E aña aki Stichting Ambiente Feliz ta celebra 35 aña di existencia y en conexion cu e celebracion aki, durante un rueda di prensa Stichting Ambiente Feliz a presenta nan logo nobo. Srta. Satya Heinze, secretaria di e directiva di e fundacion, ta elabora ariba e significado di e logo nobo y expansion di e fundacion, Sra. Althea Schmidt, directora di e fundacion a splica tocante e celebracionnan cu lo tuma luga en conexion cu e gran celebracion di 35 aña di existencia.
Stichting Ambiente Feliz a keda funda na aña 1986 pa zuster Filothea. Zuster Filothea a wak den e tempo ey caba un necesidad pa duna cuido y guia na personanan cu limitacion di capacidad mental y asina Stichting Ambiente Feliz a yega na e gran fecha di 35 aña di existencia.
En conexion cu e celebracion aki, Stichting Ambiente Feliz a presenta nan logo nobo y Srta. Heinze a elabora ariba e significado di e logo aki. E fundacion tabata conoci pa su logo cu tabata consisti di un solo. “Solo por significa hopi cos pa diferente hende, por ehempel e por significa energia, creatividad, y pa nos di Stichting Ambienye Feliz e ta simbolisa e forsa cu e ta duna nos pa enfrenta cada reto den nos bida diario, pero tambe pa yuda nos tin e forsa pa por crea un ambiente feliz”, el a splica.
Den cuadro di e celebracion di 35 aña nos kier presenta nos logo nobo cu ta consisti di diferente rayo di solo cu ta drenta den un cas, un cas na unda cu e personanan cu limitacion di capacidad mental y multiple y compleho por biba y desaroya habilidadnan nobo, ricibi e cuido necesario y empodera nan mes”, Srta Heinze a agrega.
Stichting Ambiente Feliz ta ofrece cuido y guia 24 ora pa dia pa brinda cuido ariba nivel y calidad halto. Recientemente nan a habri un segundo localidad na San Nicolas. E fundacion a duna cada localidad un nomber special, Srta. Heinze a splica. E localidad principal na Santa Cruz ta ricibi e nomber Cas Curason, “E ta keda e curason di nos fundacion na unda nos ta eherce nos trabou pa 35 aña”, el a bisa.
E localidad na San Nicolas ta ricibi e nomber Cas Briyante cu ta significa cu e solo ta briyando otro caminda tambe y lo sigui briya y bira mas grandi den futuro. E localidad na San Nicolas ta bay enfoca completamente ariba personanan cu limitacion multiple y compleho. E localidad ta consisti di tres cas. Dos di e casnan por atende seis cliente y un cas por atande ocho cliente. Luna pasa e fundacion a habri e prome cas y awor aki tin tres cliente cu ta kedando na e cas y e fundacion ta den esepera pa indicatie commissie por asigna tres otro cliente cu por uni na e cas nobo na San Nicolas.
Srta. Heinze a gradici, den nomber di Stichting Ambiente Feliz, tur e sosten cu e fundacion ta ricibi. “Nos no por a haci asina un bunita trabou pa 35 aña sin e sosten di comunidad cu ta haci nan donacion di un manera of otro y gobierno di Aruba cu sa di sostene cu subsidio. Danki na Aruba y gobierno di Aruba pa boso sosten y nos ta spera cu nos por sigui cu boso”, el a agrega.
Sra. Althea Schmidt, directora di Stichting Ambiente Feliz tambe tabata presente y a elabora ariba e celebracionnan cu lo tuma en conexion cu e 35 aña di existencia di e fundacion.
E 35 aña di existencia di e fundacion lo wordo celebra den grandi na unda e siman di 25 di october lo keda yena cu diferente actividadnan, el a bisa. “Clientenan lo por bay disfruta di un dushi desayuno, tratamento di cabey, un tremendo fiesta, bus trip y mucho mas.
El a indica cu e empleadonan di e fundacion mas cu claro tambe lo wordo gradici pa nan dedicacion y trabou cu un celebracion grandioso. El a splica cu nan lo disfruta di entre otro un dinner, massage y un sunset sail. “Nos ta gradici tur nos sponsor cu lo yuda pa haci e celebracion aki uno inolvidabel”, el a bisa,
Tambe nos kier tuma oportunidad pa gradici tur e personanan cu den pasado of ainda na un of otro manera ta sostene nos fundacion”, Sra. Schmidt a agrega.
Minister Rocco Tjon no por tabata presente durante e conferencia di prensa, pero Sra. Michella Steenvoorde-Lacle, beleids medewerker di Minister Rocco Tjon y e persona di contacto pa e stichtingnan cu tin di haber cu gehandicapten zorg, tabata tey den representacion di Minister Tjon.
El a splica cu el a ricibi un rond leiding di e bestuur di Stichting Ambiente Feliz y di tur e trabounan briyante cu e fundacion ta haci. “Nos kier gradici boso bestuur tambe pasobra sin nan e trabou aki no por ta posibel, el a indica.
Steenvoorde-Lacle a aplaudi e trabou cu e fundacion ta haci y a haci specialmente durante e temporada di covid cu tabata hopi un temporada hopi dificil pa keda motiva y keda dirigi e clientenan.
El a indica cu e personal di e fundacion tin retonan cu mester wordo soluciona hunto. “Nos kier expande y esaki ta algo cu nos kier bay pensa con nos ta bay hacie cu e limitenan cu tin, nos tin cu pensa hunto con nos ta bay logra e expansion aki.”, el a bisa. “Pesey mes nos ta haci un peticion na pueblo pa yuda nos cu e donacionnan pa nos por logra e expansion y tambe nos ta bay pensa con nos ta bay hacie hunto y sigur nos ta bay logra.
