto cu tur, por ehemplo na algun momento nan a haya cierto critica pero tambe nan ta manda conseho directo pa nan pa asina haya nan sa con por yuda Santa Rosa pa nan hunto por traha miho.

Un di e logro cu Santa Rosa ta hopi contento cune tin di haber cu impuesto, Maduro a declara cu nan a wak e necesidad cu cunukeronan kier produci sin e miedo di impuesto, “si bo wak aworaki e mayoria di productonan como frutanan of berdura cu ta bin di afo no ta paga belasting, mi ta kere e ta crea un balans y e ta husto pa nos productornan cu nan tambe tin espacio pa produci te na cierto scala sin worry cu e parti ey”.

Aworaki lo cual cu nan ta bezig cune ta cu na aña 2020, durante e pandemia nan a realisa tambe cu nan situacion ta hopi vulnerabel “nos tin cu haci mas pa e parti di control, nos tin cu bay cuminsa sostene cunukeronan pa lo cual ta nan maneho riba cada sector”, Maduro a sigura y ademas tambe a expresa cu nan tin e parti agricola pero tambe nan tin e parti di criansa, na Aruba pa hopi biaha no tin e inyeccion pa malesa preventivo y tur esey ta den nan plan cu nan ta bezig cune cu nan lo wordo ehecuta pa otro aña.

Den cuatro aña, Maduro a bisa cu Santa Rosa ta contento con nan a crece y con companianan a wordo lanta, interes cu tin di parti di scolnan pa haci bishita of pa haya charla pero aparte di esey tambe tin plataformanan cu a lanta, por ehemplo riba rednan social na unda personanan tin cierto experticio cu tambe nan ta comparti, “e ta un bunita desaroyo y nos ta espera cu tur hende keda cu e animo ey, cu e smaak di planta”.

Maduro a afirma cu nan no ta envolvi den decisionnan pa terenonan por huur pa plantacion, lo cual nan ta haci ta cu ora tin peticion pa renobacion, nan tin un lista di criterio y nan ta wak si por ehemplo, si e persona tin huurgrond pa plantamento, tambe nan ta wak si di berdad e tereno ta wordo usa pa e proposito cu nan a pidiel’e, si nan ta mira cu no tin plantacion, cu e tereno por tin cas, trailer of sushi nan ta meld esey riba nan lista y e informacion ey ta bay na DIP y ta keda nan pa dicidi kico lo pasa cu e tereno ey.

El a enfatisa cu Santa Rosa no ta e departamento cu ta encarga pa duna of kita tereno di hende “nunca nos a haci esey, nos ta bay simplemente wak ki actividad tin riba e tereno y nos ta manda informacion pa DIP”, Maduro a manifesta.

Asina mes, el a indica cu nan proposito ta pa sostene agricultornan, nan ta haci cierto test, stimula, duna charla y vooral aworaki cu nan ta haci’e cu muchanan na unda cu el a afirma cu e ta kere cu mas trempan ta educa e muchanan esey ta miho pa nan futuro, ademas di conscientisa via programanan di television esunnan cu kisas a perde trabou of pa algun otro motibo nan tin cu come mas saludabel, “Santa Rosa ta mustra nan con facil ta pa bo crea bo mesun hofi y pa bo mes produci na un scala chikito cu kisas por bira un oportunidad pa un negoshi pa futuro”. Maduro a señala.

Sistema nobo pa agricultornan por registra via online

Diabierna ultimo, Santa Rosa a presenta na comunidad un sistema moderno online na unda cu nan ta espera cu nan por acumula informacion di cada un di e productornan, na prome instante nan lo cuminsa cu e parti di agricultura y despues nan lo bay riba e parti di criansa di bestia y piscamento.

Nan como parti di Sector Primario kier haci hopi mas pa demostra e potencial y kico ta e produccion cu tin localmente na unda cu nan a wak cu specialmente durante Covid-19 a bin un interes grandi pa plantamento “pero lamentablemente hopi biaha, nos no tin e datonan pa mustra e determinacion, compromiso y potencial pa e sector aki cu ta brinda na Aruba su economia”, Maduro a bisa.

Ursell Arends minister di Transporte, Integridad, Naturalesa y Asuntonan di Adulto Mayor a menciona cu nan lo fungi como facilitado pa duna na sector primario e hermentnan necesario pa desaroya e sector aki como un sector economico pa e isla, “awe nos ta wak cu a traves di tecnologia Santa Rosa ta cuminsa facilita esaki tambe pa nos por tuma decisionnan y nos por crea datonan pa yuda guia e proceso con gobierno tambe por facilita”, Arends a sigura.

Di mesun forma, el a indica cu esaki ta duna un empuhe na agricultornan tanto esunnan cu ta cultiva usando tecnologia y tambe esunnan cu ta cultiva den sistema tradicional, e web app aki lo yuda nan organisa nan miho y yuda Santa Rosa den proceso pa den futuro agricultura por ta mas organisa den forma profesional.

COD-19 tabata e compania encarga di realisa e aplicacion aki na unda cu nan a opta pa diseña e tipo di sistema pa agricultornan por registra nan datonan den un forma relativamente facil, esaki a resulta den un Web App cu ta funciona casi similar cu un aplicacion normal. E web app aki ta funciona riba tur tipo di device, tanto via un telefon celular, un tablet y tambe riba PC.

Den periodo di un aña door di e web app aki nan lo por midi e crecemento di produccion y plantamento di cada producto y wak na unda nan por duna un conseho pa diversifica y mira cuanto producto por produci na Aruba.

Personanan interesa por registra via www.santarosa-aruba.org na unda cu nan a sigura cu tur informacion lo keda confidencial pa uso di Santa Rosa mes.