Food and Drug Administration ta trece dilanti meta nobo pa reduccion di sodio den industria di cuminda

(AP) – Companianan di cuminda ta ricibiendo hopi presion atrobe pa usa menos salo despues cu reguladornan di Merca a introduci guianan hopi spera cu e meta di reduci e nivelnan di sodio den varios cuminda, incluyendo condimento, cornflakes, batata hasa y chips.

E golnan boluntario finalisa riba diaranson pa 163 categoria di cuminda tin e intencion di yuda baha e cantidad di salo cu hende ta consumi. E mayoria di e sodio den e dieta di Merca ta bini di cumindanan den pakete of cuminda usa na restaurant, no e salo cu ta come na cas, haciendo e mas dificil pa hende por haci cambio nan so.

Pa por logra cu hende custuma na come menos salo, e Food and Drug Administration a bisa cu mester haci reduccion gradual y den henter e suministro di alimento pa hende no keda busca opcionnan mas halto den sodio.

“Pa medio di publica e meta cu nos kier cumpli, nos ta logra nivela e uso den enter e industria,” segun Susan Mayne, director di Food and Drug Administration su divison di siguridaad di cuminda y nutricion a declara.

Durante e siguiente 2.5 aña, e Fod and Drug Adniminstration su meta ta di baha e nivelnan di sodio te cu un averahe di 12%, di 3,400 te cu 3,000 miligram pa dia. Esaki te ainda lo laga e averahe di consumo mas halto cu e limite federalmente conseha, cual ta di 2,300 miligram pa dia, pa hendenan di 14 aña bay ariba. Pero e agencia a bisa cu e lo monitoria e progreso den e industria y keda haci uso di metanan actualisa pa por trece e nivel cada biaha mas cerca na e limite recomenda federalmente.

E Food and Drug Administration a bisa cu nan a tuma den consideracion e feedback di e industria despues di a publica nan prome guia den aña 2016. Ketchup, mustard y saus pica por ehempel, a keda separa y awo tin diferente guia. Otro diferencia ta, cu e guia final no ta papia tocante un tempo unda cu mester yega na e otro metanan di termino largo.

“E ta un gran desilusion cu nos no a yega na e meta di 10 aña na e mesun momento aki,” Dr. Dariush Mozaffarian, cabesante di Tufts University Friedman School of Nutrition Science and Policy a declara.

Mozaffarian a bisa cu algun compania di cuminda a resisti e meta di rduci sodio, pero cu mas sosten cientifico a cuminsa bini dilanti pa e guia federal riba sodio. Den aña 2019, e National Academies of Sciences, Engineering y Medicina a mara e limite di recomendacion na e reduccion di malesa cronico. Un estudio recien haci na China tambe a haya un averahe hopi mas abao den eventonan relaciona cu curason den personanan usando un substituto pa salo compara cu esunnan usando salo regular.

Si e meta ta efectivo of no den e empuhe pa baha e nivel di sodio den e industria lo depende di con e Food and Drug Administration lo monitoria e progreso y publicamente comunica tocante esaki.